Hiburu 4 - Naaŋmen Nɔpaalaa Gane

A Pɛnnoo Na Naaŋmen Naŋ Eŋ Noɔre Ka O Na Tere La

¹ Azuiŋ, a Naaŋmen pɛnnoo poɔ kpeɛbo noɔre O naŋ da eŋ naŋ naŋ kyɛnɛ bebe, yɛ vɛŋ ka te gu temenne velaa ka te kanzaa ta wa kɔŋ o kpeɛbo.

² Serɛzaa, a Ŋmen-yelnoore da wa la te zie aŋa lɛ a naŋ da ta ba lɛ. Kyɛ a yɛlɛ ba naŋ da woŋ da ba yi tɔnɔ ko ba, bonso, ba da ba taa noɔre yeni a yeldeebo poɔ ne a banaŋ naŋ da kyɛlle woŋ.

³ Bonso, a te banaŋ naŋ da sage de maŋ kpɛ la a pɛnnoo na poɔ, aŋa lɛ Naaŋmen naŋ da yeli: “A N suuri poɔ la ka N pɔ yeli, ‘Ba koŋ kpɛ a N pɛnnoo poɔ,’ ” aneazaa ka a o toma da baarɛɛ la a yi a teŋɛ piiluu saŋ.

⁴ Bonso, ŋaa la ka a gansoŋ poɔ zie kaŋ yeli kyaare ne a beri ayopoĩ soba, “Naaŋmen da pɛnnɛɛ la a beri ayopoĩ daare O naŋ da toŋ a O toma baare.”

⁵ Kyɛ O laboreŋ yelee la a zie ŋa, “Ba koŋ kpɛ a N pɛnnoo poɔ.”

⁶ Vuo naŋ pãã da naŋ yuo ko ba mine ka ba na kpɛ a pɛnnoo poɔ, kyɛ a banaŋ naŋ da woŋ a Ŋmen-yelnoore kyɛ da ba toɔ̃ kpɛ ba naŋ da zagre ka ba de zuiŋ,

⁷ O la biŋ la bebiri, (“zenɛ”) a da tu a Davil zie a puoriŋ a yeli a yelbie na O naŋ da daŋ yeli: “A zenɛ, ka yɛnee wa woŋ O kɔkɔre, yɛ ta dare a yɛ sukyie.”

⁸ Bonso, ka Gyosuwa da ko ba pɛnnoo, Naaŋmen da koŋ la yele bebiri kaŋ meŋ yɛlɛ a puoriŋ.

⁹ A lɛ zuiŋ, a pɛnnoo bebiri pɛnnoo naŋ bebe la ko a Naaŋmen noba,

¹⁰ bonso, banaŋ naŋ kpɛ a Naaŋmen pɛnnoo poɔ meŋ maŋ bare la ba toma tommo kyɛ pɛnne aŋa Naaŋmen naŋ da pɛnne lɛ.

¹¹ Azuiŋ, yɛ vɛŋ ka te mɔ te moɔbo zaa a kpɛ a pɛnnoo na poɔ, ka neɛzaa ta wa fããŋ a pɛnnoo ŋa ne a ba noɔre zagroo na tɔ.

¹² Serɛzaa, a Naaŋmen yelbiri voorɔ la kyɛ tonɔ, a dire gaŋ zɔɔzɔɔ-sɔnɔkpara zaa. O maŋ kyɔge kpɛ te ta la zie o naŋ maŋ wɛle a seɛ ane a vooroŋ, a wɛle kɔbɔ naŋ maŋ tɔnne taa benee ne a kɔbɔ poɔ kãã. O maŋ baŋ la nensaala teɛroŋ ane o sukyiri yelboɔre zaa.

¹³ A O niŋesogɔ, bon-iraa zaa kyebe a sɔgle, kyɛ a zaa e la kperaa lɛ a soba na te naŋ na manne a te yel-erre zaa tere niŋesogɔ.

Yeezu, A Naaŋmen Bagmaalkare Neŋkpoŋ Gandaa

¹⁴ A naŋ pãã e ka te taa la Naaŋmen bagmaalkare neŋkpoŋ gandaa na naŋ tu a saluoni poɔ tɔle gaa, a Naaŋmen Bidɔɔ Yeezu, yɛ e ka te nyɔge a te yeldeebo taa kpeɛŋaa.

¹⁵ Bonso, te taa la Naaŋmen bagmaalkare neŋkpoŋ naŋ na toɔ̃ moore ko te a te bambaaloŋ poɔ. Te taa la neɛ na ba naŋ e O nyɛ yelzaa poɔ aŋa tenee, kyɛ ka O ba e yelbieri.

¹⁶ Yɛ e ka te pãã tage ta a garaaseɛ nakogi ne gandaaloŋ, ka ka a lɛ vɛŋ ka te nyɛ nembaalonzoe ane garaaseɛ a te yelboɔre saŋ.