Galesiya 5 - Naaŋmen Nɔpaalaa Gane

¹ Temenne soobo la so ka a Kirista faa te. Azuiŋ yɛ are kpeɛŋaa a ta la wa derɛ a gbaŋgbaaloŋ gbogli eŋnɛ.

Lɛ A Kiristabiiri Meŋɛ Soobo Naŋ Waa

² Yɛ kyɛlle woŋ! Maa Pɔɔl, N yele korɔ yɛ la ka ka yɛnee vɛŋ ka ba iri yɛ dɛgre, ka lɛ a Kirista koŋ taa tɔnɔ ko yɛ.

³ N laboreŋ yele korɔ la dɔɔ zaa naŋ vɛŋ ka ba iri o dɛgre ka a e la feroo ka o tuuro a bege zaa.

⁴ Yɛnee banaŋ naŋ boɔrɔ ka yɛ nyɛ sonnoŋ yi a bege zie ŋmaa la yɛmenne yi a Kirista zie; yɛ faa lee la a yi a garaaseɛ poɔ.

⁵ Bonso, te naŋ taa yeldeebo a yi a Vooroŋ Soŋ zie, te taa la teɛretɔroo a kyɛllɛ ka te na nyɛ la mennoŋ.

⁶ Bonso a Kirista Yeezu poɔ, dɛgre iruu bee dɛgre ba-iruu ba poɔ yeli zaa poɔ; yeli yoŋ naŋ poɔ yɛlɛ poɔ la yeldeebo naŋ tonɔ toma ne nɔmmo.

⁷ Yɛ da zoro la velaa zaa; nembuo la pigi yɛ sori ka yɛ ta sage de a yelmeŋɛ?

⁸ A mɔgloo ŋa tɔ ba yi a soba na naŋ boɔle yɛ zie.

⁹ Dããbilɛ belaa maŋ vɛŋ la ka a zɔŋ zaa iri pi.

¹⁰ N na baŋ ŋmɛ la nyaa yɛ yɛlɛ a Daana eŋɛ ka yɛ koŋ taa teɛroŋ yuo zaa. Kyɛ neɛ na zaa naŋ la eŋnɛ yɛ buriburi poɔ na nyɛ la o san-yɔɔ.

¹¹ Kyɛ n bamine, bonso ka ba naŋ kyɛnɛ dɔgrɔ ma, ka maa naŋ kyɛnɛ moɔlɔ a dɛgre iruu yɛlɛ? A lɛ wuli ka ba iri la a dagaraa naŋ e saanaa bon bare.

¹² N poboɔbo da la ka a banaŋ naŋ dɔɔnɔ yɛ da vare bamenne!

¹³ N yɔɔmine ane n yɔɔpuuli, ba da boɔle yɛ la eŋ meŋɛ soobo poɔ; kyɛ yɛ ta vɛŋ ka a yɛ meŋɛ soobo ŋa leɛ ennoɔ yoŋ bon, kyɛ nɔmmo zuiŋ yɛ waa gbaŋgbaare ko taa.

¹⁴ Bonso, a bege zaa laŋ la taa a kpulli waa nɔyenaa, “Nɔŋ fo tɔsoba aŋa fo meŋɛ.”

¹⁵ Kyɛ ka yɛneŋ wa donɔ taa, a nyɔgrɔ taa vɔlɔ, yɛ gu velaa a ta wa sãã taa bare.

A Eŋgane Tontonne

¹⁶ N yele korɔ yɛ la, yɛ taa yɛ nyɔvoɛ a Vooroŋ Soŋ eŋɛ, a ta erɛ a eŋgane yelboɔre.

¹⁷ Bonso, bonna zaa a eŋgane naŋ boɔrɔ maŋ zɔɔrɔ ne la a Vooroŋ Soŋ, ka bonna a Vooroŋ Soŋ naŋ boɔrɔ meŋ zɔɔrɔ ne a eŋgane; bonso a ama zɔɔrɔ ne la taa, ka ka a pigi yɛ sori ka yɛ ta toɔ̃ e yeli na yɛ naŋ boɔrɔ.

¹⁸ Kyɛ ka a Vooroŋ Soŋ wa de yɛ weɛ, yɛ ba la be a bege puliŋ.

¹⁹ Nyɛ, a eŋgane tontonne sããɛ la weliweli: peɛ̃mo toma, yeldɛgɛ, nemboŋyɛlɛ,

²⁰ tebɛ maaloo, sɔyɛlɛ, dɔndɔnnoŋ, zɔɔzɔɔ-yɛlɛ, nyuuri, suuri, nɔkpeɛnfaare, yelbawontaa, wɛltaa,

²¹ bombɔ-faare, dããnyukuoli, tolomala ane anaŋ zaa naŋ waa ŋa a yɛlɛ ama taaba. N kpaana yɛ la aŋa N naŋ da daŋ kpãã yɛ lɛ: banaŋ naŋ erɛ a yɛlɛ ama taaba koŋ di a Naaŋmen naaloŋ gbandiruŋ.

A Vooroŋ Soŋ Wɔmɔ

²² Ka teneŋ de manne taa, a Vooroŋ Soŋ wɔmɔ la, nɔmmo, popeɛloŋ, emmaaroŋ, kannyiri, nimimaaroŋ, nuyuobu, yelmennoŋ,

²³ sumaaroŋ ane meŋɛ bantaabo. Bege zaa kyebe naŋ ba are ko a yɛlɛ ama taaba.

²⁴ Kyɛ banaŋ naŋ e a Kirista Yeezu soobo kpa la a eŋgane laŋ ne o vɔlfaare ane o yelboɔre.

²⁵ Ka teneŋ wa taa te nyɔvoɛ a Vooroŋ Soŋ eŋɛ, yɛ vɛŋ ka a Vooroŋ Soŋ meŋ guuro te.

²⁶ Yɛ ta vɛŋ ka te wullo temenne, a erɛ yɛlɛ belɛ taa, a erɛ nyuuri ne taa.