I Tesa 2 - Naaŋmen Nɔpaalaa Gane

A Pɔɔl Tonnoɔre A Tɛsalonika Teŋɛ Poɔ

¹ N yɔɔmine ane n yɔɔpuuli, yɛmenne baŋɛɛ la ka te naŋ da wa a yɛ zie, a da ba e weɛlɛ,

² kyɛ aneazaa ka te da di la dɔgɛɛ kyɛ ka ba to te vi zomɔ a Filipae teŋɛ poɔ aŋa yɛ naŋ baŋ lɛ, kyɛ te da dɛle la a te Naaŋmen kyɛ moɔle a O yelnoore ko yɛ aneazaa ka noba yaga da zɔɔrɔ ne te la.

³ Bonso, a te kpɛlle te naŋ ŋmeɛrɛ da ba yi bɛllɛ, bee teɛroŋ faare bee nyaayɛlɛ poɔ,

⁴ kyɛ aŋa lɛ a Naaŋmen naŋ da nyɛ ka te seŋ ne a ka O de a O yelnoore duoro eŋ te nuuriŋ, a lɛ meŋ la ka te moɔlɔ a yelnoore. Te ba moɔlɔ a yelnoore ka te pɛllɛ nensaalba poore, kyɛ te moɔlɔ a la ka te pɛllɛ Naaŋmen poɔ. Ona la maŋ tegre a te sukyie nyɛ.

⁵ Aŋa yɛ naŋ baŋ kyɛ ka Naaŋmen e te dansedire lɛ, te daŋ ba wa yɛ zie a wa yele nɔnoɔ-yɛlɛ bee a eŋ bombɔ-gaŋne niŋe;

⁶ kyɛ bee a da boɔrɔ puubu yi nensaalba zie, ka yɛ zie la bee ka noba mine zie la,

⁷ aneazaa ka te pɔɔ da bɔ la sommo yi yɛ zie te naŋ waa a Kirista apostoliimine zuiŋ. Kyɛ te da waa la baaloŋ yɛ poɔ aŋa bima naŋ kaara o meŋɛ bibiiri zu velaa zaa.

⁸ Te naŋ taa yɛ yɛlɛ te sukyie poore yaga zaa zuiŋ la so ka te nare ka te ta ko yɛ a Ŋmen-yelnoore yoŋ, kyɛ ka te de temenne meŋ ko yɛ, bonso, yɛ leɛ la noba te naŋ nɔŋ yaga zaa.

⁹ N yɔɔmine ane n yɔɔpuuli, yɛ leɛ-teɛre a te toma ane a te wale puruu; te da tonɔ la toma ŋmenaa ane tensogɔ a saŋ te naŋ da moɔlɔ a Ŋmen-yelnoore korɔ yɛ ka ka te ta wa ko yɛ kanzaa toɔrɔ.

¹⁰ Yɛ waa la te dansediribe, ka Naaŋmen meŋ waa a lɛ, ka a te yel-erre a yɛnee yelderebɛ zie da waa soŋ, a tori a ba taa yelsaanaa zaa.

¹¹ Aŋa yɛ naŋ baŋ lɛ, te da erɛ la yɛlɛ yɛ yeni yeni zaa zie aŋa saa naŋ maŋ erɛ o bibiiri zie lɛ.

¹² Te da kpaala yɛ la kyɛ yele yɛlɛ teɛrɛ yɛ, a sɔrɔ ka yɛ taa a yɛ nyɔvoɛ ka a seŋ ne a Naaŋmen naŋ boɔrɔ lɛ. Ona la boɔle yɛ eŋ a O meŋɛ naaloŋ ane a O puubu poɔ.

¹³ Te meŋ maŋ puoro la Naaŋmen bareka tegitegilɛ a yeli ŋa zuiŋ, ka a saŋ yɛ naŋ da woŋ a Naaŋmen yelbiri yi te zie, yɛ da ba sage de ka a yelbiri waa la nensaala yelbiri, kyɛ yɛ da sage de o la ka o waa lɛ o naŋ sereŋ waa, a Naaŋmen yelbiri. A yelbiri ŋa meŋ la tonɔ toma yɛnee a yelderebɛ nyɔvoɛ poɔ.

¹⁴ Yɛnee, n yɔɔmine ane n yɔɔpuuli, da leɛ la noba naŋ tɔglɔ a Naaŋmen puoruu laŋne deme naŋ be a Kirista Yeezu eŋɛ a Gyudiya teŋɛ poɔ. Bonso, a yɛmenne noba da dɔgre yɛ la aŋa lɛ ne o zu a Gyuumine naŋ da dɔgre ba.

¹⁵ A Gyuumine la da ko a Daana Yeezu ane a Ŋmen-yelmanneba kyɛ da digi te yi bare. Ba da sãã la Naaŋmen poɔ kyɛ zɔɔrɔ ne neɛzaa,

¹⁶ ne ba naŋ da pigre te sori ka te na ta wa moɔle a Ŋmen-yelnoore ko a Nemboore-yobo ka ba nyɛ faabo. A lɛ ka ba erɛ ka a ba yelbebe gboŋno duoro zu tegitegilɛ; kyɛ a baaraa zaa, Naaŋmen supuriyaaraa na do ba la.

A Pɔɔl Naŋ Da Nɔnɔ Ka O La Gaa Te Nyɛ A Tɛsalonika Deme

¹⁷ Tenee eŋ, n yɔɔmine ane n yɔɔpuuli, te ne yɛ da wɛle la taa belaa eŋgannoŋ poɔ kyɛ ka a ba e te teɛroŋ poɔ. Te da taa la yɛ vɔlaa kyɛ da nɔnɔ yaga ka te wa ka te nyɛ taa nimisogre.

¹⁸ Bonso, te da boɔrɔ la ka te wa yɛ zie, (yelmeŋɛ zaa, maa Pɔɔl da boɔrɔ la ka N wa nyɛ yɛ gborɔgborɔ) kyɛ ka Setaana da pigi te sori.

¹⁹ Boŋ la a te teɛretɔroo bee a te popeɛloŋ bee a te pɔloo eebo zupile a te Daana Yeezu niŋesogɔ a O waabo daare? Yɛnee mɔɔ naane be?

²⁰ Yelmeŋɛ zaa, yɛnee la a te puubu ane a te popeɛloŋ!