2 Tim 3 - Naaŋmen Nɔpaalaa Gane

Naaŋmennoŋ A Bebi-baare Saŋ

¹ A ferɛɛ la ka fo baŋ a yeli ŋa tɛgɛ, ka a bebi-baare saŋ, a zie na e la kpeɛŋaa yaga.

² Bonso, noba na nɔŋ la bamenne, a nɔŋ libie, a wullo bamenne, a erɛ pɔloo, a toorɔ noba zoma, a zagra ba dɔgrebɔ nɔɛ, a ba baŋ bareka puoruu, a waa nendɛgɛ,

³ a ba taa nensaaloŋ, a ba dire suuri, a waa yosaanema, a taa sutoloŋ, a e noba naŋ na taa dabeɛ̃, a kyiire yelveɛle,

⁴ a e nenfaare, a e noba naŋ maŋ erɛ yɛlɛ kyɛ ba teɛrɛ, a paale ne pɔloo, a nɔŋ a eŋɛ noɔ yɛlɛ gaŋ Naaŋmen.

⁵ Ba maŋ erɛ ŋa ba naŋ puoro Naaŋmen kyɛ zagra a O kpeɛ̃õ. Ta laŋna ne ba!

⁶ A ba noba mine la a banaŋ naŋ maŋ kpɛ yie poore a te bɛlle nyɔge pɔgeba na naŋ ba kyele kyɛ tuo a ba yelbebe a zoro tuuro vɔlfaare boorɔ zaa.

⁷ Bana la ka ba maŋ wullo tegitegilɛ kyɛ ka ba daŋ ba baŋ a yelmeŋɛ.

⁸ Aŋa Gyanese ane Gyamberese naŋ da zɔɔ ne Moozul, lɛ la ka a noba ŋa teɛrɛ naŋ sãã kyɛ ka ba yeldeebo ba waa serɛ meŋ zɔɔrɔ ne a yelmeŋɛ.

⁹ Kyɛ a ba yɛlɛ kontoɔ̃ gaa zie zaa, bonso, aŋa a naŋ da waa a dɔbɔ bayi na zie, a ba dambol-yɛlɛ na sãã la weliweli ko neɛzaa.

A Pɔɔl Naŋ Kpãã Timoti

¹⁰ Pampana, fo nyɛ la a n wuluu, a n eebo, a n nyɔvore yelnyɔgraa, a n yeldeebo, a n kannyiri, a n nɔmmo, a n kpimaroo,

¹¹ a n dɔgɛɛ ane a tuo N naŋ woŋ a yɛlɛ na zaa naŋ pɔge ma a Antoɔki, Ikoniyo ane Lisitera tenne poore. Boŋ dɔgɛɛ la ka N da ba di! Kyɛ a Daana faa ma la yi a zaa poɔ.

¹² Serɛzaa, noba na zaa naŋ boɔrɔ ka ba taa nyɔvo-soŋ a Kirista Yeezu eŋɛ na nyɛ la dɔgɛɛ

¹³ Kyɛ potuodeme ane zirŋmaareba naŋ na kyɛnɛ erɛ la yelfaare dɔglɔ dɔglɔ taa gɛrɛ, a bɛllɛ ba taaba ane bamenne.

¹⁴ Kyɛ fõõ eŋ, naŋ kyɛnɛ taa kpeɛŋaa bonna fo naŋ da zanne kyɛ da sage de. Fo baŋ la neɛ na zie fo naŋ da zanne a.

¹⁵ A yi a fo biiluŋ saŋ, fo baŋ la a gansoŋ poɔ yɛlɛ naŋ na toɔ̃ wuli fo ka fo nyɛ faabo naŋ yi a yeldeebo naŋ be a Kirista Yeezu eŋɛ.

¹⁶ A gansoŋ poɔ yɛlɛ zaa, Naaŋmen Vooroŋ la e ka ba sɛge a, ka a taa tɔnɔ noba wuluu eŋɛ, noba kpããmo eŋɛ, noba dɛnnoo eŋɛ, kyɛ kanna noba kyaara ne mennoŋ,

¹⁷ ka ka neɛzaa naŋ waa Naaŋmen neɛ na toɔ̃ taa faŋ tonsoŋ zaa tommo poɔ.