Gyimisi 4 - Naaŋmen Nɔpaalaa Gane

Neɛ Naŋ Nyɔge Baaloŋ Ne A Teŋɛzu

¹ A zɔɔre ane a yelbawontaa naŋ be a yɛ poɔ, yeŋ la ka a maŋ yi wa? A ba yi a vɔlfaare na naŋ be yɛ pooreŋ a zɔɔrɔ ne yɛ zie be?

² Yɛ maŋ boɔrɔ la bonkaŋ, kyɛ ba nyɛ o; lɛnso ka yɛ maŋ ko kyɛ na nyɛ. Yɛ maŋ zɛnzɛnɛ la bonkaŋ eŋɛ kyɛ koŋ baŋ nyɛ o; lɛnso ka yɛ maŋ ŋmeɛrɛ taa nɔkpeɛne, a zɔɔrɔ taa. Yɛ naŋ ba sɔre la so ka yɛ ba taa.

³ Yɛ maŋ sɔre la kyɛ ba nyɛ, bonso, yɛ ba maŋ sɔre ne teɛroŋ velaa. Yɛ maŋ sɔre la ka yɛ de a boma woŋ ne noɔ.

⁴ Yɛnee peɛ̃peɛ̃ toma deme ŋa! Yɛ ba baŋ ka neɛ naŋ nyɔge baaloŋ ne a teŋɛzu deme waa la Naaŋmen dɔndɔmɔ be? Azuiŋ, neɛ na zaa naŋ boɔrɔ ka o nyɔge baaloŋ ne a teŋɛzu deme maŋ leɛ la Naaŋmen dɔndɔmɔ.

⁵ A gansoŋ da yelee la, “Naaŋmen taa la a vooroŋ O naŋ e ka o kpeɛrɛ te poɔ yɛlɛ yaga zaa,” yɛ teɛre ka a gansoŋ naŋ da yeli a lɛ waa la weɛlɛ be?

⁶ Kyɛ Naaŋmen maŋ tere la a O garaaseɛ yaga; a lɛ zuiŋ la ka O yeli: “Naaŋmen kyiiri la a pɔloo deme, kyɛ maŋ ko Sigruumilluu deme garaaseɛ.”

⁷ Azuiŋ, yɛ sigre yɛmenne korɔ Naaŋmen. Yɛ kyaare a sebɛlbɛllɛ ne nyaa, o na zo yi la yɛ zie.

⁸ Yɛ tage peɛle Naaŋmen, O na tage peɛle yɛ la. Yɛ pɛge yɛ nuuri, yɛnee yelbebe deme kyɛ pɛge a yɛ sukyie ka a veɛlɛ, yɛnee teɛroŋ-kpara deme.

⁹ Yɛ taa posaanaa, a kono kyɛ ŋmaara nentaŋ. Yɛ vɛŋ ka a yɛ laare leɛ konni kyɛ ka yɛ popeɛloŋ leɛ posaanaa.

¹⁰ Yɛ sigri yɛmenne a Daana niŋesogɔ, kyɛ O na zɛge yɛ la ka yɛ do.

Kpããmo Naŋ Kyaare Ne Taaba Sɛrɛɛdiibu

¹¹ N yɔɔmine ane n yɔɔpuuli, yɛ ta yele yelfaare korɔ taa. Soba na zaa naŋ yeli yelfaa kyaare ne o tɔsoba bee a di o tɔsoba sɛrɛɛ, o soba yeli la yelfaa kyaare ne a bege kyɛ di a bege sɛrɛɛ. Kyɛ ka yɛnee wa di a bege sɛrɛɛ, yɛ ba waa noba naŋ tuuro a bege kyɛ yɛ dire la a bege sɛrɛɛ.

¹² Neŋyeni la bebe a e a beg-terɛ ane a sɛredire. Ona la na toɔ̃ faa kyɛ la sãã. Azuiŋ, yɛnee pãã la ammine a na di yɛ taaba sɛrɛɛ?

Ta Ŋmeɛrɛ Nyaa Kyaare Ne Bieu Yɛlɛ

¹³ Yɛ wa pampana ŋa, yɛnee naŋ yeli, “Zenɛ bee bieu, te na gaa la teŋɛ ŋa a te kpeɛrɛ be yuoni gbuli, a yɛrɛ yɛroŋ a nyɛrɛ libie.”

¹⁴ Kyɛ yɛ gba ba baŋ lɛ bieu naŋ na waa. Wola ka a yɛ nyɔvoɛ na waa bieu? Bonso, yɛ nyɔvoɛ waa ŋa uli naŋ maŋ le kyɛ ka belaa wa poɔ ka a moore gaa.

¹⁵ A da seŋ ka yɛ maŋ yeli, “Ka a naŋ wa e a Daana poboɔbo ka te naŋ voorɔ, te na e la yeli ŋa bee yeli ŋa.”

¹⁶ Kyɛ lɛ a naŋ waa, yɛ wullo la yɛmenne a erɛ pɔloo, kyɛ a pɔloo eebo ŋa e la yelfaa.

¹⁷ Neɛ na zaa naŋ pãã baŋ yeli naŋ soma ka a seŋ ka o e, kyɛ ba e, a soba e la yelbieri.