2 Tim 2 - Naaŋmen Nɔpaalaa Gane

A Kirista Yeezu Sogyɛ Meŋɛ Yɛlɛ

¹ Azuiŋ n bie, are kpeɛŋaa a garaaseɛ naŋ be a Kirista Yeezu eŋɛ;

² kyɛ bonna fo naŋ da woŋ yi n zie a yi a dansediribe yaga poɔ, manne ko a yelmeŋɛ deme na naŋ na toɔ̃ wuli a ba taaba meŋ.

³ Meŋ poɔ wono a tuo aŋa a Kirista Yeezu sogyɛ meŋɛ.

⁴ Neɛzaa naŋ tonɔ sogyɛre toma ba maŋ de o meŋɛ poɔ a banaŋ naŋ ba e sogyɛre bebiri zaa yɛlɛ poɔ. A sogyɛ yelnimizeɛ maŋ la ka o pɛle a o neŋkpoŋ poɔ.

⁵ A zozoro meŋ zie, neɛzaa kontoɔ̃ nyɛ kyɔɔtaa ka o naŋ ba zo a zoobu zaa baare a seŋ lɛ a zoobu begɛ naŋ wuli.

⁶ A koɔraa naŋ toŋ a toma la seŋ ka o daŋ di a weɛ boma.

⁷ Teɛre nyɛ bonna N naŋ yele, bonso, a Daana na ko fo la yelbammo yelzaa poɔ.

⁸ Leɛ-teɛre a Yeezu Kirista naŋ yi a Davil boorɔ poɔ ba naŋ da e ka O leɛ-iri yi a kũũ poɔ yɛlɛ; a n Ŋmen-yelnoore la a ŋa.

⁹ O zuiŋ la ka N wono tuo, haali ka ba da leŋ ma ne banzɔlɔ aŋa nenfaa. Kyɛ ba ba leŋ a Ŋmen-yelnoore ne banzɔlɔ.

¹⁰ A lɛ zuiŋ, N di la kannyiri yelzaa poɔ a neŋkaa-irri zuiŋ ka ka ba meŋ na toɔ̃ nyɛ a faabo naŋ be a Kirista Yeezu eŋɛ ne puubu naŋ ba taa baaroo.

¹¹ A yeluu ŋa e la serɛ: Ka teneŋ wa laŋ ne O kpi, te meŋ na laŋ ne O la voorɔ;

¹² ka teneŋ di kannyiri, te meŋ na laŋ ne O la di naaloŋ; ka teneŋ zagre O bare, O meŋ na zagre te la bare;

¹³ ka teneŋ ba taa yelmeŋɛ ne O, Ona eŋ maŋ taa la yelmeŋɛ, bonso, O koŋ baŋ zagre O meŋɛ bare.

Tontonɔ Na Naaŋmen Poɔ Naŋ Pɛle Ne

¹⁴ Leɛ-teɛre ba a yeli ŋa kyɛ kpãã ba a Naaŋmen niŋesogɔ ka ba bare nɔkpeɛne ŋmeɛbo yelbie naŋ ba waana ne sommo zaa ka sããmo yoŋ naane ko a banaŋ naŋ kyɛllɛ wono a.

¹⁵ E aneɛ ka fo are a Naaŋmen niŋesogɔ a waa neɛ O poɔ naŋ pɛle ne, a waa tontonɔ naŋ ba zoro vi kyɛ kanna a yelmeŋɛ yelbiri velaa.

¹⁶ Zagre yelfoglo yeluu, bonso, a maŋ maaleŋ tagra la noba kpeɛrɛ ne yelbieri poɔ,

¹⁷ ka a ba yelyelii maŋ yɛllɛ aŋa gbontori. Hammeneyon ane Filetuse poɔ la ba poɔ.

¹⁸ Ba bɔre yi la a yelmeŋɛ sori kyɛ yele ka a kũũ leɛ-iruu eɛɛ la baare. Ba dɔɔnɔ la a noba mine yeldeebo.

¹⁹ Kyɛ a Naaŋmen yiri pare naŋ e kpeɛŋaa naŋ arɛɛ la a taa ŋmaaroŋ ŋa, “A Daana baŋ la banaŋ naŋ e O noba,” kyɛ “Vɛŋ ka neɛzaa naŋ boɔlɔ a Daana yuori leɛ yi potuoloŋ poɔ.”

²⁰ A yikpoŋ poɔ, salema ane selem-pelaa laare yoŋ naane maŋ bebe kyɛ daare ane yagraa laare meŋ maŋ bebe la. Ba maŋ de la a mine tonɔ ne toma naŋ taa yuori kyɛ de a mine tonɔ ne toma naŋ ba taa yuori.

²¹ Banaŋ zaa naŋ peere bamenne yi a yɛlɛ na zaa N naŋ da manne poɔ na waa ŋa laare naŋ taa yuori, a taa kpimaroo ane tɔnɔ ko a yiri soba, kyɛ nare bamenne tonsonne zaa tommo eŋɛ.

²² Zagre baapaaloŋ vɔlfaare bare kyɛ laŋ ne a banaŋ naŋ boɔlɔ a Daana yuori ne sukyirpelaa a eŋ faŋ boɔrɔ mennoŋ, yeldeebo, nɔmmo ane emmaaroŋ.

²³ Ta taa yelzaa ne damboluŋ ane nɔkpeɛn-weere naŋ ba taa tɛgɛ. Fo baŋ ka a lɛ maŋ waana ne la zɔɔre.

²⁴ A Daana tontonɔ ba seŋ ka o waa zɔɔboɔrɔ kyɛ a seŋ ka o taa nimibaaloŋ ne neɛzaa, a waa neɛ naŋ maŋ toɔ̃ wuli noba velaa, a taa kannyiri,

²⁵ a dɛnnɛ o taaba ne sumaaroŋ. Kaapɔge Naaŋmen na e la ka ba leɛ ba eebo a leɛ baŋ a yelmeŋɛ,

²⁶ a toɔ̃ faa bamenne yi a sebɛlbɛllɛ bɛraa poɔ. Ona la da nyɔge ba eŋ gbaŋgbaaloŋ poɔ ka ba erɛ o poboɔbo yɛlɛ.