II Tesa 3 - Naaŋmen Nɔpaalaa Gane

Yɛ Puoro Korɔ Te

¹ A baaraa zaa, te yɔɔmine ane te yɔɔpuuli, yɛ puoro korɔ te, ka ka a Daana yelbiri yaara wieouŋ wieouŋ kyɛ nyɛ puubu ziiri zaa aŋa lɛ a naŋ da waa yɛ zie,

² kyɛ ka ba faa te yi potuodeme ane yelfa-erebɛ nuuri poɔ, bonso, a noba zaa naane taa yeldeebo.

³ Kyɛ a Daana e la yelmeŋɛ soba, O na ko yɛ la faŋ kyɛ gu yɛ yi a faaloŋ soba nuuriŋ.

⁴ Kyɛ te taa la bambaare a Daana eŋɛ a kyaare ne yɛ, ka yɛ erɛ la, kyɛ naŋ na kyɛnɛ erɛ a anaŋ te naŋ yeli ko yɛ.

⁵ Ka a Daana e ka yɛ sukyie taa Naaŋmen nɔmmo ane a Kirista kannyiri diibu.

Kpããmo Naŋ Kyaare Ne Neɛ Naŋ Ba Tonɔ Toma Yɛlɛ

⁶ Te poyɛŋ noba, pampana te korɔ yɛ la noɔre a Daana Yeezu Kirista yuori eŋɛ ka yɛ tage yɛmenne yi yelderebɛ naŋ taa entuo a ba tonɔ toma zaa kyɛ zagre ka ba tuuro a yɛlɛ yɛ naŋ de yi a te zie.

⁷ Bonso, yɛmenne baŋ la lɛ yɛ naŋ seŋ ka yɛ tɔglɔ te; te da ba waa noba naŋ taa entuo a ba tonɔ toma te naŋ da be yɛ zie,

⁸ te da ba di neɛzaa bondirii ka te ba yɔɔ a sane; kyɛ te da tonɔ la toma a puro wale tensogɔ ane ŋmenaa, ka ka te na ta wa e toɔrɔ a ko yɛ.

⁹ A ŋaa da ba wuli ka te da ba taa a lɛ sori a na vɛŋ ka ba guolo te, kyɛ te da erɛ la a lɛ ka a e yelwulaa yɛ zie ka yɛ na tɔglɔ te eebo.

¹⁰ Bonso, a saŋ te naŋ da be yɛ zie gba te da ko yɛ la a noɔre ŋa: Soba na zaa naŋ ba nɔŋ ka o toŋ toma ba seŋ ka o dire.

¹¹ Bonso, te woŋ ka yɛ mine taa la entuo, a ba tonɔ toma zaa kyɛ kpeɛrɛ noba yɛlɛ poɔ.

¹² Pampana, a noba bama taaba la ka te kpaana kyɛ yele yɛlɛ teɛrɛ ba a Daana Yeezu Kirista eŋɛ, ka ba tonɔ ba toma zomm a kaara bamenne.

¹³ Te yɔɔmine ane te yɔɔpuuli, yɛ ta vɛŋ ka yɛ nuuri yoɔre tonsonne tommo eŋɛ.

¹⁴ Yɛ baŋ ne a banaŋ naŋ ba tuuro a yɛlɛ te naŋ yele korɔ yɛ a lɛtɛ ŋa poɔ; yɛ ta taa yelzaa ne ba, ka lɛ e ka vi kpɛ ba.

¹⁵ Yɛ ta nyɛ ba ka ba waa ŋa yɛ dɔndɔnne, kyɛ yɛ kpãã ba ba naŋ waa yelderebɛ zuiŋ.

Yaane Puor-parebaaraa Ane Naaŋmen Maaloo

¹⁶ Pampana, ka a Daana naŋ waa maaroŋ soba ko yɛ maaroŋ tegitegilɛ yɛlɛ zaa poɔ. Ka a Daana be yɛ zaa zie.

¹⁷ Maa Pɔɔl la sɛgrɛ a yaane puoro ŋa ne n meŋɛ nu. A ŋmaaroŋ ŋa la maŋ be a n gansɛgre zaa poɔ; a ŋaa la ka N maŋ sɛge.

¹⁸ Ka a te Daana Yeezu Kirista garaaseɛ be yɛ zaa zie.