I Tesa 3 - Naaŋmen Nɔpaalaa Gane

¹ Azuiŋ, te naŋ da wa nyɛ ka a te kannyiri zaa baare, te da teɛre ka ba bare te ka te be a Atɛnse teŋɛ poɔ te yoŋ tɛgɛ.

² Te da toŋ la a te yɔɔ Timoti naŋ waa te tontontɔ naŋ tonɔ korɔ Naaŋmen ne o naŋ moɔlɔ a Kirista yelnoore, ka o wa ko yɛ faŋ kyɛ yeli yɛlɛ teɛ a yɛ yeldeebo,

³ ka ka neɛzaa nuuri ta wa yoɔre ne a dɔgɛɛ ama. Serɛzaa yɛmenne baŋ ka a yɛlɛ ama la na pɔge te.

⁴ Yelmeŋɛ zaa, te naŋ da be yɛ zie, te da daŋ yeli ko yɛ la ka te na nyɛ la dɔgɛɛ; ka a da e a lɛ seŋ yɛ naŋ da baŋ.

⁵ A ŋaa zuiŋ, N naŋ da koŋ la baŋ di kannyiri, N da toŋɛɛ la ka ba wa peɛre yɛlɛ kyaare ne a yɛ yeldeebo; N da zoro la dabeɛ̃ ka kaapɔge a sebɛlbɛllɛ bɛlle yɛ la ka a toma te naŋ toŋ waa weɛlɛ.

Timoti Naŋ Leɛ Wa Tere Duor-noɔ

⁶ Kyɛ pampana, a Timoti leɛ yi la a yɛ zie wa te zie, a wa ko te duor-noɔ a kyaare ne yɛ yeldeebo ane yɛ nɔmmo. O yeli ko te la meŋ ka yɛ maŋ teɛrɛ la te yɛlɛ tegitegilɛ ne nɔmmo kyɛ nɔnɔ ka yɛ nyɛ te aŋa te naŋ nɔnɔ ka te nyɛ yɛ lɛ.

⁷ A ŋaa zuiŋ, te yɔɔmine ane te yɔɔpuuli, a te yelwonni ane a te dɔgɛɛ zaa saŋ, a da e la yelteɛbo ko te, te naŋ da wa woŋ a yɛ yeldeebo yɛlɛ.

⁸ Pampana, te taa la nyɔvore, ka yɛneŋ naŋ kyɛnɛ wa are kpeɛŋaa a Daana eŋɛ.

⁹ Wola ka te na e puori Naaŋmen bareka a yɛ zuiŋ ka a seŋ, a popeɛloŋ zaa yɛ naŋ e ka te nyɛrɛ a te Naaŋmen niŋesogɔ.

¹⁰ Te puoro la nimizeɛ zaa tensogɔ ane ŋmenaa ka ka te na toɔ̃ nyɛ taa nimisogre bebiri kaŋ ka te maale a yɛlɛ na zaa naŋ kyɛre a yɛ yeldeebo poɔ eŋ.

¹¹ Pampana, ka te Saa Naaŋmen meŋɛ ane a te Daana Yeezu wuli te a sori wa ne yɛ zie.

¹² Ka a Daana e ka yɛ nɔmmo yɛ naŋ taa ne taa ane noba zaa duoro zu a gɛrɛ niŋe aŋa lɛ te naŋ nɔŋ yɛ.

¹³ Ka O ko yɛ sukyie faŋ, ka yɛ e soŋ, a ta taa faaloŋ zaa a te Saa Naaŋmen niŋesogɔ ane a te Daana Yeezu ane a O nensonne zaa waabo daare.