Hiburu 11 - Naaŋmen Nɔpaalaa Gane

Yeldeebo Tɛgɛ

¹ Yeldeebo la teɛretɔroo neɛ naŋ taa ka bonnoo zaa ba kyebe ka o na nyɛ la boma o naŋ ba nyɛ kyɛ sage ka a bebe la.

² Serɛzaa, a te sããkommine yeldeebo zuiŋ la ka Naaŋmen poɔ da pɛle ne ba.

³ A yeldeebo zuiŋ la ka te baŋ ka Naaŋmen da iri la a teŋɛ ne O yelbiri. O da iri la a boma zaa te naŋ nyɛrɛ a yi boma te naŋ ba nyɛrɛ zie.

A Abɛl, Enɔke Ane Nowa Yeldeebo Yɛlɛ

⁴ Yeldeebo zuiŋ la ka Abɛl da maale bagre na Naaŋmen poɔ naŋ da pɛle ne a gaŋ a bagre Keein naŋ da maale. A yeldeebo ŋa zuiŋ la ka Naaŋmen da sage de Abɛl ka o e nemmeŋɛ. A Naaŋmen meŋɛ la sage de a Abɛl kyɔɔtaare. A Abɛl da kpie la kyɛ naŋ kyɛnɛ yele yɛlɛ a o yeldeebo zuiŋ.

⁵ Yeldeebo zuiŋ la so ka Enɔke da ba kpi kyɛ ka Naaŋmen da de o do ne tenvelaa. “Ba da ba nyɛ o, bonso, Naaŋmen da de o la gaa ne.” Ba da di la danseɛ ka “Naaŋmen poɔ da pɛle ne o la sɛre” kyɛ ka Naaŋmen da de o gaa ne.

⁶ Ka neɛŋ ba taa yeldeebo o daŋ koŋ baŋ pɛle Naaŋmen poɔ, bonso, neɛzaa naŋ waana O zie, a ferɛɛ la ka o soba sage de ka Naaŋmen bebe la, a maŋ yɔɔ banaŋ naŋ boɔrɔ O yɛlɛ.

⁷ Yeldeebo zuiŋ la ka Nowa da sage de a yɛlɛ Naaŋmen naŋ da yeli kpãã o ka a waana la ka a e kyɛ ka o da ba nyɛ a sɛre. A Nowa da de la a yɛlɛ ne nimizeɛ a maale gbor-kpoŋ a na faa o yideme. A ŋaa zuiŋ, a Nowa da ko la a tendaa saanaa kyɛ da leɛ a mennoŋ gbandiruŋ neɛ a yeldeebo zuiŋ.

A Aboraham Yeldeebo Yɛlɛ

⁸ Yeldeebo zuiŋ la so ka Aboraham da sage a Naaŋmen naŋ da boɔle o yi ne o teŋɛ a e ka o gaa teŋyuo naŋ na e o gbandiruŋ teŋɛ. A Aboraham da yi gɛrɛ la kyɛ da ba baŋ zie o naŋ gɛrɛ.

⁹ A yeldeebo zuiŋ, o da kpɛ la a tensaana na poɔ a Naaŋmen naŋ da eŋ noɔre ka O na ko o la. O da kpeɛrɛ la sigri poore aŋa lɛ Aziki ane Gyekɔb ne o naŋ da e a Naaŋmen nɔ-eŋnaa na ne o zu gbandiribe.

¹⁰ Bonso, a Aboraham da kyɛllɛ la ka o nyɛ a teŋkpoŋ ŋa naŋ taa pare ka ba biŋ, ka Naaŋmen la nare a yiri meɛbo kyɛ la e a mɛmeɛrɛ.

¹¹ Yeldeebo zuiŋ la so ka Aboraham da kore yaga zaa kyɛ da nyɛ faŋ a dɔge bie ne o pɔge Saara naŋ da e pɔg-ɔre, bonso, a Aboraham da sage ka Naaŋmen naŋ eŋ a noɔre waa la yelmeŋɛ soba.

¹² Azuiŋ, a yi neŋyeni ŋa naŋ da kore te tɔgle kũũ zie, ba da dɔge la o boorɔ noba, “ka ba waa yaga aŋa a sazu ŋmarbie ane mane noɔre biiree ba naŋ koŋ baŋ sɔre.”

¹³ A noba bama zaa da be la a yeldeebo poɔ kyɛ te kpi kyɛ da ba nyɛ a yɛlɛ Naaŋmen naŋ da yeli ka O na e ko ba la. Ba da nyɛ a la ba teɛroŋ poɔ ka a be tɔɔre zaa a waana, ka ba tuori de a. Ba da sagɛɛ la ka ba waa la saama ane nɔɔre a teŋɛzu kyɛ.

¹⁴ Bonso, noba naŋ yele yɛlɛ a ŋaa tɔ maŋ wulee weliweli ka ba boɔrɛɛ teŋɛ ba naŋ na kpeɛrɛ.

¹⁵ Ka ba naŋ da naŋ teɛrɛ a teŋɛ ba naŋ bare a ba puoriŋ yɛlɛ, ba da na taa la vuo ka ba leɛ gaa.

¹⁶ Kyɛ lɛ a naŋ waa, ba da boɔrɛɛ teŋɛ naŋ seɛ a onaŋ ba naŋ bare; a tɛgɛ la, tenvelaa deni. Azuiŋ, a ba e vi ko Naaŋmen ka ba boɔle O a ba Naaŋmen. Serɛzaa, Naaŋmen narɛɛ teŋkpoŋ kaŋ bare ba.

¹⁷ Yeldeebo zuiŋ, Naaŋmen naŋ da e a Aboraham nyɛ, o da sage de la a Aziki maale bagre. A Aboraham naŋ da de a noɔre Naaŋmen naŋ da eŋ ko o, o da narɛɛ la ka o de a o bi-yeni tere;

¹⁸ a Aziki yɛlɛ la ka ba da yeli ko o, “A Aziki zie la ka a fo boorɔ na yi.”

¹⁹ A Aboraham da baŋ ka yelmeŋɛ zaa Naaŋmen na baŋ e la ka neɛ leɛ-iri kuuni poɔ; kyɛ yelseŋkpegɛ yeluu poɔ, Naaŋmen da leɛ ko o la a o bie.

²⁰ Yeldeebo zuiŋ la ka Aziki da sɔre maaloo ko Gyekɔb ane Esɔ nendaare kaŋ yɛlɛ.

²¹ Yeldeebo zuiŋ, Gyekɔb naŋ da wa kpiire, “o da ti la o daŋgbale kyɛ suli o zu a puori Naaŋmen a sɔre maaloo ko a Yuzɛb bibiiri yeni yeni zaa.”

²² Yeldeebo zuiŋ, a Yuzɛb nyɔvore baaroo saŋ, o da yeli la a Izerayɛl biiri naŋ da zo yi a Igyipiti teŋɛ poɔ yɛlɛ kyɛ da tere noɔre kyaare ne a o ũũmu yɛlɛ.

A Moozul Yeldeebo Yɛlɛ

²³ Yeldeebo zuiŋ la ka Moozul saa ne o ma da de o sɔgle kyuuri ata, bonso, ba da nyɛ la a bie ka o veɛlɛ; kyɛ ba da ba zoro dabeɛ̃ ne a naa noɔre o naŋ da biŋ.

²⁴ Yeldeebo eŋɛ, a Moozul naŋ da wa baa e kpoŋ, o da ba sage ka ba na boɔle o a Faaro pɔgeyaa bidɔɔ.

²⁵ O da sage ka ba dɔgre o ne a Naaŋmen noba a gaŋ o naŋ na woŋ yelbieri noɔ naŋ ba yaara baaroo.

²⁶ O da nyɛɛ la ka dɔgɛɛ o naŋ na nyɛ a Kirista zuiŋ waa naboma yaga gaŋ a Igyipiti teŋɛ naboma, bonso, o da kyɛllɛ la ka o nyɛ a kyɔɔtaa naŋ be o niŋeŋ waana.

²⁷ Yeldeebo zuiŋ la ka Moozul da zo yi a Igyipiti teŋɛ poɔ, a da ba zoro a naa dabeɛ̃, bonso, a Moozul da nyɔge la o meŋɛ aŋa o naŋ nyɛ neɛ ba naŋ koŋ baŋ nyɛ.

²⁸ Yeldeebo zuiŋ la ka o da maŋ maala a Tɔloo tigri ane a zẽẽ meroo, ka ka a bidɔɔ-dɛndɛnne sããsaana koŋ baŋ tɔ a Izerayɛl bidɔɔ dɛndɛŋ.

A Izerayɛl Bi-gandaare Mine Yeldeebo Yɛlɛ

²⁹ Yeldeebo zuiŋ la ka a Izerayɛl biiri da ŋmaa a Manzeɛ aŋa o naŋ da waa teŋkuoŋaa, kyɛ a Igyipiti noba naŋ da wa boɔrɔ ka ba ŋmaa, a koɔ̃ da di ba la.

³⁰ Yeldeebo zuiŋ la ka a Izerayɛl biiri da kyɛŋ viiri gɔlle a Gyɛreko teŋɛ daŋkyime bebie ayopoĩ, ka a daŋkyime da le.

³¹ Yeldeebo zuiŋ la ka a pɔg-gyɛnterɛ ba naŋ da boɔlɔ Urahabu ne a banaŋ naŋ da zagre a Naaŋmen nɔɛ da ba laŋ wɛ, o naŋ da tuori de a noba na a Izerayɛl biiri naŋ da toŋ ka ba te sɔgle pigri a Gyɛreko teŋɛ nyɛ zuiŋ.

³² N pãã la yeli ka boŋ? Vuo ba kyebe ka N na yeli a Gideon, Barake, Samsen, Gyɛfeta, Davil ane Saamuwɛl ane a Ŋmen-yelmanneba yɛlɛ.

³³ Ba na la da de ba yeldeebo zɔɔtoɔ̃ ne tenne, a e yɛlɛ ne bo-soŋ, a nyɛ boma Naaŋmen naŋ da eŋ noɔre ka O na ko ba la, kyɛ gba gbeŋme nɔɛ.

³⁴ Ba da kpinni la vũũzelɛ bare, ba da ba toɔ̃ iri ba nyɔvoɛ ne zɔɔzɔɔ-soɔ. Ba da nyɛ la kpeɛ̃õ yi ba bambaaloŋ poɔ, a da leɛ gandaare zɔɔre poɔ, a e ka teŋyobo zɔɔzɔɔreba zo.

³⁵ A yeldeebo zuiŋ pɔgeba kuuni da leɛ-iree la. Ba da dɔgre la ba mine, ka ba da zagre ka ba faa ba bare, ka ka ba na toɔ̃ nyɛ kuuni leɛ-iruu naŋ soma gaŋ lɛ.

³⁶ A yeldeebo zuiŋ ba da e la ba mine la, kyɛ feɛ ba, a gba leŋ ba ne banzɔlɔ kyɛ eŋ ba nempagdie poɔ.

³⁷ Ba da za ba la ne kubo ko, a ŋmaare ba ziiri ayi. Ba da ko ba la ne zɔɔzɔɔ-soɔ. Ba da su la pegama ane bogama a yoɔrɔ ne, a waa nandaanema, woore deme, a nyɛ dɔgroŋ.

³⁸ A yeldeebo zuiŋ a tendaa da ba la seŋ ne ba kpeɛbo. Ba da yɔ yoɔrɔ la dalempoore ane tanne zuri ane tanne bogri poore ane teŋɛ bogri poore.

³⁹ Kyɛ a bama zaa, aneazaa ka ba da ko ba la garebanyɛ a ba yeldeebo zuiŋ, ba da ba nyɛ a bon Naaŋmen naŋ da eŋ noɔre ka O na tere la,

⁴⁰ bonso, Naaŋmen da nare la bonkaŋ naŋ soma gaŋ lɛ ka ka ba koŋ baŋ nyɛ sonnoŋ ka ba naŋ ba tu te zie.