EFESU 5 - Naaŋmen Nɔpaalaa Gane1 Azuiŋ, yɛ tɔglɔ Naaŋmen yɛ naŋ waa O poyɛŋ biiri, 2 a taa nɔmmo aŋa lɛ a Kirista naŋ da nɔŋ te lɛ, a de O meŋɛ tere ka ba maale ne bagre naŋ nyuuro noɔ Naaŋmen zie. Yɛ Zagre A Noba Naŋ Ba Tu Kirista Biiri Sobie 3 Kyɛ peɛ̃mo toma ane dɛgre boorɔ zaa, bee bieri gba ba seŋ ka ba porɔ a yɛ poɔ, aŋa a naŋ ba seŋ ka a lɛ be a nensonne poɔ. 4 Yɛ ta vɛŋ ka vi yɛlɛ, dambol-yɛlɛ ane kɔkɔr-yɛlɛ yire yɛ zie togitogi, kyɛ yɛ vɛŋ ka bareka puoro la yire yɛ zie. 5 Yɛ baŋ a yeli ŋa velaa, ka neɛ naŋ tonɔ peɛ̃mo toma, bee nendɛgre bee bombɔ-gaŋne soba (a tɛgɛ la neɛ naŋ be tebɛ yɛlɛ poɔ) ba taa gbandiruŋ a Kirista ane a Naaŋmen naaloŋ poɔ. 6 Yɛ ta vɛŋ ka neɛzaa bɛlle yɛ ne yelfoglo, bonso a yɛlɛ ama zuiŋ la ka Naaŋmen supuriyaaraa waana a banaŋ naŋ zagra O noɔre eŋɛ. 7 Azuiŋ yɛ ta laŋna ne ba. 8 Bonso, saŋ kaŋ yɛ da be la ligruŋ poɔ kyɛ pampana, a Daana eŋɛ, yɛ be la kyaane poɔ. Yɛ taa yɛ nyɔvoɛ aŋa kyaane biiri, 9 bonso, ba maŋ nyɛ la a kyaane yel-erre yelzaa naŋ soma, ane yelzaa naŋ tori ane yelzaa naŋ e yelmeŋɛ poɔ. 10 Yɛ e aneɛ kyɛ bɔ a baŋ yɛlɛ naŋ pɛllɛ a Daana poɔ. 11 Yɛ ta de yɛ nu poɔrɔ a ligruŋ toma naŋ ba taa tɔnɔ poɔ, kyɛ yɛ maŋ wuo a pare ka a yi sãã. 12 Bonso, a e la vi ka neɛ yeli a yɛlɛ ama taaba noba naŋ maŋ sɔglɔ erɛ, 13 kyɛ yɛlɛ na zaa a kyaane naŋ maŋ wa iri wuli maŋ sãã la ka ba nyɛ, 14 bonso, bonzaa naŋ maŋ wa sãã waa la kyaane. Azuiŋ la ka ba yeli: “Gɔŋgbire, iri! Iri a kũũ poɔ, ka a Kirista kyaane eŋ fo.” 15 A lɛ zuiŋ yɛ baŋ yɛ gbɛkyɛnne, a ta erɛ yɛlɛ aŋa noba naŋ ba taa yɛŋ, kyɛ yɛ erɛ ŋa yɛmbaŋnema, 16 a tonɔ tonsonne a saŋ ŋa poɔ, bonso, a bebie waa la faa. 17 A lɛ zuiŋ, yɛ ta waa dambolo, kyɛ yɛ baŋ bon a Daana poboɔbo naŋ waa. 18 Yɛ ta nyu dãã kuoli, bonso a lɛ e la faaloŋ; kyɛ yɛ paale ne a Vooroŋ Soŋ, 19 a yiele dannoo yiele ane puubu yiele ane seeloŋ poɔ yiele a yɛ poɔ. Yɛ yiele ne kɔkɔnoɔ a danna a Daana yɛ sukyie poore, 20 a puoro a Saa Naaŋmen bareka tegitegilɛ yelzaa poɔ a te Daana Yeezu Kirista yuori eŋɛ. A Kiristabie Yiri Yɛlɛ 21 Yɛ sigre yɛmenne korɔ taa, yɛ naŋ ennɛ a Kirista zuiŋ. 22 Pɔgebɔ yɛ sigre yɛmenne korɔ yɛ serebɛ aŋa yɛ naŋ sigre yɛmenne korɔ a Daana lɛ. 23 Bonso, a serɛ la a pɔge zu soba aŋa a Kirista naŋ e a puoruu laŋne zu soba lɛ. Ona la a puoruu laŋne Faara. 24 Aŋa lɛ a puoruu laŋne naŋ sigre o meŋɛ korɔ a Kirista, a lɛ meŋ la ka a seŋ ka pɔgeba sigre bamenne korɔ ba serebɛ yelzaa poɔ. 25 Serebɛ, yɛ nɔŋ yɛ pɔgeba, aŋa lɛ a Kirista naŋ da nɔŋ a puoruu laŋne a de O meŋɛ tere a puoruu laŋne zuiŋ, 26 ka ka O de a yelbiri pɛge ne o aŋa koɔ̃ ka o e soŋ. 27 Lɛ la ka O na toɔ̃ de a puoruu laŋne ka o veɛlɛ a nyegrɛ ko O meŋɛ, ka o ta taa mhal bee nyoremɔ bee faaloŋ zaa. Õõ, lɛ la ka a puoruu laŋne na waa soŋ a ba taa dɛgre zaa. 28 A lɛ meŋ ne o zu, serebɛ yɛ nɔŋ yɛ pɔgeba aŋa lɛ yɛ naŋ nɔŋ yɛmenne enne. Soba na zaa naŋ nɔŋ o pɔge nɔŋ la o meŋɛ. 29 Bonso, neɛzaa ba kyiire o meŋɛ eŋɛ, kyɛ o maŋ guolo la a o eŋɛ a kaara o zu velaa, aŋa lɛ a Kirista naŋ erɛ korɔ a puoruu laŋne, 30 te naŋ waa O eŋɛ nandaare zuiŋ. 31 “A ŋaa zuiŋ la ka dɔɔ na maŋ bare o saa ane o ma, kyɛ laŋ ne o pɔge ka a ba bayi leɛ eŋgan-yeni.” 32 A yeli ŋa e la yelsɔgl-kpoŋ ka N de a Kirista ane a puoruu laŋne yɛlɛ manna ne. 33 A naŋ waa lɛ, yɛ kanzaa seŋ ka o nɔŋ o pɔge aŋa o meŋɛ, ka a pɔge meŋ ennɛ a o serɛ. |
First New Testament in Dagaare Language © The Bible Society of Ghana, 2013.
Bible Society of Ghana