EFESU 3 - Naaŋmen Nɔpaalaa Gane

A Pɔɔl Tonnoɔre A Nemboore-yobo Poɔ

¹ A ŋaa la so ka maa Pɔɔl e nempɔgraa ko a Kirista Yeezu a Nemboore-yobo zuiŋ.

² Bonso, yɛ sereŋ da woŋ la lɛ Naaŋmen naŋ da maale ma ne O garaaseɛ a yɛ zuiŋ,

³ ane lɛ O naŋ da iri a yelsɔgle wuli ma, a seŋ N naŋ da sɛge lɛ ne yelbie belaa.

⁴ A yelbie ama sɔroo na e la ka yɛ baŋ lɛ N naŋ baŋ a Kirista yelsɔgle tɛgɛ.

⁵ Ba da ba de a yelsɔgle ama wuli a dakoroŋ noba aŋa lɛ a Vooroŋ Soŋ naŋ de a wuli a O apostol-sonne ane a Ŋmen-yelmanneba pampana ŋa.

⁶ A lɛ tɛgɛ la, a Nemboore-yobo meŋ leɛ la a te gbandi-taaba, a waa eŋgan-yeni nandaare, a waa noba naŋ poɔ a nɔ-eŋnaa naŋ be a Kirista Yeezu eŋɛ a yi a Ŋmen-yelnoore zuiŋ.

⁷ A Ŋmen-yelnoore ŋa zuiŋ la ka N leɛ tontonɔ a seŋ a Naaŋmen garaaseɛ kyɔɔtaa O naŋ da ko ma a O kpeɛ̃õ toma zuiŋ.

⁸ Aneazaa ka N waa la a bile soba a nensonne zaa poɔ, ba ko ma la a garaaseɛ ŋa ka N taa a Kirista bondaanoŋ naŋ ba taa mannoo duoro wa ko a Nemboore-yobo,

⁹ kyɛ e ka neɛzaa nyɛ a yelsɔgle ba naŋ nare biŋ ka a sɔgle yuomo naŋ tɔle a Naaŋmen poɔ. A Naaŋmen la iri boma zaa

¹⁰ ka ka O tu a puoruu laŋne deme zie a e ka a namine ane a kpeɛ̃õ deme naŋ be a sazu poɔ baŋ a Naaŋmen yɛŋ parɛɛ parɛɛ.

¹¹ A ŋaa da eɛɛ la a seŋ a O poteɛroŋ naŋ ba taa baaroo O naŋ da tu a te Daana Kirista Yeezu zie a e.

¹² A Kirista zuiŋ la ka te taa bambaare a ba zoro dabeɛ̃ ka te gaa Naaŋmen zie ne te naŋ taa yeldeebo O eŋɛŋ.

¹³ Azuiŋ, N puoro la ka ka yɛ nuuri ta wa yoɔre ne a dɔgɛɛ N naŋ dire yɛ zuiŋ; a e la yɛ puubu.

Pɔɔl Naŋ Puori Ko A Banaŋ Naŋ Na Kanne A O Lɛtɛ

¹⁴ A ŋaa zuiŋ, N gbi la dumo a Saa niŋesogɔ,

¹⁵ neɛ na zie a yideme zaa naŋ be sazu ane a teŋɛzu naŋ maŋ de ba yoe yi.

¹⁶ N puoro la ka O tu a O Vooroŋ Soŋ zie a ko yɛ seere faŋ a seŋ O puubu bondaanoŋ naŋ seŋ lɛ,

¹⁷ kyɛ ka a Kirista tu a yɛ yeldeebo zie a wa be yɛ sukyie poore ka yɛ tɛ nyaga a are kpeɛŋaa nɔmmo poɔ.

¹⁸ N puoro la ka yɛ ne a nensonne zaa nyɛ kpeɛ̃õ a toɔ̃ baŋ a Kirista nɔmmo yɛloŋ, wogruŋ, duobu ane a o zuluŋ naŋ seŋ lɛ,

¹⁹ kyɛ baŋ a Kirista nɔmmo naŋ gaŋ yɛmbammo zaa, ka yɛ na toɔ̃ paale ne a Naaŋmen waaloŋ zaa.

²⁰ Pampana, a soba na kpeɛ̃õ naŋ tonɔ te poɔŋ taa la faŋ a na e yɛlɛ zaa a gaŋ bonna zaa te naŋ sɔrɔ bee a teɛrɛ.

²¹ Ona la so puubu, a puoruu laŋne poɔ ane a Kirista Yeezu poɔ tegitegilɛ ane yuoni yuoni zaa. Ameena.