1 Tim 3 - Naaŋmen Nɔpaalaa Gane

A Puoruu Laŋne Wederebɛ Yɛlɛ

¹ A yeluu ŋa taa la yelmeŋɛ: neɛzaa naŋ boɔrɔ ka o tonɔ besɔp toma boɔrɔ la toma naŋ taa yuori.

² Azuiŋ, a ferɛɛ la ka a besɔp ta taa saanaa zaa ka ba yele, a taa pɔge yeni, a baŋ o meŋɛ taabo, a baŋ yɛŋ, a taa gyeremɛ, a waa neɛ naŋ maŋ derɛ noba saanoŋ kyɛ e neɛ naŋ maŋ toɔ̃ wuli noba velaa.

³ A ba seŋ ka o waa dããnyukuolo bee a taa sutoloŋ kyɛ a seŋ ka o e neɛ naŋ taa sumaaroŋ, a ta e zɔɔŋmaara ane neɛ naŋ nɔŋ libie.

⁴ A ferɛɛ la ka o kaara o meŋɛ yideme zu velaa, a e ka o bibiiri sigre bamenne kyɛ eŋnɛ noba yelzaa poɔ;

⁵ bonso, ka neɛ ba baŋ lɛ o naŋ na e kaa o meŋɛ yideme zu, wola ka o na toɔ̃ e kaa a Naaŋmen puoruu laŋne deme zu?

⁶ A ba seŋ ka o e Kiristabi-paalaa, ka lɛ naane, o na baŋ paale ne la pɔloo a le a sebɛlbɛllɛ dɔgroŋ poɔ.

⁷ A la waana meŋ, a seŋ ka banaŋ naŋ ba e Kiristabiiri yele o yelveɛle yɛlɛ, ka lɛ vɛŋ ka vi ta wa kpɛ o ka o le a sebɛlbɛllɛ bɛraa poɔ.

Noba Naŋ Seŋ Ka Ba Leɛ Diikin Mine

⁸ A diikin mine meŋ seŋ ka ba taa nimizeɛ, a ta e neŋgagarre, a ta nyuuro dãã yaga, a ta taa libibɔ-gaŋne;

⁹ a seŋ ka ba kpimare a yeldeebo yelsɔgle ne teɛroŋ soŋ.

¹⁰ Vɛŋ ka ba daŋ tegre ba nyɛ, ka ba naŋ wa toɔ̃ wuli ka ba ba taa saanaa zaa, lɛ la ka yɛ pãã na vɛŋ ka ba tonɔ a diikin mine toma.

¹¹ A pɔgeba meŋ seŋ ka ba taa nimizeɛ, a ta e yosaanema, kyɛ ba baŋ bamenne taabo, a taa yelmeŋɛ yelzaa poɔ.

¹² A diikin mine seŋ ka ba taa pɔge yeni, a kaara ba bibiiri ane ba yideme zaa zu velaa;

¹³ bonso, banaŋ naŋ tonɔ a diikin mine toma velaa bɔ la yovelaa ko bamenne, a ba zoro a yeldeebo naŋ be a Kirista Yeezu eŋɛ dabeɛ̃ togitogi zaa.

A Naaŋmen Puoruu Yelsɔgle

¹⁴ N teɛrɛ la ka a koŋ kɔɔre kyɛ ka N wa yɛ zie, kyɛ N sɛgrɛ la a wuluu ama korɔ yɛ ka ka

¹⁵ maa wa kɔɔre, ka yɛ na baŋ lɛ kanzaa naŋ seŋ ka o taa o meŋɛ a Naaŋmen yiri poɔ. Ona la a Naaŋmen-vore puoruu laŋne, a waa a yelmeŋɛ dalugri ane a yelmeŋɛ kpeɛ̃õ zie.

¹⁶ Serɛzaa, a te puoruu yelsɔglaa waa la kpoŋ: Ba da iri O la wuli nensaala waaloŋ poɔ ka a Vooroŋ Soŋ wuli ka O ba taa saanaa zaa, ka malekere da nyɛ O, ka ba da moɔle O yɛlɛ a Nemboore-yobo zie, ka ba da sage de O yɛlɛ a tendaa zaa poɔ, ka ba da de O do ne sazu ne puubu.