Galesiya 2 - Naaŋmen Nɔpaalaa Gane

Pɔɔl Ane A Apostoliimine

¹ Yuomo pie ne anaare puoriŋ, maa ne Banabase pãã da taa la Tiitu ka te gaa a Gyɛruzɛlɛm.

² N da do gaa la a be N naŋ da nyɛ yel-iriwulaa kaŋ zuiŋ. N pãã da gaa te manne ko ba la (aneazaa ka N ne a noba na ba naŋ da de ka ba waa wederebɛ yoŋ la da taa a lamboore ŋa) a Ŋmen-yelnoore na N naŋ da moɔlɔ a Nemboore-yobo poɔ, ka ka N nyɛ ka N da tonɔ la a toma a bogriŋ bee ka N da toŋ bare la weɛlɛ.

³ Kyɛ Tiitu meŋ gba naŋ da be n zie, ba da ba fere o ka o iri o dɛgre, aneazaa ka o da waa la Giriki neɛ.

⁴ Kyɛ a zirii yelderebɛ naŋ da sɔgle kpɛ te poɔ a boɔrɔ ka ba kaa nyɛ lɛ te naŋ taa a te meŋɛ soobo a Yeezu Kirista eŋɛ, ka ka ba na toɔ̃ e ka te leɛ be Naaŋmen nɔɛ tuubu gbaŋgbaaloŋ poɔ.

⁵ Te da ba sage ko ba fẽẽ zaa, ka ka a yelmeŋɛ naŋ be a Ŋmen-yelnoore poɔ na be yɛ zie tegitegilɛ.

⁶ Kyɛ a banaŋ ba naŋ da de ka ba waa wederebɛ (kyɛ bon ba naŋ waa ba taa tɛgraa zaa ko ma; Naaŋmen ba erɛ nɔmboore); a wederebɛ bama da ba soŋ ma ne bonzaa.

⁷ Kyɛ ba naŋ da wa nyɛ ka ba de la a Ŋmen-yelnoore eŋ n nuuriŋ ka N te ko a banaŋ ba naŋ da ba iri ba dɛgre aŋa lɛ ba naŋ da de a Ŋmen-yelnoore eŋ Piita nuuriŋ ka o te ko a banaŋ ba naŋ iri ba dɛgre,

⁸ (bonso, a soba na naŋ da tu a Piita zie toŋ toma a e ka o leɛ apostolii ko a banaŋ ba naŋ da iri ba dɛgre, ne O zu meŋ la tu n zie toŋ toma kyɛ toŋ ma a Nemboore-yobo zie),

⁹ kyɛ Gyimisi, Sefase ane Gyɔɔn naŋ da waa noba ba naŋ de ka ba waa ŋa dalugo, naŋ da wa nyɛ a garaaseɛ ba naŋ ko ma, da tuori de la Banabase ane ma lɛ a naŋ seŋ ne, kyɛ sage te ka te gaa a Nemboore-yobo zie kyɛ ka bana gaa a banaŋ ba naŋ iri ba dɛgre zie.

¹⁰ Yelyeni yoŋ ba naŋ da sɔre la ka te ta wa inne a nembaalba yɛlɛ. A yeli ŋa la ka N da sereŋ kyerɛ ka N e.

Pɔɔl Naŋ Da Nyare Piita Zu Antoɔki Poɔ

¹¹ Kyɛ a Sefase naŋ da wa a Antoɔki teŋɛ, N da yeli o la o niŋeŋ, o naŋ da ba e soŋ zuiŋ.

¹² Bonso, a te ta a saŋ na noba mine naŋ da yi Gyimisi zie wa, a Sefase ne a Nemboore-yobo da maŋ laŋ di la diibu. Kyɛ a noba waabo puoriŋ, a Sefase da tage la o meŋɛ yi a Nemboore-yobo poɔ, o naŋ da zoro a banaŋ naŋ da iri ba dɛgre dabeɛ̃ zuiŋ.

¹³ A Gyuumine na meŋ da poɔ la a Sefase pɔntenakaare yɛlɛ ŋa poɔ, haali ka a lɛ e ka Banabase da tuli a ba pɔntenakaare yɛlɛ zuiŋ.

¹⁴ Kyɛ N naŋ da wa nyɛ ka ba ba erɛ yɛlɛ naŋ tori ne a Ŋmen-yelnoore yelmeŋɛ na, N da yeli ko la a Sefase a ba zaa niŋesogɔ, “Fõõ naŋ waa Gyuu neɛ kyɛ erɛ yɛlɛ aŋa Nemboore-yuo kyɛ ba erɛ yɛlɛ aŋa Gyuu neɛ, wola ka fo na toɔ̃ fere a Nemboore-yobo ka ba erɛ yɛlɛ aŋa Gyuumine?”

A Gyuumine Ane A Nemboore-yobo Nyɛ La Faabo Yeldeebo Zuiŋ

¹⁵ Tenee ba naŋ dɔge ka te waa Gyuumine a ba waa Nemboore-yobo naŋ waa yelbe-erebɛ,

¹⁶ kyɛ te baŋ ka neɛ ba maŋ leɛ nemmeŋɛ a yi a bege toma eŋɛ kyɛ neɛ maŋ leɛ la nemmeŋɛ a yi yeldeebo o soba naŋ taa a Yeezu Kirista eŋɛ. Kyɛ tenee sage de la a Yeezu Kirista, ka lɛ e ka te leɛ nemmenne a yi te yeldeebo naŋ be a Kirista eŋɛ, ka a ba e te naŋ tonɔ a bege toma zuiŋ, bonso neɛzaa kyebe a na leɛ nemmeŋɛ a yi a bege toma eŋɛ.

¹⁷ Kyɛ ka teneŋ wa moɔrɔ ka te leɛ nemmenne a Kirista eŋɛ, kyɛ ka ba nyɛ te ka te waa yelbe-erebɛ, a Kirista mɔɔ waa la yelbieri tontonɔ be? A koŋ baŋ waa lɛ togitogi!

¹⁸ Kyɛ ka maa wa leɛ mɛ a boma na ne a zu N naŋ da daa lɔɔ, ka lɛ N wullo la ka N waa la neɛ naŋ zagra noɔre.

¹⁹ Bonso, a yi a bege eŋɛ, N kpi ko la a bege, ka ka N toɔ̃ voorɔ a Naaŋmen eŋɛ. Ba laŋ kpa ma la ne a Kirista;

²⁰ ka maa meŋɛ naane la voorɔ, kyɛ a Kirista naŋ be n eŋɛŋ la voorɔ. Kyɛ a nyɔvore N naŋ taa pampana a eŋgane poɔ, N taa o la a yeldeebo n naŋ taa a Naaŋmen Bie eŋɛ, Ona la da nɔŋ ma a de O meŋɛ tere N zuiŋ.

²¹ N ba e ka a Naaŋmen garaaseɛ ba tonɔ; bonso ka neɛ na tu a bege toma zie a leɛ nemmeŋɛ, ka lɛ a Kirista kpi la weɛlɛ.