1 Tim 5 - Naaŋmen Nɔpaalaa Gane

Feroo Toma Naŋ Kyaare Ne A Yelderebɛ

¹ Ta wa yele yɛlɛ tanna dɔɔnyaŋaa, kyɛ maŋ yeli yɛlɛ ko o aŋa fo saa, a yele yɛlɛ korɔ a pɔlbilii fo naŋ kore aŋa fo yɔɔmine,

² a yele yɛlɛ korɔ a pɔgenyaŋne aŋa fo mamine, a yeli yɛlɛ ko a pɔgsarre fo naŋ kore aŋa fo yɔɔpuuli; erɛ a lɛ ne sukyirpelaa.

³ Eŋnɛ pɔg-kɔbɔ na naŋ sereŋ waa pɔg-kɔbɔ.

⁴ Ka pɔgekoɔre wa taa bibiiri bee yaamine, a seŋ ka ba daŋ de weɛ toŋ a Naaŋmen puoruu feroo toma a ba yideme zie, a kaara ba dɔgrebɔ a yɔɔ a sama mine; bonso, a ŋaa la pɛllɛ Naaŋmen poɔ.

⁵ Pɔgekoɔre na naŋ sereŋ e pɔgekoɔre, a kpeɛrɛ o yoŋ tɛge, a ba taa neɛzaa naŋ kaara o zu, maŋ de la o teɛretɔroo eŋ Naaŋmen, a sɔrɔ O kyɛ puoro tegitegilɛ ŋmenaa ane tensogɔ.

⁶ Kyɛ pɔgekoɔre na naŋ boɔrɔ o eŋɛ noɔ kpie la gba kyɛ naŋ voorɔ.

⁷ Ko ba a nɔɛ ama meŋ, ka ba ta wa taa saanaa zaa.

⁸ Neɛzaa naŋ ba kaara o dɔgrebɔ zu, a gaŋ a zaa, o yideme, zagre la a yeldeebo bare kyɛ waa faa gaŋ neɛ naŋ ba sage de a Kirista yɛlɛ.

⁹ Vɛŋ ka ba sɛge pɔgekoɔre yuomo naŋ ta lezaata kyɛ kuli ser-yeni yoŋ yuori poɔ a pɔg-kɔbɔ yoe poɔ.

¹⁰ A seŋ ka o taa yosoŋ a o tonveɛle zuiŋ, a waa neɛ naŋ kaa o biiri ka ba baa, a derɛ saama saanoŋ, a maŋ pɛge a nensonne gbɛɛ, a soŋ a dɔgɛɛ deme kyɛ kpimare tonɔ tonveɛle yelzaa poɔ.

¹¹ Kyɛ ta wa sɛgrɛ pɔg-kɔbɔ naŋ ba kore yoe poɔrɔ a pɔg-kɔbɔ yoe poɔ; bonso, ka a ba eŋɛ yelboɔre wa tage ba yi a Kirista zie, ba maŋ boɔrɔ la ka ba kuli serebɛ;

¹² ka a ŋaa e ka ba le sɛrɛɛ poɔ ne ba naŋ sãã a noɔre na ba naŋ da daŋ eŋ zuiŋ.

¹³ A yi a lɛ puoriŋ, ba maŋ zeŋ la weɛlɛ, a yɔ yoɔrɔ a noba yie poore. A deɛ ba e ka ba maŋ zeŋ la weɛlɛ yoŋ kyɛ ba meŋ maŋ zuuro la noba poe, a de ba nuuri eŋnɛ noba yɛlɛ poɔ kyɛ yele yɛlɛ a naŋ ba seŋ ka ba yeli.

¹⁴ Azuiŋ, N na boɔrɔ la ka pɔg-kɔbɔ naŋ ba kore kuli serebɛ, a dɔge biiri a kyɛ kaara ba yie, ka a dɔndɔmɔ ta nyɛ sori to te zoma.

¹⁵ Bonso, ba mine ta leɛ la puori a tuuro Setaana.

¹⁶ Ka pɔge naŋ sage de a Kirista yɛlɛ wa taa dɔgrebɔ naŋ sereŋ waa pɔg-kɔbɔ, o soŋnɔ ba, a ta wa ko a puoruu laŋne toɔrɔ zaa, ka a lɛ vɛŋ ka a puoruu laŋne toɔ̃ soŋ a banaŋ naŋ sereŋ waa pɔg-kɔbɔ.

¹⁷ Yɛ vɛŋ ka a nembɛrɛ na naŋ kaara a noba zu velaa seŋ ne emmo gbɛre boyi, a gaŋ a zaa, a banaŋ naŋ moɔ nimiri moɔlɔ kyɛ kanna a Naaŋmen yelbiri.

¹⁸ Bonso, a gansoŋ yelee la, “Ta leŋ a naadɛre naŋ ŋmeɛrɛ kyi noɔre,” kyɛ la yeli, “Tontonɔ zaa seŋ ne la o toma san-yɔɔ.”

¹⁹ Ka noba bayi bee bata ba wa di danseɛ kyaare ne neŋkpoŋ yelsaanaa, ta wa daŋ sagra derɛ.

²⁰ A banaŋ naŋ naŋ kyɛnɛ be yelbieri poɔ, yeli a ba saanaa a noba zaa niŋesogɔŋ, ka a banaŋ naŋ kyɛre na zoro dabeɛ̃.

²¹ N kpaana fo la a Naaŋmen ane a Kirista Yeezu ane a malekere ba naŋ kaa-iri niŋesogɔŋ, ka fo tuuro a wuluu ama a ta ogro, a ta erɛ yelzaa ne nɔnne.

²² Ta pagra ka fo puori a de fo nuuri pare neɛzaa zu a ta wa poɔrɔ noba yelbebe poɔ. Taa fo meŋɛ velaa.

²³ Ta la nyuuro koɔ̃ yoŋ, kyɛ maŋ nyu dãã belaa, a fo poɔ ane a fo baaloŋ bilii bilii zuiŋ.

²⁴ A noba mine yelbebe maŋ sãã la kperaa lɛ, a de ba weɛ gaa a sɛrɛɛdiibu zie kyɛ ka ba mine yelbebe maŋ tu ba puori gaa be.

²⁵ Lɛ meŋ la ka tonsonne maŋ sãã kperaa lɛ; kyɛ ka a naŋ ba sãã meŋ gba, a kontoɔ̃ sɔgle.