Hiburu 6 - Naaŋmen Nɔpaalaa Gane

Faaloŋ Naŋ Be Yeldeebo Leebu Poɔ

¹ Azuiŋ, yɛ e ka te gɛrɛ niŋe, a toro a Naaŋmen yelbiri bammo poɔ, kyɛ ta naŋ be a bibil-yelbie na ba naŋ da piili wuli te kyaare ne a Kirista. A ta la leɛrɛ gɛrɛ puori a piiluu bibil-yelbie poɔ: aŋa meŋɛ leɛbo a yi yɛlɛ naŋ ba taa tɛgɛ ane yeldeebo kyaare ne Naaŋmen,

² wuluu naŋ kyaare ne suobu deebo yɛlɛ, nuuri paroo yɛlɛ, kuuni leɛ-iruu ane sɛrɛɛdiibu naŋ ba taa baaraa yɛlɛ.

³ A ŋaa ka te na e, ka Naaŋmen wa sage.

⁴ Bonso, yeli ba kyebe ka ba na toɔ̃ e ka meŋɛ leɛbo la leɛ wa banaŋ naŋ da nyɛ a veɛloŋ zie ane a tenvelaa kyɔɔtaa ane a Vooroŋ Soŋ.

⁵ Banaŋ naŋ da woŋ a Naaŋmen yelbiri sonnoŋ noɔ ane a nendaare kaŋ kpeɛ̃õ naŋ waana,

⁶ kyɛ leɛ puori, maŋ la maaleŋ kpaara la a Naaŋmen Bidɔɔ dagaraa zu bamenne naŋ boɔrɔ lɛ zuiŋ, kyɛ eŋnɛ O vi poɔ.

⁷ Teŋɛ na naŋ maŋ nyu saa naŋ miire tuuro taa koɔ̃, ka bombulo buli a maale, a taa tɔnɔ ko banaŋ eŋɛ ba naŋ kɔ a teŋɛ, maŋ nyɛ la maaloo yi Naaŋmen zie.

⁸ Kyɛ ka a teŋɛ wa buli goore ane puluŋ, o ba la taa tɔnɔ, kyɛ o seŋ ne la kaa-emmo. A o baaraa la ka ba nyege o bare.

⁹ Te poyɛŋ noba, aneazaa ka te yelee yɛlɛ a ŋaa, te taa la bambaare ka yɛ taa la yɛlɛ naŋ na ko yɛ faabo.

¹⁰ Bonso, Naaŋmen waa la meŋɛ soba naŋ nyɛrɛ a yɛ tonsonne yɛ naŋ tonɔ korɔ a nensonne ane a nɔmmo yɛ naŋ wuli ba a Naaŋmen zuiŋ aŋa yɛ naŋ naŋ kyɛnɛ erɛ lɛ.

¹¹ Kyɛ te boɔrɔ la ka yɛ yeni yeni zaa eŋ faŋ a lɛ ne o zu, ka yɛ na toɔ̃ taa bambaare teɛretɔroo te ta a baaraa,

¹² ka ka entuo ta wa kpɛ yɛ. Kyɛ yɛ tɔglɔ banaŋ naŋ tu ba yeldeebo ane kannyiri diibu a di a gbandiruŋ na ba naŋ eŋ noɔre ko ba.

A Naaŋmen Noɔre O Naŋ Eŋ

¹³ A Naaŋmen naŋ da eŋ noɔre ko Aboraham, kyɛ ba taa neɛzaa naŋ gaŋ O ka O na pɔ o zuiŋ, O da pɔ ne la O meŋɛ

¹⁴ a yele, “N sereŋ na maale fo la, a e ka fo boorɔ pare yɛlle.”

¹⁵ A Aboraham naŋ pãã da di kannyiri a kyɛlle, o da nyɛ la a noɔre paaloo.

¹⁶ Nensaalba maŋ pɔ la bon naŋ e kpoŋ gaŋ ba, ka a ba noɔre polloo e danseɛ naŋ maŋ e ka nɔkpeɛne zaa ŋmaa.

¹⁷ A lɛ ne o zu, Naaŋmen naŋ da boɔrɔ ka O wuli a gbandiribe weliweli a noɔre O naŋ da eŋ ko ba, ka a ba taa leɛbaroo a O waaloŋ zuiŋ, O da pollɛɛ la,

¹⁸ ka ka a na tu a yɛlɛ ayi naŋ ba taa leɛbaroo zie a wuli ka Naaŋmen koŋ baŋ ŋmaa zirii. Tenee banaŋ naŋ zo te kpɛ O nyuo seŋ ka te nyɛ teɛbo kaŋ a na toɔ̃ de a teɛretɔroo ba naŋ biŋ te niŋesogɔ.

¹⁹ Te taa la a teɛretɔroo ŋa naŋ waa meŋɛ kyɛ waa bon naŋ nyɔge te nyɔvore ka o are kpeɛŋaa ka bonnoo zaa ba kyebe. Teɛretɔroo naŋ maŋ kpɛ a zisoŋ zie a patiisa puori,

²⁰ be la ka Yeezu da de te weɛ te kpɛ a te zuiŋ, O naŋ da leɛ a Naaŋmen bagmaalkare neŋkpoŋ tegitegilɛ, a Mɛlekizɛdɛk tuuluŋ sori poɔ.