2 Pit 3 - Naaŋmen Nɔpaalaa Gane

Noɔre Naŋ Eŋ Kyaare Ne A Daana Waabo

¹ N poyɛŋ noba, a gama ayi soba la a ŋa N naŋ sɛgrɛ korɔ yɛ pampana. A zaa ayi poɔ, N boɔrɔ la ka N seŋ a yɛ teɛroŋ naŋ ba taa faaloŋ zaa a leɛ-teɛre yɛ

² ka yɛ leɛ-teɛre a yelbie na a Ŋmen-yelmanneba naŋ da daŋ yeli a dakoroŋ saŋ ane a Daana, a Faara nɔɛ a yɛ apostolii mine naŋ da yeli ko yɛ.

³ A dɛndɛŋ soba, a seŋ ka yɛ baŋ a yeli ŋa, ka a bebi-baare saŋ, noba naŋ erɛ ba taaba laara na yi la, a erɛ yɛ laara kyɛ be ba vɔlfaare poɔ

⁴ a yele, “A noɔre ba naŋ eŋ ka a Daana waana la, O waɛ la? A saŋ na zaa a te sããkommine naŋ da kpi, yɛlɛ zaa naŋ kyɛnɛ gɛrɛ la aŋa lɛ a naŋ da waa a teŋɛ piiluu saŋ!”

⁵ Ba baŋɛɛ peraa kyɛ bare a yelmeŋɛ ŋa, ka yelbiri la ka Naaŋmen da yeli ka a saluoni wa bebe sanzaa kyɛ maale a teŋɛ yi koɔ̃ poɔ.

⁶ O da la eɛɛ la ka kɔmpiiri ŋmɛ a teŋɛ ka o wɛ.

⁷ Kyɛ a yelbiri ŋa ne o zu zie la ka a saluoni ne a teŋɛ naŋ bebe pampana a gu vũũ naŋ na di a sɛrɛɛdiibu daare kyɛ sãã a nenfaare.

⁸ N poyɛŋ noba, yɛ ta bare a yelmeŋɛ ŋa, ka a Daana zie, bebi-yeni waa ŋa yuomo turi, ka yuomo turi waa ŋa bebi-yeni.

⁹ A Daana ba e maaroŋ ne a noɔre O naŋ eŋ, aŋa noba mine naŋ teɛre ka O ba pagra, kyɛ O dire la kannyiri ne yɛ, a ba boɔrɔ ka neɛzaa wɛ, kyɛ O boɔrɔ la ka neɛzaa leɛ o eebo.

¹⁰ A Daana waabo bebiri na waa ŋa nannyige naŋ maŋ wa lɛ. Lɛ la ka a saluoni pãã na wa tɔle gaa ne gɔmɔ yaga, ka vũũ di a boma zaa ka a moore, ka a teŋɛ ane yelzaa ba naŋ e o poɔ koŋ la bebe.

¹¹ A boma ama zaa naŋ pãã na di vũũ moore ŋaa, nemboŋ boorɔ la ka a seŋ ka yɛ waa a yɛ sonnoŋ ane mennoŋ nyɔvore taabo poɔ,

¹² yɛ naŋ kyɛllɛ kyɛ boɔrɔ ka a Naaŋmen bebiri wa wieouŋ? Bonso, a lɛ daare ba na kyɔŋ la vũũ eŋ a saluoni ka o di vũũ moore, kyɛ ka a boma zaa di vũũ a nyɛle.

¹³ Kyɛ a kyaare ne a noɔre O naŋ eŋ, te kyɛllɛ la a saluon-paalaa ane a tempaalaa. Be la ka mennoŋ be.

Yelparebaaraa Ane Dannoo Puoruu

¹⁴ Azuiŋ, N poyɛŋ noba, yɛ naŋ kyɛllɛ a yɛlɛ ama, yɛ mɔ ka O wa nyɛ yɛ ka yɛ taa emmaaroŋ, kyɛ ta taa dɛgre bee saanaa zaa.

¹⁵ Yɛ nyɛ a te Daana kannyiri O naŋ di ka a e te faabo zuiŋ. Lɛ meŋ la ka a te yɔɔ-nɔnaa Pɔɔl da sɛge ko yɛ a kyaare ne a yɛŋ ba naŋ ko o.

¹⁶ O yele la a yeli ŋa aŋa lɛ o naŋ yeli a o gama zaa poɔ. A yɛlɛ mine be la a o gama poɔ ka a tɛgɛ bammo waa tuo, ka a banaŋ naŋ ba baŋ ane banaŋ naŋ ba are kpeɛŋaa maŋ nyɔge leɛ ka a e bamenne weɛbo aŋa lɛ ba naŋ maŋ e ne a gansoŋ sɛgre mine.

¹⁷ Azuiŋ, n poyɛŋ noba, ba naŋ faa daŋ ŋmaa muri lɔɔ yɛ, yɛ baŋ ne a, a ta wa vɛŋ ka a konde-wuluu deme tuluu bɛlle yɛ ka yɛ wa sare le.

¹⁸ Kyɛ yɛ baara a te Daana ane a te Faara Yeezu Kirista garaaseɛ ane O bammo poɔ. Ona la so puubu pampana a kyɛ gɛrɛ tegitegilɛ. Ameena.