Gyimisi 5 - Naaŋmen Nɔpaalaa Gane

Ba Naŋ Kpãã Bondaanema

¹ Pampana, yɛ kyɛlle woŋ, yɛnee bondaanema. Yɛ kono kyɛ ŋmeɛrɛ kpɛlle, a woore naŋ waana yɛ zie zuiŋ.

² A yɛ bondaaboma poɔ̃ɛ la, kyɛ ka yɔg-bie moge a yɛ bonsuuri.

³ A yɛ salema ane seleva le la zoɔ̃, ka a lɛ na e danseɛ kyaare ne yɛ saanaa, kyɛ di yɛ eŋgama aŋa vũũ. Yɛ biŋ la naboma gu ne a bebi-baare saŋ.

⁴ Yɛ kyɛlle woŋ! A tontonema naŋ kɔ a yɛ wɛre san-yɔɔ yɛ naŋ mɔŋ, a yɛ finnuu yɛlɛ zuiŋ ŋmeɛrɛ la kpɛlle ka a kpɛlle a yɛ wɛre bonderebɛ naŋ ŋmeɛrɛ kpɛ a boma zaa Daana tobo.

⁵ Yɛ da be la noɔ ane bondaanoŋ poɔ a teŋɛzu; a di kpɛ bɛroŋ aŋa doŋɔ kyɛllɛ ne a koobo bebiri.

⁶ Yɛ da ko la a nemmeŋɛ saanaa kyɛ nyɔge o ko, kyɛ o ba e yelzaa.

Kannyiri Diibu Dɔgɛɛ Poɔ

⁷ Azuiŋ, N poyɛŋ noba, yɛ di kannyiri te ta a Daana waabo daare. A koɔraa maŋ di la kannyiri kyɛ kyɛllɛ a o weɛ boma ka a seɛ̃kpɛpaalaa saa ane a valeŋvuuluŋ saa mi.

⁸ A ferɛɛ la ka yɛ meŋ dire kannyiri. Yɛ nyɔge yɛmenne, bonso, a Daana waabo tara la.

⁹ N poyɛŋ noba, yɛ ta ŋmoonɔ yɛlɛ ne taa ka ba ta wa di yɛ sɛrɛɛ. Yɛ nyɛ, a sɛredire are la a dendɔɛ eŋɛ!

¹⁰ N poyɛŋ noba, yɛ de a dɔgɛɛ ane a kannyiri a Ŋmen-yelmanneba naŋ da di ba naŋ da yeli yɛlɛ a Daana yuori eŋɛ, ka a e yelwulaa yɛ zie.

¹¹ Serɛzaa, banaŋ naŋ di kannyiri te maŋ yeli ka ba nyɛ la maaloo. Yɛ da woŋ la a Gyɔb kannyiri diibu yɛlɛ kyɛ da nyɛ lɛ a Daana yɛlɛ naŋ waa, O nyonono ane O nembaalonzoe.

¹² A gaŋ a zaa, n poyɛŋ noba, yɛ ta pɔ sazu bee a teŋɛ, bee a pɔ bonzaa, bee a pɔ poɔre zaa. Kyɛ yɛ vɛŋ ka yɛ “Õõ” waa õõ, ka yɛ “Ai” waa ai, ka yɛ ta wa le sɛrɛɛ poɔ.

Yeldeebo Puoruu

¹³ Neɛ be la yɛ poɔ a be tuo poɔ be? A soba o puori. Neɛ be la yɛ poɔ a kyellɛ be? A soba o yieli puubu yieluŋ.

¹⁴ Ka neɛŋ wa be yɛ poɔ a beɛrɛ, a soba boɔle a puoruu laŋne nembɛrɛ ka ba wa puori ko o, a sɔ o kããsoŋ a Daana yuori eŋɛ.

¹⁵ A yeldeebo puoruu na faa la a baala, ka a Daana e ka o leɛ-iri, kyɛ ka kanzaa wa e yelbebe a Daana na di la suuri ko o.

¹⁶ Azuiŋ, yɛ kyiiri yɛ yelbebe ko taa, kyɛ puoro korɔ taa, ka ka yɛ na nyɛ sammo. A nemmeŋɛ puoruu taa la kpeɛ̃õ naŋ tonɔ yaga.

¹⁷ Elaagya da waa la nensaala aŋa tenee, kyɛ o da puori la nimizeɛ zaa ka ka saa na ta mi, ka a saa da ba mi yuomo ata ane kyuuri ayoɔbo a teŋɛzu.

¹⁸ A lɛ puoriŋ la ka o da laboreŋ puori ka a saluoni tere saa ka a teŋɛ bombulo maale.

¹⁹ N yɔɔmine ane n yɔɔpuuli, ka yɛ poɔ neɛ kanzaa wa bɔre yi a yelmeŋɛ sori poɔ, ka yɛ kaŋ wa taa o leɛ wa ne,

²⁰ a soba baŋ ka neɛ na zaa naŋ taa a yelbe-erɛ yi ne a o bɔroo poɔ leɛ wa ne, na faa la a yelbe-erɛ seɛ yi ne kũũ poɔ kyɛ e ka yelbebe yaga nyɛ sudi.