Hiburu 7 - Naaŋmen Nɔpaalaa Gane

A Mɛlekizɛdɛk Yɛlɛ

¹ A Mɛlekizɛdɛk ŋa da waa la “Salɛm teŋɛ Naa, a Naaŋmen Kpeɛ̃õ Zaa Daana bagmaale wederɛ. A Aboraham naŋ da te zɔɔtoɔ̃ a namine kyɛ da leɛ waana, a Mɛlekizɛdɛk da tuori o la a maale o.”

² A Aboraham da poŋ la a boma zaa o naŋ ŋma yi a zɔɔre zie “ziiri pie, a iri a ziyeni ko a Mɛlekizɛdɛk.” A dɛndɛŋ soba, a o yuori tɛgɛ la, “mennoŋ naa.” A ayi soba, o la e la Salɛm naa meŋ, ka a tɛgɛ la, “maaroŋ naa.”

³ O ba taa Saa, a ba taa ma, a ba taa Sããkompare, a ba taa piiluu bee baaroo. Kyɛ o ne a Naaŋmen Bidɔɔ yi la taa, ka o waa Naaŋmen bagmaale wederɛ tegitegilɛ.

⁴ Nyɛ o naŋ waa kpoŋ seŋ lɛ! Haali Aboraham, a Sããkomkpoŋ da ko o la a boma o naŋ da zɔɔ a ŋma, a poŋ ziiri pie poɔ ziyeni.

⁵ Kyɛ a Levi biiri banaŋ toma naŋ da e a Naaŋmen bagmaale wederoŋ, ba da biŋ la noɔre ko ba a bege poɔ ka ba maŋ de a noba boma ba naŋ maŋ poŋ ziiri pie, ziyeni. A tɛgɛ la, ka ba de a yi a bamenne noba zie, aneazaa ka a bama meŋ waa la a Aboraham boorɔ.

⁶ Kyɛ a dɔɔ ŋa naŋ ba e a ba Sããkompare neɛ, da de la a boma poŋ ziiri pie, ziyeni a yi Aboraham ba naŋ da eŋ a noɔre tere zie kyɛ maale o.

⁷ Nɔkpeɛne zaa kyebe ka a kpoŋ soba la maŋ maale a bile soba.

⁸ A yeli ŋa eŋ poɔ, banaŋ naŋ na kpi la maŋ de a boma poŋ ziiri pie poɔ, ziyeni; kyɛ a ŋa eŋ, a soba na banaŋ di danseɛ ka o voorɔ la da de a.

⁹ Neɛ gba na toɔ̃ yeli ka a Levi meŋɛ naŋ da de a boma poŋ ziiri pie, ziyeni, da tu la Aboraham zie a tere a boma poŋ ziiri pie poɔ, ziyeni.

¹⁰ Bonso, ba da naŋ ba dɔge a Levi sɛre kyɛ ka a Mɛlekizɛdɛk da tuori a Aboraham.

Naaŋmen Bagmaale Wederɛ Kaŋ Naŋ Waa Ŋa Mɛlekizɛdɛk

¹¹ Ka sonnoŋ da tu a Levi Naaŋmen bagmaale wederoŋ boorɔ pare wa (bonso a Naaŋmen bagmaale wederoŋ boorɔ ŋa pare zie la ka a Izerayɛl biiri da nyɛ a bege) boŋ feroo la da na bebe ka ba la yele Naaŋmen bagmaale wederɛ yuo naŋ yi a Mɛlekizɛdɛk Naaŋmen bagmaale wederoŋ boorɔ pare kyɛ bare a Aarɔn Naaŋmen bagmaale wederoŋ pare?

¹² Bonso, ka leɛroo kaŋ wa kpɛ a Naaŋmen bagmaale wederoŋ yeltuuri poɔ, a na fere la ka ka leɛroo kpɛ a bege meŋ poɔ.

¹³ A neɛ na yɛlɛ ba naŋ yele a yɛlɛ ama yi la boore yuo poɔ ka neɛ kanzaa daŋ ba yi be a e Naaŋmen bagmaala.

¹⁴ Bonso a sãã la weliweli ka a te Daana da yi la a Gyuda bale poɔ, kyɛ Moozul da ba yeli bagmaale wederebɛ yɛlɛ zaa kyaare ne a bale na.

¹⁵ A pãã gba maaleŋ sãã la weliweli, saŋ na Naaŋmen bagmaale wederɛ kaŋ naŋ wa yi a waa ŋa a Mɛlekizɛdɛk.

¹⁶ A Mɛlekizɛdɛk ba tu a nensaalba dɔgebo sori a seŋ a noɔre naŋ biŋ a wa leɛ Naaŋmen bagmaale wederɛ, kyɛ o tu la a kpeɛ̃õ naŋ be nyɔvore ba naŋ koŋ baŋ sãã zie.

¹⁷ A gansoŋ di la O danseɛ a yele: “Fo waa la Naaŋmen bagmaale wederɛ tegitegilɛ, a Mɛlekizɛdɛk bagmaale wederoŋ tuuluŋ sori poɔ.”

¹⁸ A naŋ e ŋaa, ba iri la a dɛndɛŋ noɔre na bare o naŋ da ba taa faŋ ane tɔnɔ zuiŋ.

¹⁹ (Bonso a bege da ba maale yelzaa ka o tori); kyɛ a lambori kaŋ meŋ, te nyɛ la teɛretɔroo naŋ seɛ ka te na maŋ tu a tage peɛle Naaŋmen.

²⁰ Noɔre polloo la ka ba de biŋ ne o; bonso, ba mine eŋ da ba polle kyɛ leɛ Naaŋmen bagmaale wederebɛ,

²¹ kyɛ a neɛ ŋa eŋ da leɛ la Naaŋmen bagmaale wederɛ ne noɔre polloo, a neɛ naŋ da yeli a yeli ŋa ko O zuiŋ: “A Daana pollɛɛ la kyɛ koŋ leɛre O teɛroŋ, ‘Fo waa la bagmaale wederɛ tegitegilɛ’ ”

²² A ŋaa poɔŋ Yeezu meŋ e la neɛ naŋ are ko a nɔ-eŋnaa naŋ seɛ a dɛndɛŋ noɔre na.

²³ Yeli naŋ la bebe la: a dɛndɛŋ Naaŋmen bagmaale wederebɛ da waa la yaga, bonso, kũũ da ba sage ka ba na tonɔ a ba toma gɛrɛ tegitegilɛ.

²⁴ Kyɛ Yeezu be la a Naaŋmen bagmaale wederoŋ toma poɔ tegitegilɛ, bonso, O tonɔ gɛrɛ la tegitegilɛ.

²⁵ A lɛ zuiŋ O na toɔ̃ faa la banaŋ naŋ tu O zie a wa Naaŋmen zie vuo zaa poɔ, O naŋ voorɔ tegitegilɛ kyɛ puoro korɔ ba zuiŋ.

²⁶ Bonso, a da seŋɛɛ la ka te taa a Naaŋmen bagmaalkare neŋkpoŋ ŋa tɔ, naŋ waa soŋ, a ba taa saanaa zaa, a ba mɔge yelbieri, a tage O meŋɛ yi yelbebe deme poɔ kyɛ ka ba zɛge O do saa gaŋ a saluoni.

²⁷ Ona eŋ, a da ba fere ka O maala bagre bebiri zaa a daŋ ko O meŋɛ yelbebe ane a noba yelbebe aŋa a Naaŋmen bagmaalkare nembɛrɛ banaŋ naŋ da maŋ e lɛ. Ona eŋ da de la O meŋɛ nyɔvore maale ne bagre dayeni yoŋ.

²⁸ A Naaŋmen bege maŋ iri la noba naŋ na baŋ taa bambaaloŋ a e ka ba waa Naaŋmen bagmaalkare nembɛrɛ, kyɛ a noɔre polloo yelbiri naŋ da tu a bege puori wa, iri la Bidɔɔ ba naŋ e ka o waa soŋ tegitegilɛ.