Galesiya 4 - Naaŋmen Nɔpaalaa Gane

¹ A yeli ŋa poɔ, n teɛroŋ la ŋa: saŋ na zaa poɔ gbandiribe naŋ waa bibiiri ba ne gbaŋgbaare ba seɛ taa, aneazaa ka ba na la so a boma zaa;

² kyɛ ba be la noba naŋ kaara ba zu ane ba toma zu nuuriŋ a na te ta a bebiri na a saa naŋ biŋ.

³ Lɛ ka a waa te meŋ zie; te naŋ da naŋ waa bibiiri, te da e la gbaŋgbaare ko a seere naŋ dire naaloŋ a tendaa zu.

⁴ Kyɛ a saŋ naŋ da wa ta, Naaŋmen da toŋ la O Bidɔɔ, ka pɔge dɔge O, a dɔge O a bege puliŋ,

⁵ ka ka O na toɔ̃ faa a banaŋ naŋ da be a bege puliŋ, ka Naaŋmen na de ba ka ba leɛ waa O meŋɛ bidɔgre.

⁶ Kyɛ yɛ naŋ leɛ O bidɔgre zuiŋ, Naaŋmen toŋ la O Bidɔɔ Vooroŋ eŋ te sukyie pooreŋ ka O e ka te ŋmeɛrɛ kpɛlle, “N Saa! N Ba!”

⁷ A lɛnso, yɛ ba la waa gbaŋgbaare kyɛ yɛ leɛ la biiri, ka yɛneŋ wa waa bibiiri ka lɛ yɛ leɛ la gbandiribe Naaŋmen zuiŋ.

Pɔɔl Naŋ Nyare A Galesiya Deme Zu

⁸ A saŋ yɛ naŋ da ba baŋ Naaŋmen, yɛ da waa la gbaŋgbaare ko boma naŋ ba waa ŋmemɛ.

⁹ Kyɛ pampana, yɛ naŋ wa baŋ Naaŋmen kyɛ bee Naaŋmen naŋ wa baŋ yɛ, wola ka yɛ na la leɛ gaa a andonɛɛ se-foglo naŋ ba taa faŋ bee tɛgɛ zie? Wola ka yɛ na boɔrɔ ka yɛ la te leɛ a gbaŋgbaare?

¹⁰ Yɛ de la bebie mine, kyuuri, wagre ane yuomo mine biŋ ka a e nimizeɛ yɛ zie.

¹¹ N zoro la dabeɛ̃ ka a toma N naŋ toŋ ko yɛ na pɔɔ wa e la weɛlɛ.

¹² N bamine, N sɔrɔ yɛ la, yɛ waa aŋa lɛ N naŋ waa, bonso, N meŋ leɛ waa ŋa yɛ naŋ waa lɛ. Yɛ ba e ma yelfaa zaa.

¹³ Yɛ baŋ ka a n baaloŋ la so ka N da daŋ de weɛ moɔle a Ŋmen-yelnoore ko yɛ;

¹⁴ aneazaa ka n baaloŋ ŋa da e la enyaabo ko yɛ, kyɛ yɛ da ba e ma la bee a gyegre ma, kyɛ yɛ da tuori de ma la aŋa Naaŋmen maleke, a tuori de ma aŋa a Kirista Yeezu.

¹⁵ Yeŋ ka a nimimaaroŋ na yɛ naŋ da taa na be? Bonso, N na baŋ di la danseɛ ka ka a naŋ da na toɔ̃ nyɛ eebo, yɛ da na logri la yɛ nimie iri ko ma.

¹⁶ Pampana, N mɔɔ leɛ la yɛ dɔndɔmɔ ne N naŋ yele a yelmeŋɛ korɔ yɛ be?

¹⁷ Ba taa la yɛ yɛlɛ yaga, kyɛ a ba poteɛrɛ ba soma. Ba boɔrɔ la ka ba wɛle yɛ bare, ka lɛ na vɛŋ ka yɛ taa ba yɛlɛ yaga.

¹⁸ A soma la ka ba maŋ taa yɛ yɛlɛ ne poteɛroŋ naŋ soma tegitegilɛ, ka a ta e ka saŋ na N naŋ maŋ wa be yɛ zie yoŋ.

¹⁹ N bibiiri, a yɛ zuiŋ la ka N la wono tuo aŋa pɔge poɔ naŋ beɛrɛ bidɔge poɔ a na te ta saŋ na yɛ naŋ na taa a Kirista waaloŋ.

²⁰ N da na nɔnɔ la ka N be yɛ zie pampana a leɛre n kɔkɔre, bonso, a yɛ yɛlɛ yoɔre la n nuuri yaga.

Heega Ane Saara Yelmannaa

²¹ Yɛ yeli ko ma, yɛ banaŋ naŋ boɔrɔ ka yɛ tuuro a bege, yɛ mɔɔ koŋ kyɛlle woŋ bon a bege naŋ yele be?

²² Bonso, ba da sɛgɛɛ la ka Aboraham da taa la bidɔbɔ bayi, kaŋ da waa la gbaŋgbaa bie, ka kaŋ meŋ waa pɔge naŋ ba waa gbaŋgbaa bie.

²³ Nensaaloŋ poɔ la ka ba tu dɔge a gbaŋgbaa bie kyɛ tu a nɔ-eŋnaa zie a dɔge a onaŋ naŋ ba e pɔg-gbaŋgbaa bie.

²⁴ A yelmannaa pãã la ŋa: A pɔgeba bama waa la nɔɛ ayi ba naŋ eŋ. Serɛzaa, a pɔge kaŋ da la Heega naŋ yi Sanae Taŋzu a da dɔge o biiri eŋ gbaŋgbaaloŋ poɔ.

²⁵ Pampana, a Heega waa ŋa Sanae Taŋ naŋ be Arebiya teŋɛ poɔ, ka o ne a zenɛ Gyɛruzɛlɛm manne taa, bonso, o ne a o biiri be la gbaŋgbaaloŋ poɔ.

²⁶ Kyɛ a pɔge kaŋ na waa ŋa Gyɛruzɛlɛm naŋ be sazu poɔ; a pɔge ŋa so la o meŋɛ a waa te ma.

²⁷ Bonso, ba sɛgɛɛ la: “Taa popeɛloŋ, fõõ naŋ ba taa biiri, fõõ naŋ daŋ ba dɔge bie, yiele yieluŋ a ŋmɛ kulinni, fõõ naŋ daŋ ba woŋ bidɔge poɔ tuo; bonso, a pɔge na ba naŋ da zagre bare taa la biiri yaga gaŋ a pɔge na naŋ taa serɛ.”

²⁸ Pampana, yɛnee n bamine, yɛ waa la a nɔ-eŋnaa biiri aŋa a Aziki naŋ da waa lɛ.

²⁹ Kyɛ aŋa lɛ saŋ a bie na ba naŋ da dɔge nensaaloŋ poɔ naŋ da dɔgrɔ a bie na ba naŋ da dɔge a Vooroŋ Soŋ eŋɛ, a lɛ meŋ la ka a waa pampana.

³⁰ Kyɛ a gansoŋ yeli ka boŋ? “Digi a gbaŋgbaa ne o bie bare; bonso, a gbaŋgbaa bie koŋ baŋ laŋ ne a pɔge naŋ ba e gbaŋgbaa bie di a gbandiruŋ.”

³¹ A lɛ zuiŋ, n bamine, te ba waa a gbaŋgbaa biiri, kyɛ te waa la a pɔge na naŋ so o meŋɛ biiri.