I Tesa 1 - Naaŋmen Nɔpaalaa Gane

Yaane Puoro

¹ Maa Pɔɔl, Silivaanu ane Timoti la sɛgrɛ a lɛtɛ ŋa korɔ a Saa Naaŋmen ane a Daana Yeezu Kirista puoruu laŋne naŋ be a Tɛsalonika teŋɛ poɔ: Ka garaaseɛ ane maaroŋ be yɛ zie.

A Tɛsalonika Deme Yeldeebo Ane Ba Yelmannaa Yɛlɛ

² Te maŋ puoro la Naaŋmen bareka tegitegilɛ yɛ zaa zuiŋ, kyɛ maŋ taa yɛ teɛroŋ wagre zaa te puoruu poɔ,

³ a maŋ teɛrɛ a yɛ yeldeebo toma, a yɛ nɔmmo toma ane a kannyiri yɛ naŋ taa ne a teɛretɔroo a te Daana Yeezu Kirista eŋɛ a te Saa Naaŋmen niŋesogɔ.

⁴ Te yɔɔmine ane te yɔɔpuuli naŋ waa Naaŋmen poyɛŋ noba, te baŋ ka O kaa-iri yɛ la,

⁵ bonso, a te Ŋmen-yelnoore duoro da ba wa a yɛ zie yelbiri yoŋ tɛgɛ, kyɛ o da wa la yɛ zie meŋ ne kpeɛ̃õ ane a Vooroŋ Soŋ ane yɛlɛ naŋ ba taa bonnoo zaa, aŋa lɛ yɛ naŋ baŋ noba na te naŋ da waa yɛ poɔ a yɛ zuiŋ.

⁶ Kyɛ yɛ da e la noba naŋ tɔglɔ te yel-erre ane a Daana yel-erre, aneazaa ka yɛ da be la dɔgɛɛ poɔ kyɛ yɛ da de la a Naaŋmen yelbiri a Vooroŋ Soŋ naŋ tere ne popeɛloŋ.

⁷ A lɛ eɛɛ la ka a yelderebɛ zaa naŋ be Masedoniya ane Akaya tenne poore leɛ tɔglɔ a yɛ eebo.

⁸ Bonso, a Daana yelbiri ba yi a yɛ zie yaare a Masedoniya ane a Akaya tenne poore yoŋ, kyɛ a ziiri zaa, ba baŋ la a yɛ yeldeebo yɛ naŋ taa a Naaŋmen eŋɛ, ka a ba la fere ka te la yeli yelzaa.

⁹ Bonso, a tenne na noba yeli la te yɛlɛ kyaare ne lɛ yɛ naŋ da tuori de te a yɛ poɔ ane lɛ yɛ naŋ da bare a yɛ tebɛ kyɛ leɛ wa a Naaŋmen zie, a na tonɔ korɔ a Naaŋmen naŋ waa vore kyɛ e meŋɛ,

¹⁰ a na kyɛllɛ a O Bidɔɔ ka O yi tenvelaa wa. Ona la ka O da e ka O leɛ-iri yi a kũũ poɔ; Ona la a Yeezu naŋ faa te yi a supuriyaaraa naŋ waana poɔ.