Gyimisi 2 - Naaŋmen Nɔpaalaa Gane

Kpããmo Kyaare Ne Nɔmboore

¹ N yɔɔmine ane n yɔɔpuuli, yɛ naŋ erɛ nɔmboore a yɛ yel-erre poɔ, yɛ na toɔ̃ yeli ka yɛ sage de la a te Daana Yeezu Kirista naŋ waa a puubu soba yɛlɛ be?

² Bonso, ka neɛ wa eŋ salema fentere kyɛ su bonveɛle a wa kpɛ yɛ puoruu lammo poɔ, ka nandaana meŋ su bondɛgɛ wa ne,

³ ka yɛ kaa nyɛ a soba na naŋ su a bonveɛle na zie kyɛ yeli, “N ba, wa zeŋ kogi ŋa zu kyɛ,” kyɛ yeli ko a nandaana, “Dɔɔ, naŋ are be,” bee, “Wa zeŋ teŋɛ.”

⁴ Yɛ ba nyɛ ka yɛ ogro la taa kyɛ dire taa sɛrɛɛ ne teɛroŋ faare be?

⁵ N yɔɔmine ane n yɔɔpuuli N naŋ nɔŋ, yɛ kyɛlle woŋ. Naaŋmen mɔɔ naane kaa-iri a nandaanema a teŋɛzu a e ka ba taa yeldeebo bondaanoŋ, kyɛ waa a naaloŋ na O naŋ da eŋ noɔre ka O na ko la banaŋ naŋ nɔnɔ O gbandiribe be?

⁶ Kyɛ yɛ ba ko a nandaanema gyeremɛ. A bondaanema naane maŋ dɔgrɔ yɛ be? Bana naane maŋ tagra yɛ gɛrɛ ne a sɛrɛɛdiibu zie be?

⁷ Bana naane maŋ saana a yovelaa na Naaŋmen naŋ ko yɛ be?

⁸ Ka yɛnee wa sereŋ sagra a Naaŋmen bege a seŋ a gansoŋ naŋ yeli, “Nɔŋ fo tɔsoba a seŋ lɛ fo naŋ nɔŋ fo meŋɛ,” yɛ mɔɛ la.

⁹ Kyɛ ka yɛnee wa erɛ nɔmboore yɛ e la yelbieri, ka a bege wuli yɛ saanaa ka yɛ waa la noba naŋ zagre ka yɛ sagra a bege.

¹⁰ Bonso, soba na zaa naŋ tuuro a begɛ zaa kyɛ sãã a bege lambori kaŋ, a soba sãã la a begɛ zaa.

¹¹ A soba na naŋ yeli, “Ta toŋ moɔrɔ toma,” O ne o zu la yeli, “Ta ko neɛ.” Ka fõõ ba toŋ moɔrɔ toma kyɛ wa ko neɛ, fo sãã la a bege.

¹² A lɛ zuiŋ, yɛ maŋ yeli kyɛ e meŋ aŋa noba ba naŋ na di ba sɛrɛɛ ne a meŋɛ-soobo bege.

¹³ Bonso, a sɛrɛɛdiibu poɔ, nembaaloŋ zoobu koŋ kyebe ko neɛ na zaa naŋ ba zo nembaaloŋ; kyɛ nembaaloŋ zoobu maŋ toɔ̃ la sɛrɛɛdiibu.

Yeldeebo Naŋ Ba Taa Tontonne Waa La Yeldeebo Naŋ Kpi

¹⁴ N yɔɔmine ane n yɔɔpuuli, ka neɛ wa yeli ka o taa la yeldeebo kyɛ ka a ba wuli a o yel-erre poɔ, boŋ tɔnɔ ka a taa? A yeldeebo na toɔ̃ faa fo la be?

¹⁵ Ka yɛ yɔɔ bee yɔɔpuulee kaŋ ba taa bonsuuri na su ane o bebiri zaa bondirii na di,

¹⁶ ka yɛ kaŋ yeli ko ba, “Ka a waa yɛ velaa, ka ɔɔre ta kpeɛrɛ yɛ, kyɛ ka yɛ dire tegrɛ,” kyɛ ba ko ba a ba bomboɔre, boŋ tɔnɔ ka a taa?

¹⁷ Azuiŋ, ka yeldeebo ba wa tonɔ tonveɛle, a wuli ka o kpie la.

¹⁸ Kyɛ neɛ kaŋ na toɔ̃ yeli la, “Fo taa la yeldeebo kyɛ ka N taa tonveɛle.” Wuli ma a fo yeldeebo naŋ ba taa tonveɛle, kyɛ ka N meŋ tu a n tonveɛle zie wuli fo a n yeldeebo.

¹⁹ Yɛ sage deɛ la ka Naaŋmen e la yeni; yɛ mɔɛ la. A sefaare meŋ gba sage deɛ la; a zoro dabeɛ̃ kyɛ miine.

²⁰ Yɛnee dambolo ŋa, yɛ mɔɔ boɔrɔ la ka ba wuli yɛ ka yeldeebo naŋ ba tonɔ tonveɛle waa la zaglaa be?

²¹ A te sããkoma Aboraham tonveɛle eŋɛ naane ka o da leɛ nemmeŋɛ, o naŋ da de a o bidɔɔ Aziki maale ne bagre a bagmaalkuuri zu be?

²² Fo nyɛɛ la ka Aboraham yeldeebo da laŋ tonɔ ne la a o toma, ka a toma wuli ka a yeldeebo waa la meŋɛ.

²³ A pãã da tu la a lɛ a gansoŋ naŋ da yeli, “Aboraham da sage de la Naaŋmen yɛlɛ ka O da de o ka o e nemmeŋɛ,” ka ba da boɔle o Naaŋmen ba.

²⁴ Yɛ nyɛɛ la ka neɛ tontonne la maŋ vɛŋ ka o e nemmeŋɛ kyɛ a ba e o yeldeebo yoŋ.

²⁵ A lɛ meŋ ne o zu naane ka ba da e a pɔg-gyɛnterɛ Urahabu ka o waa nemmeŋɛ a o tontonne zuiŋ, o naŋ da de a Izerayɛl biiri ba naŋ da toŋ saanoŋ kyɛ e ka ba tu sobi-yuo yi zo gaa be?

²⁶ Aŋa lɛ eŋɛ naŋ ba taa vooroŋ naŋ maŋ leɛ kũũ, lɛ meŋ ka yeldeebo naŋ ba taa toma maŋ e kũũ.