Hiburu 2 - Naaŋmen Nɔpaalaa Gane

Kpããmo Naŋ Kyaare Ne Meŋɛ Guubu

¹ Azuiŋ a ferɛɛ la ka te maaleŋ kyɛlle velaa bon te naŋ da woŋ, ka te ta wa sare yi a poɔ.

² Ka a yɛlɛ naŋ da tu a malekere zie wa da waa yelmeŋɛ, ka faaloŋ zaa bee tookoŋwoŋyɛlɛ deme da nyɛ dɔgroŋ naŋ seŋ ne,

³ wola ka te na baŋ e yi a poɔ ka tenee zagre a faabo kpoŋ ŋa bare? A Daana la da daŋ moɔle a faabo ŋa yɛlɛ, ka a banaŋ naŋ da woŋ a yeli ko te,

⁴ kyɛ ka Naaŋmen meŋ di a danseɛ ne yelwulii ane nɔmaa toma ane yelseɛlɛ tɛɛtɛɛ, ane a Vooroŋ Soŋ kyɔɔtaare O naŋ tere a seŋ O naŋ boɔrɔ lɛ.

A Faabo Sori Wederɛ

⁵ Naaŋmen ba de a nendaare kaŋ teŋɛ yɛlɛ te naŋ yele na eŋ a malekere nuuriŋ.

⁶ Kyɛ neɛ kaŋ da di la danseɛ a gansoŋ poɔ zie kaŋ a yele: “Nensaalba la boŋ ka fo taa ba teɛroŋ lɛ, bee nensaalba biiri la boŋ ka fo taa ba yɛlɛ lɛ?

⁷ Fo da maale ba la ka ba sigi belaa gaŋ a malekere; kyɛ ka fo ko ba puubu ane emmo,

⁸ kyɛ e ka ba di naaloŋ boma zaa zu.” A Naaŋmen naŋ wa de a boma zaa eŋ ba nuuriŋ, bonzaa ba la kyebe O naŋ ba de eŋ ba nuuriŋ. Aŋa a naŋ waa lɛ, te naŋ ba nyɛ ba ka ba di naaloŋ a boma zaa zu sɛre,

⁹ kyɛ te nyɛ la Yeezu, Ona la ka Naaŋmen da sigri bebie belaa lɛ gaŋ a malekere. Kyɛ pampana, Naaŋmen ko O la puubu ane emmo, a dɔgɛɛ kũũ O naŋ kpi zuiŋ ka ka a Naaŋmen garaaseɛ eŋɛ ka O na kpi ko neɛzaa.

¹⁰ A da tu la sori ka Naaŋmen naŋ so a boma zaa kyɛ ka a zaa tu O zie a wa bebe, ka O taa biiri yaga wa ne puubu poɔ. A da ferɛɛ la ka O e ka a soba na naŋ na de ba weɛ e ka ba faabo tori dɔgɛɛ poɔ.

¹¹ Bonso, a soba na naŋ peerɛ yelbebe bara ane banaŋ yelbebe ba naŋ peere bare zaa taa la Saa yeni. A ŋaa zuiŋ la ka Yeezu ba zoro vi ka O boɔle ba O yɔɔmine ane n yɔɔpuuli,

¹² a yele: “N na yeli la fo yɛlɛ ko a N yɔɔmine ane n yɔɔpuuli. N na danne fo la a laŋne deme poɔ.”

¹³ Kyɛ laboreŋ yeli: “N na dɛle O la.” A laboreŋ yeli: “Maa la ŋa ane a bibiiri banaŋ Naaŋmen naŋ ko ma.”

¹⁴ A naŋ waa ka a bibiiri laŋ la nensaala waaloŋ, lɛ la ka a Yeezu meŋ da e nensaala ka ka a O kũũ poɔ, ka O na sãã a soba na naŋ taa a kũũ kpeɛ̃õ, ona la a sebɛlbɛllɛ,

¹⁵ kyɛ faa a banaŋ kũũ dabeɛ̃ naŋ da nyɔge ba biŋ gbaŋgbaaloŋ poɔ ba nyɔvore zaa poɔ.

¹⁶ A e la weliweli ka O da ba wa ka O soŋ malekere, kyɛ a Aboraham boorɔ la ka O da wa ka O soŋ.

¹⁷ A lɛ zuiŋ a da ferɛɛ la ka O waa ŋa a O yɔɔmine ane O yɔɔpuuli yelzaa poɔ, ka ka O na waa Naaŋmen bagmaalkare neŋkpoŋ naŋ taa nembaalonzoe ane yelmennoŋ, ka O maale bagre a nensaalba yelbebe zuiŋ.

¹⁸ A O meŋɛ naŋ da kpɛ enyaabo poɔ a O tuo wommu poɔ zuiŋ, O na toɔ̃ soŋ la banaŋ zaa naŋ kpɛ enyaabo poɔ.