Gyud 1 - Naaŋmen Nɔpaalaa Gane

Yaane Puoro

¹ Maa Gyud naŋ e a Yeezu Kirista tontonɔ kyɛ waa Gyimisi yɔɔ la sɛgrɛ a lɛtɛ korɔ a banaŋ a Saa Naaŋmen naŋ boɔle ka ba e O poyɛŋ noba, ka O gu ba taa velaa ko a Yeezu Kirista:

² Ka nembaalonzoe, maaroŋ ane nɔmmo be yɛ zie yaga lɛ.

Bon Naŋ So Ka Ba Sɛge A Lɛtɛ

³ N poyɛŋ noba, n eŋɛ naŋ da kyerɛ ka N nara ka N sɛge a lɛtɛ ko yɛ kyaare ne a faabo te zaa naŋ laŋ, N da nyɛɛ la ka a e feroo ka N sɛge sɔre yɛ ka yɛ zɔɔ a yeldeebo zɔɔre ba naŋ da de eŋ a nensonne nuuriŋ dayenaa ka a baare.

⁴ Bonso, nenfaare mine sɔgle kpɛ la yɛ poɔ, a leɛre a te Naaŋmen garaaseɛ ka o waa nemboŋyɛlɛ, kyɛ ka ba zagre a te Neŋkpoŋ yeni yoŋ ane a te Daana Yeezu Kirista bare. Saŋ zaa ka ba da nare ba biŋ kyɛllɛ ne a saamo ŋa aŋa noba naŋ ba baŋ Naaŋmen.

A Zirii Wulwulibo Sɛrɛɛdiibu Yɛlɛ

⁵ Pampana, N boɔrɔ la ka N leɛ-teɛre yɛ, aneazaa ka yɛ baŋ la yɛlɛ ka a ta, ka a Daana naŋ da faa a noba baare dayenaa lɛ yi a Igyipiti teŋɛ poɔ, kyɛ a lɛ puoriŋ, O da ko la a banaŋ naŋ da ba sage de a O yɛlɛ.

⁶ A malekere na naŋ da ba are a zie Naaŋmen naŋ da ko ba, kyɛ da bare a ba meŋɛ kpeɛbozie, Naaŋmen leŋ ba la biŋ ligruŋ kpoŋ poɔ ne banzɔlɔ tegitegilɛ a kyɛllɛ ne a Bebi-kpoŋ sɛrɛɛdiibu daare.

⁷ A lɛ ne o zu ka Sodom ane Gomora ane a teŋkponni naŋ da peɛle da tonɔ peɛ̃mo toma kyɛ boɔrɔ sɛŋgaabo yɛlɛ naŋ ba tu sori aŋa a malekere bama. Ba da nyɛ la dɔgroŋ ne vũũ naŋ ba taa kpinnuu ka a e mannoo ko a noba zaa.

⁸ Kyɛ a lɛ ne o zu la ka a zanzannema bama mɔgrɔ bamenne ne dɛgre, a zagra ba nembɛrɛ wuluu kyɛ saana a banaŋ naŋ taa gyeremɛ yoe.

⁹ Kyɛ a maleke kpoŋ Mikɛl naŋ da zɔɔ ne a sebɛlbɛllɛ kyɛ ka ba da ŋmɛ nɔkpeɛne a Moozul eŋgane yɛlɛ, a Mikɛl da ba sage de yosãã yelzaa dɔgle o, kyɛ o da yelee la, “A Daana na dɔgre fo la!”

¹⁰ Kyɛ a noba bama eŋ maŋ sãã la bonzaa yuori ba naŋ ba baŋ o tɛgɛ, kyɛ ka a yɛlɛ ama maŋ sãã ba bare aŋa donne naŋ ba taa teɛrɛ, kyɛ maŋ baŋ yɛlɛ ne a zomɔ.

¹¹ Ba yuori la we! Bonso, ba tu la a Keein sori na, a bare bamenne ko Balaam tuluu tɔnɔ ba naŋ boɔrɔ zuiŋ. Ba wɛ la a Koora koŋwoŋwuluu poɔ.

¹² A bama waa la nendɛgɛ naŋ maŋ be a yɛ nɔmmo tige ziiri, a maŋ laŋ dire ne yɛ kyɛ ba zoro dabeɛ̃, a guolo bamenne. Ba waa la sagama naŋ ba taa koɔ̃ ka saseɛ fuuro a gɛrɛ ne, a waa ŋa teere naŋ ba wɔnɔ kpankyaane saŋ, a kpi a zaa ka ba tu a lɔɔ bare.

¹³ Ba waa ŋa mane kɔmmie naŋ dɔɔnɔ, ka ba vi waa ŋa koɔ̃ fofoore naŋ foorɔ. Ba waa ŋa ŋmarbie naŋ yɔ dara a ba taa zie a naŋ gɛrɛ. Ba eŋɛ la ka ba bare a lige naŋ e zuluŋ kpoŋ tegitegilɛ.

¹⁴ A noba bama yɛlɛ la ka Enɔke naŋ waa a sããkommine dɔge-tu-taa bayopoi soba naŋ yi Adama puoriŋ da yeli Ŋmen-yelmanna yelyelii a yele, “Yɛ nyɛ, a Daana taa la O nensonne turi pie waana ne,

¹⁵ ka O wa di a noba zaa sɛrɛɛ. O na ko la neɛzaa eroŋ naŋ ba tu Naaŋmen puoruu sori ane a yelfaare na zaa a yelbe-erebɛ naŋ da yele saanaa ne a Daana yuori.”

¹⁶ Ba waa la noba naŋ ŋmoonɔ yɛlɛ, a waa noba naŋ taa posaanaa, kyɛ maŋ tuuro bamenne vɔlfaare; a maŋ yele yelbɛrɛ, a puuro noba ne nɔnoɔ ka ba toɔ̃ nyɛ ba yelboɔre.

Kpããmo Ane Yelteɛbo

¹⁷ Kyɛ yɛnee, n poyɛŋ noba, yɛ leɛ-teɛre a yɛlɛ a te Daana Yeezu Kirista apostoliimine naŋ da daŋ yeli;

¹⁸ bonso, ba da yeli ko yɛ la, “A bebi-baare saŋ, noba na yi la a erɛ yɛ laara, a waa noba naŋ na tuuro bamenne vɔlfaare.”

¹⁹ A teŋɛzu noba bama naŋ ba taa a Vooroŋ Soŋ la waana ne wɛltaa.

²⁰ Kyɛ yɛnee, n poyɛŋ noba, yɛ baara duoro a yɛ yeldeebo ŋa naŋ e soŋ poɔ. Yɛ puoro a Vooroŋ Soŋ poɔ;

²¹ yɛ be a Naaŋmen nɔmmo poɔ; yɛ kyɛllɛ a te Daana Yeezu Kirista nembaalonzoe ka O taa yɛ gaa ne a nyɔvo-babaaraa poɔ.

²² Yɛ taa nembaalonzoe ne a banaŋ naŋ ba are kpeɛŋaa.

²³ Yɛ vaa ba mine yi vũũ poɔ a faa ba; kyɛ yɛ taa nembaaloŋ ba mine eŋɛ ne dabeɛ̃, a gba kyiiri ba bonsuuri naŋ e ka ba mɔge dɛgre.

Naaŋmen Maaloo

²⁴ Ka a soba na naŋ toɔ̃ gu yɛ taa ka yɛ ta le, kyɛ e ka yɛ are O puubu niŋesogɔ ne popeɛloŋ a ba taa faaloŋ zaa,

²⁵ ka a Naaŋmen yeni, a te Faara tu a te Daana Yeezu Kirista zie nyɛ puubu, gandaaloŋ, kpeɛ̃õ ane naaloŋ wagre zaa, pampana ane tegitegilɛ. Ameena.