Gyimisi 3 - Naaŋmen Nɔpaalaa Gane

A Zele Bantaabo Yɛlɛ

¹ N yɔɔmine ane n yɔɔpuuli, a ba seŋ ka yɛ yaga zie boɔrɔ ka yɛ waa wulwulibo, bonso, yɛ baŋ ka te banaŋ naŋ waa wulwulibo sɛrɛɛ la ka ba na di yaga gaŋ a noba zaa.

² Gbɛɛ yaga ka te zaa maŋ ŋmɛ gbɛɛ. Neɛ na zaa naŋ ba maŋ ŋmɛ gbɛre o yɛlɛ yeluu poɔ waa la nemmeŋɛ, a na toɔ̃ taa o nyɔvore velaa ne o noɔre bantaabo.

³ Ka tenee maŋ wa de nɔ-bɔnne eŋ wie nɔɛ a na e ka a e lɛ te naŋ boɔrɔ, te maŋ toɔ̃ goɔ la a enne zaa ka a tu lɛ te naŋ boɔrɔ.

⁴ Bee, yɛ kaa nyɛ a mane poɔ gboe: aneazaa ka a waa la bɛrɛ ka sasekpoŋ naŋ fuuro la maŋ toɔ̃ daara a gɛrɛ ne, kyɛ bombile kaŋ la ka a gbor-mɔnneba maŋ de mɔnɔ ne a gbori a maŋ e ka o tu benee ba naŋ boɔrɔ.

⁵ A lɛ meŋ la ka zele waa a eŋɛ zibile kaŋ kyɛ maŋ toɔ̃ wullo o meŋɛ ne yelbɛrɛ o naŋ toŋ. Yɛ nyɛ lɛ vũũ belaa naŋ maŋ toɔ̃ nyɔge wɛgyɛŋ kpoŋ ka o zaa di!

⁶ A zele waa la vũũ. A zele waa ŋa a teŋɛzu faaloŋ naŋ be a te endaa poɔ. O maŋ e la ka a eŋɛ zaa mɔge dɛgre, a kyɔŋ vũũ eŋ a o waaloŋ zaa ka o dire, kyɛ kyɔŋ vũũ eŋ o meŋɛ a dazugovũũ poɔ.

⁷ Wɛdomboorɔ zaa ane bon-ɛgre, bonvuuri ane mane poɔ bonvoba zaa ka nensaala maŋ toɔ̃ pɔgle,

⁸ kyɛ neɛzaa kontoɔ̃ pɔgle a zele; o waa la faa te zuo, a paale ne logi tuo.

⁹ Te maŋ de o la danne ne a Daana te Saa, kyɛ la de o kaa-eŋ banaŋ ba naŋ iri ka ba taa a Naaŋmen waaloŋ.

¹⁰ A noɔre ŋa ne o zu poɔ la ka dannoo ane kaa-emmo maŋ yi. N yɔɔmine ane n yɔɔpuuli, a da ba seŋ ka a waa lɛ.

¹¹ Kɔnnoɔ ane kɔŋtuo na toɔ̃ laŋ yire la bulnimi-yeni poɔ be?

¹² N yɔɔmine ane n yɔɔpuuli, kaŋkanteɛ na toɔ̃ wɔŋ la kããteɛ wɔmɔ, bee ka zemberemɛ wɔŋ kaŋkan-wɔmɔ be? Lɛ meŋ la ka nyɛnnoo koɔ̃ kontoɔ̃ leɛ kɔnnoɔ.

Yɛŋ Parɛɛ Ayi

¹³ Aŋ la taa yɛŋ kyɛ baŋ yɛlɛ tɛgɛ yɛ poɔ? A soba o tu a o yelveɛle zie a wuli ka o tonɔ la a o tonveɛle ne Sigruumilluu ne yɛŋ.

¹⁴ Kyɛ ka yɛnee wa taa potu-nyuuri ane meŋɛ-yoŋ boɔbo yɛlɛ yɛ sukyie poore, yɛ ta wullo yɛmenne kyɛ ŋmaara zirii pɔgrɔ a yelmeŋɛ.

¹⁵ A yɛŋ ŋa tɔ ba yi Naaŋmen zie sigi wa, kyɛ o waa la teŋɛzu yɛŋ, a waa nensaaloŋ ane a sebɛlbɛllɛ yɛŋ.

¹⁶ Bonso, benee nyuuri ane meŋɛ-yoŋ boɔbo yɛlɛ naŋ be, be la ka dɔɔne ane yelfa-boorɔ zaa maŋ be.

¹⁷ Kyɛ yɛŋ naŋ yi Naaŋmen zie maŋ daŋ e la soŋ, a pãã terɛ maaroŋ, a e baaloŋ lɛ, a nare ka o sagra noɔre, a paale ne nembaalonzoe ane tonveɛle, ka nɔmboore bee bampuori-kombampoɔ yɛlɛ zaa ba kyebe.

¹⁸ Banaŋ naŋ erɛ yɛlɛ naŋ waana ne maaroŋ maŋ bore la maaroŋ, a de mennoŋ boma.