Hiburu 13 - Naaŋmen Nɔpaalaa Gane

Toma Naŋ Pɛllɛ Naaŋmen Poɔ

¹ Yɛ vɛŋ ka nɔmmo naŋ kyɛnɛ be yɛ zie.

² Yɛ ta zagra ka yɛ derɛ saama saanoŋ yɛ yie poore, bonso, a ŋaa poɔ la ka noba mine da de malekere saanoŋ kyɛ da ba baŋ ka malekere la.

³ Yɛ taa banaŋ naŋ be nempagdie poɔ teɛroŋ aŋa yɛ ne ba la laŋ be a nempagdie poɔ. Yɛ taa banaŋ ba naŋ dɔgrɔ teɛroŋ aŋa yɛ meŋ naŋ be a ba dɔgroŋ poɔ.

⁴ Yɛ zaa yɛ taa emmo kyaare ne kultaa kyɛ gu a kultaa sɛŋ ka o ta wa sãã, bonso, Naaŋmen na di la peɛ̃mo toma ane moɔrɔ toma deme sɛrɛɛ.

⁵ Yɛ gu yɛmenne yi libi-nɔŋ eŋɛ, kyɛ vɛŋ ka yɛ niŋe paale ne bon yɛ naŋ taa, bonso, Naaŋmen yelee la, “N daŋ koŋ bare yɛ zaa bee a gyɛ yɛ bare.”

⁶ Lɛnso te na baŋ ŋmɛ la nyaa a yeli: “A Daana la N soŋnɔ; N koŋ zoro dabeɛ̃. Boŋ ka nensaala na baŋ e ma?”

⁷ Yɛ ta inni a yɛ wederebɛ yɛlɛ, a banaŋ naŋ da manne a Naaŋmen yelbiri ko yɛ. Yɛ kaa nyɛ a ba nyɔvoɛ yɛlɛ kyɛ tɔglɔ a ba yeldeebo.

⁸ A Yeezu Kirista waa la lɛ O naŋ waa zããmeŋ, zenɛ kyɛ na waa lɛ tegitegilɛ.

⁹ Yɛ ta vɛŋ ka wulsaama zaa leɛre yɛ teɛroŋ; bonso, a e la soŋ ka garaaseɛ ko a yɛ sukyie faŋ, kyɛ ka a ta e yeldɔlɔ naŋ kyaare ne bondirii naŋ da ba yi tɔnɔ ko banaŋ naŋ da tuuro a.

¹⁰ Te taa la Naaŋmen bagmaalkuuri ka banaŋ naŋ da maŋ maale bagre a sege poɔ ba taa sori ka ba di a o zu.

¹¹ Bonso, a Naaŋmen bagmaalkare neŋkpoŋ da maŋ de la a donne zẽẽ kpɛ ne a Naaŋmen die poɔ ka a waa yelbieri bagre boma, kyɛ yi nyege a donne yeŋ poɔ.

¹² Azuiŋ, a Yeezu meŋ da nyɛ la dɔgɛɛ yeŋ poɔ, a teŋkpoŋ dendɔre noɔre ka O de O meŋɛ zẽẽ pɛge ne a noba ka ba nyɛ sonnoŋ.

¹³ Yɛ e ka te pãã gaa O zie a yeŋ poɔ, a sage de a vi O naŋ da di.

¹⁴ Bonso, te ba taa teŋkpoŋ naŋ na bebe tegitegilɛ a teŋɛzu kyɛ, kyɛ te kyɛllɛ la a teŋkpoŋ na naŋ na wa.

¹⁵ Yɛ e ka te pãã tu a Yeezu zie a maala dannoo bagre korɔ Naaŋmen tegitegilɛ, a lɛ tɛgɛ la, a noɔre yelbie naŋ danna O yuori.

¹⁶ Yɛ ta nagra ka yɛ erɛ velaa kyɛ pono ne noba a boma yɛ naŋ taa, bonso, a bagmaale ama taaba la pɛllɛ Naaŋmen poɔ.

¹⁷ Yɛ sagra yɛ wederebɛ nɔɛ kyɛ sigre yɛmenne korɔ ba, bonso, bana la kaara a yɛ seere zu a na manne bonna zaa yɛ naŋ e. Yɛ vɛŋ ka ba tonɔ a ba toma ne popeɛloŋ kyɛ ka a ta e ne posaanaa; bonso, a lɛ koŋ taa tɔnɔ ko yɛ.

¹⁸ Yɛ puoro korɔ te. Te ba taa bonnoo ka te sukyie ba taa saanaa zaa, a maŋ nɔnɔ ka te erɛ velaa yelzaa poɔ.

¹⁹ N sɔrɔ la yɛ zaa yaga zaa ka yɛ erɛ a ŋaa, ka ka N na toɔ̃ wa yɛ zie wieouŋ.

Maaloo Puoruu

²⁰ Ka a maaroŋ Naaŋmen naŋ da e ka a te Daana Yeezu leɛ yi a kuuni poɔ, a waa a peere pekyee-kpoŋ, a nɔ-eŋnaa naŋ ba taa baaraa zẽẽ,

²¹ e ka yɛ taa bonzaa naŋ soma ka yɛ na toɔ̃ erɛ O poboɔbo yɛlɛ, a tonɔ te poɔ, a erɛ a anaŋ naŋ pɛllɛ O poɔ a Yeezu Kirista eŋɛ. Ona la so puubu tegitegilɛ. Ameena.

Yelteɛbo Ane Yaane Puoro Parebaaraa

²² N yɔɔmine ane n yɔɔpuuli, N sɔrɔ yɛ la, yɛ di kannyiri ne a n yelteɛbo yelbie, bonso ŋmaa ŋmaa lɛ la ka N da sɛge ko yɛ.

²³ N boɔrɔ la ka yɛ baŋ ka ba iri la a te yɔɔ Timoti bare a nempagdie poɔ. Ka o naŋ wa daŋ ne waabo, maa ne o la na wa nyɛ yɛ.

²⁴ Yɛ puori a yɛ wederebɛ zaa ane a nensonne zaa. A banaŋ naŋ yi a Itali teŋɛ puoro yɛ la.

²⁵ Ka a Naaŋmen garaaseɛ be yɛ zaa zie.