Galesiya 6 - Naaŋmen Nɔpaalaa Gane

Yɛ Soŋnɔ Taa Yɛ Toɔrɔ Poɔ

¹ N bamine, ka ba naŋ wa nyɔge yɛ kanzaa yelfaa poɔ, yɛ banaŋ naŋ taa a Vooroŋ Soŋ, yɛ maale a neɛ ŋa tɔ ne sumaaroŋ ka o leɛ are. Kyɛ yɛ gu yɛmenne velaa ka yɛ tɔɔ wa kpɛ enyaabo poɔ.

² Yɛ soŋnɔ taa yɛ toɔrɔ poɔ, a lɛ eebo poɔ yɛ na tuuro la a Kirista bege.

³ Bonso, ka a banaŋ naŋ ba waa bonzaa kyɛ teɛrɛ ka ba waa la bonkaŋ, bɛllɛ la bamenne.

⁴ A ferɛɛ la ka kanzaa tegre o meŋɛ toma nyɛ, ka a toma wa soma o pãã na toɔ̃ wullo la o meŋɛ ne a o toma a gaŋ ka o wullo o meŋɛ ne o taaba toma.

⁵ Bonso, a ferɛɛ la ka neɛzaa tuo o meŋɛ tuobu.

⁶ A banaŋ ba naŋ kanne a Naaŋmen yelbiri, a ferɛɛ la ka ba maŋ soŋnɔ a ba wulwullo ne ba bonsonne zaa ba naŋ taa.

⁷ Yɛ ta vɛŋ ka ba bɛlle yɛ; Naaŋmen ba e neɛ ba naŋ na erɛ laara, bonso, bonna zaa neɛ naŋ bore la ka o na kyɛ.

⁸ Ka neɛŋ bore o meŋɛ eŋgane yelboɔre, o na kyɛ la sããmo yi a eŋgane zie; kyɛ ka neɛŋ wa bore a Vooroŋ Soŋ yelboɔre o na kyɛ la nyɔvore naŋ ba taa baaroo a yi a Vooroŋ Soŋ zie.

⁹ Azuiŋ, yɛ ta vɛŋ ka te nuuri yoɔre ne tonsonne tommo, ka te nuuriŋ ba yoɔre, te na kyɛ la a boma a kyeɛbo saŋ.

¹⁰ A lɛ zuiŋ, saŋ na zaa te naŋ maŋ wa taa a vuo, yɛ vɛŋ ka te erɛ soŋ a korɔ noba zaa, a maaleŋ gaŋ a zaa, a erɛ soŋ korɔ te taaba naŋ e yelderebɛ.

Kpãã Parebaaraa Ane Naaŋmen Maaloo

¹¹ Yɛ nyɛ lɛ N naŋ maŋ sɛge a sɛgebie ka a waa bɛrɛ ka maa wa sɛgrɛ ne n meŋɛ nu!

¹² A banaŋ naŋ boɔrɔ yuori a nensaaloŋ poɔ la ferɛ yɛ ka yɛ iri a yɛ dɛgre; kyɛ ba erɛ la a lɛ ka ba na ta wa dɔgre ba a Kirista dagaraa zuiŋ.

¹³ Haali a banaŋ ba naŋ iri ba dɛgre ba tuuro a bege, kyɛ ba boɔrɔ la ka yɛ iri yɛ dɛgre ka a na e yo-iri ko ba nensaaloŋ poɔ.

¹⁴ Maa eŋ daŋ koŋ e pɔloo yelzaa eŋɛ ka a te Daana Yeezu Kirista dagaraa yoŋ eŋɛ naane. O zuiŋ la ka ba kpa a andonɛɛ n nyɔvore poɔ kyɛ kpa n meŋ a andonɛɛ zie

¹⁵ Bonso, dɛgre iruu bee dɛgre ba-iruu ba poɔ yelzaa poɔ, kyɛ ba maale la yelzaa ka a e paalaa.

¹⁶ Kyɛ a banaŋ naŋ na tuuro a wuluu ŋa eŋ; ka maaroŋ ane nembaalonzoe be ba zie, kyɛ be a Naaŋmen noba Izerayɛl deme zie.

¹⁷ A yi pampana kyɛ gɛrɛ, yɛ kanzaa ta bɔ yeli ko ma; bonso, N taa la a Kirista ŋmaaroŋ naŋ wuli ka Ona la so ma.

¹⁸ N yɔɔmine ane n yɔɔpuuli, ka a te Daana Yeezu Kirista garaaseɛ be yɛ seere poɔ. Ameena.