EFESU 2 - Naaŋmen Nɔpaalaa Gane

A Yi Kũũ Poɔ Wa Kpɛ Nyɔvore Poɔ

¹ Yɛ da kpie la a yɛ saanaa ane yelbebe zuiŋ,

² a poɔŋ la ka yɛ da be, a tuuro a teŋɛzu yɛlɛ, a tuuro a sazu sefaare naa, a seɛ na naŋ tonɔ toma pampana a banaŋ naŋ zagra noɔre tuubu zie.

³ Te zaa da poɔ la a poɔ, a be a te eŋgane vɔlfaare poɔ, a tuuro a te enne ane te yɛŋ yelboɔre, kyɛ da waa supuriyaaraa biiri a te nensaaloŋ poɔ, aŋa lɛ neɛzaa naŋ da waa.

⁴ Kyɛ Naaŋmen naŋ paale ne nembaalonzoe nɔŋ te la ne O nɔmmo naŋ waa kpoŋ.

⁵ Haali te naŋ da waa kuuni te saanaa zuiŋ kyɛ O da eɛɛ la ka te ne a Kirista leɛ laŋ voorɔ (a garaaseɛ zuiŋ yɛ nyɛ la faabo).

⁶ Naaŋmen eɛɛ la ka te ne O leɛ-iri yi a kũũ poɔ a e ka te ne O laŋ zeŋ a tenvelaa poɔ a Kirista Yeezu eŋɛ.

⁷ O da e la a ŋaa ka ka nendaare kaŋ ka O wuli a O garaaseɛ naŋ ba taa mannoo ane a O nimibaaloŋ O naŋ taa kyaare ne te a Yeezu Kirista zuiŋ.

⁸ Bonso, garaaseɛ zuiŋ la ka yɛ nyɛ faabo yi a yɛ yeldeebo eŋɛ, kyɛ ka a ba e a yɛmenne tontonne; o e la a Naaŋmen kyɔɔtaa;

⁹ a ba e ka toma zuiŋ la ka neɛzaa na wa ŋmeɛrɛ nyaa.

¹⁰ Bonso, Ona la maale te ka te waa lɛ te naŋ waa. Ona la iri te a Kirista Yeezu eŋɛ, ka te tonɔ tonsonne a seŋ lɛ Naaŋmen naŋ da daŋ nare biŋ ka a lɛ na e te nyɔvore waaloŋ.

Te Waa La Yeni A Kirista Eŋɛ

¹¹ A lɛ zuiŋ, yɛnee Nemboore-yobo boorɔ, yɛ leɛ-teɛre ka saŋ kaŋ, a “noba na dɛgre ba naŋ da iri” da boɔlɔ yɛ la “noba dɛgre ba naŋ ba iri” (dɛgre iruu ba naŋ de nuuri iri ne a eŋgane eŋɛ.)

¹² Yɛ leɛ-teɛre ka a saŋ na yɛ da ba be a Kirista poɔ, a waa nɔɔre a Izerayɛl boorɔ noba poɔ, a waa saama a nɔ-eŋnaa poɔ, a da ba taa teɛretɔroo, a da ba taa Naaŋmen a teŋɛzu.

¹³ Kyɛ pampana yɛnee naŋ da waa tɔɔre ne a Kirista Yeezu, a O zẽẽ eɛɛ la ka yɛ tage wa peɛle O.

¹⁴ Bonso, Ona la a te emmaaroŋ; a O eŋgane eŋɛ la ka O e ka a Izerayɛl biiri ne a Nemboore-yobo e yeni kyɛ ŋmore a daŋkyini naŋ da wɛle ba taa. A daŋkyini ŋa da la a dɔŋ na naŋ da be te sogɔŋ.

¹⁵ O da iri la a bege ne a O nɔɛ ane O yeltuuri bare, ka ka O na toɔ̃ iri nemboore-paalaa a leɛre ne a nemboore-parɛɛ ayi zu, a pãã wa ne emmaaroŋ,

¹⁶ kyɛ e ka a nemboore-parɛɛ ayi ne Naaŋmen leɛ maale taa a yi a Yeezu dagaraa zu kũũ eŋɛ a pãã ko a dɔŋ naŋ da be ba sogɔŋ.

¹⁷ A lɛ la ka O da wa moɔle a emmaaroŋ yɛlɛ ko a yɛ banaŋ naŋ da be tɔɔre zaa ane a banaŋ naŋ peɛle.

¹⁸ Bonso, a Kirista zie la ka te zaa taa sori a na toɔ̃ tu a Vooroŋ Soŋ yeni zie ta a Saa.

¹⁹ Azuiŋ, yɛ ba la waa saama ane nɔɔre, kyɛ yɛ ne a nensonne zaa waa la tembiiri, a waa a Naaŋmen yideme.

²⁰ Ba mɛ yɛ la dɔgle a apostoliimine ane a Ŋmen-yelmanneba yiri pare na zu, ka a Kirista Yeezu meŋɛ e a yiri pare kuuri.

²¹ A O eŋɛ la ka a yiri lamboe zaa mɛ lantaa a baa te leɛ Naaŋmen die naŋ e soŋ a be a Daana eŋɛ.

²² O eŋɛ meŋ la ka ba mɛ yɛ lantaa a seeloŋ poɔ ka yɛ leɛ a Naaŋmen kpeɛbozie.