Hiburu 8 - Naaŋmen Nɔpaalaa Gane

Yeezu, A Te Naaŋmen Bagmaalkare Neŋkpoŋ

¹ Pampana a bon te naŋ yele yelzu la ŋa: a Naaŋmen bagmaalkare neŋkpoŋ ŋa tɔ la ka te taa, Ona la a soba na naŋ zeŋ a Naaŋmen naaloŋ nakogi nuduluŋ seŋ a sazu poɔ,

² a e tontonɔ a zisoŋ poɔ a Naaŋmen die poɔ ane a sege meŋɛ zisoŋ zie na a Daana meŋɛ naŋ maale ka nensaala naane maale.

³ Ba maŋ iri la Naaŋmen bagmaalkare neŋkpoŋ zaa ka o terɛ kyɔɔtaare kyɛ maala bagre. Azuiŋ, a ferɛɛ la ka a Naaŋmen bagmaale wederɛ ŋa meŋ taa bonkaŋ a na tere.

⁴ Ka O naŋ da be teŋɛzu, O da koŋ e Naaŋmen bagmaale wederɛ togitogi zaa, bonso, Naaŋmen bagmaale wederebɛ bebe la a terɛ kyɔɔtaare a seŋ a bege naŋ wuli lɛ.

⁵ Ba maŋ toŋ la a ba bagmaale toma a zisoŋ zie na naŋ waa tenvelaa bommannaa ane dasuoluŋ, bonso, a saŋ na Moozul naŋ da boɔrɔ ka o ti a sege, Naaŋmen da kpãã o la a yele, “Kaa velaa kyɛ maale bonzaa ka a tu taa a seŋ lɛ ba naŋ da wuli fo a taŋzu.”

⁶ Kyɛ pampana Yeezu nyɛ la toma naŋ soma yaga zaa gaŋ a taaba, ka a lɛ vɛŋ ka O e yelmaala a nɔ-eŋnaa na naŋ soma gaŋ a dɛndɛŋ noɔre na. Ona la ka ba da eŋ a yi a nɔ-eŋnaa na naŋ soma yaga gaŋ.

⁷ Bonso, ka a dɛndɛŋ noɔre na da ba taa saanaa zaa, a da koŋ la fere ka ba leɛre o ne a ayi soba.

⁸ Kyɛ Naaŋmen nyɛ la ba saanaa a yeli: “A bebie sereŋ waana la, a Daana la yeli, ka N na eŋ nɔpaalaa ne a Izerayɛl biiri ane a Gyuda biiri,

⁹ o koŋ waa ŋa a noɔre na N naŋ da eŋ ne a ba sããkommine, a daare na N naŋ da nyɔge ba nu, a de ba weɛ, a taa ba wa yi ne a Igyipiti teŋɛ poɔ; ba naŋ da ba la tuuro a N nɔ-eŋnaa zuiŋ, lɛnso ka a Daana da yeli, N ba la taa ba yɛlɛ.

¹⁰ A nɔ-eŋnaa ŋa la ka N na eŋ ne a Izerayɛl biiri, a bebie na puoriŋ, a Daana yelee la: N na eŋ la a N bege a ba teɛrɛ poɔ, kyɛ sɛge a eŋ ba sukyie poore, ka N waa ba Naaŋmen, kyɛ ka ba waa N noba.

¹¹ Ba koŋ wuli taa bee a yeli ko taa, ‘Baŋ a Daana,’ bonso, ba zaa na baŋ ma la, a yi ba bile soba a te tɔ ba kpoŋ soba.

¹² Bonso, N na di la ba yelbebe suuri ko ba, a daŋ koŋ la leɛ-teɛre a ba yelbebe yɛlɛ zaa.”

¹³ A Naaŋmen naŋ yeli “a nɔpaalaa” yɛlɛ wuli ka O eɛɛ la ka a dɛndɛŋ soba ba la taa tɔnɔ. Kyɛ bon naŋ leɛ boŋkoraa a korɔ gɛrɛ, a koŋ kɔɔre kyɛ ka o moore gaa.