1 Pit 4 - Naaŋmen Nɔpaalaa Gane

A Naaŋmen Garaaseɛ Tontom-bisonne

¹ A Kirista naŋ da woŋ tuo a eŋgane poɔ zuiŋ, yɛ meŋ taa a teɛroŋ ŋa (bonso, neɛzaa naŋ woŋ tuo a eŋgane poɔ baarɛɛ yelbieri yɛlɛ),

² ka ka yɛ ta la kyɛnɛ a yɛ eŋgane vɔlfaare poɔ a teŋɛzu, kyɛ na kyɛnɛ a Naaŋmen poboɔbo poɔ.

³ Yɛ daŋ de la vuo yaga ka a seŋ, a erɛ ne lɛ a Nemboore-yobo naŋ maŋ nɔŋ ka ba erɛ, a be nemboŋyɛlɛ, vɔlfaare, dããnyukuoli, bondi-yɛlɛ ane tolomala, ane tebɛ maaloo poɔ.

⁴ Ba nɔɛ maaɛ la ne yɛ naŋ ba la laŋna ne ba erɛ a yeldɛgɛ, ka a lɛ vɛŋ ka ba toorɔ yɛ zoma.

⁵ Kyɛ ba na manne la a yɛlɛ na zaa ba naŋ e a ba nyɔvore saŋ ko a soba na naŋ are a nare gu ka O di a voba ane a kuuni sɛrɛɛ.

⁶ A ŋaa la so ka ba da moɔle a Ŋmen-yelnoore ko a kuuni meŋ gba, aneazaa ka ba da di la ba sɛrɛɛ a nensaaloŋ poɔ aŋa lɛ ba naŋ maŋ di nensaalba zaa sɛrɛɛ ka ba na toɔ̃ taa nyɔvore ba seere poɔ aŋa Naaŋmen.

⁷ A yɛlɛ zaa baaroo peɛlɛɛ la; a lɛ zuiŋ yɛ taa nimizeɛ kyɛ baŋ yɛmenne taabo a yɛ puoruu zuiŋ.

⁸ A gaŋ a zaa, yɛ nɔnɔ taa tegitegilɛ, bonso, nɔmmo maŋ pɔge la yelbebe yaga.

⁹ Yɛ tuoro derɛ taa saanoŋ, kyɛ ta ŋmoonɔ yɛlɛ.

¹⁰ Yɛ naŋ waa a Naaŋmen garaaseɛ tontonema, yɛ yeni yeni zaa de a kyɔɔtaa na zaa o naŋ taa a soŋnɔ ne o taaba.

¹¹ Soba na zaa naŋ moɔlɔ a yelbiri seŋ ka o moɔlɔ aŋa neɛ naŋ moɔlɔ a Naaŋmen meŋɛ yelbie; soba na zaa naŋ tonɔ, seŋ ka o tonɔ ne a kpeɛ̃õ na Naaŋmen naŋ ko o. Lɛ la ka Naaŋmen pãã na nyɛ puubu yelzaa poɔ a Yeezu Kirista eŋɛ. Ona la so puubu ane kpeɛ̃õ tegitegilɛ. Ameena.

Neɛ Naŋ Nyɛrɛ Woore O Naŋ E Kiristabie Zuiŋ

¹² N poyɛŋ noba, yɛ ta vɛŋ ka yɛ nɔɛ maa ne a woore ŋa naŋ pɔgrɔ yɛ ka a tegre yɛ nyɛ, aŋa yelsaana kaŋ la pɔgrɔ yɛ.

¹³ Kyɛ yɛ kyellɛ ne yɛ naŋ poɔ a Kirista dɔgɛɛ poɔ ka lɛ vɛŋ ka yɛ meŋ na kyaara ne popeɛloŋ ka a O veɛloŋ wa sãã.

¹⁴ Ka ba naŋ wa toorɔ yɛ a Kirista yuori eŋɛ, yɛ nyɛ la maaloo, bonso, a puubu vooroŋ naŋ waa a Naaŋmen Vooroŋ be la yɛ zie.

¹⁵ Kyɛ yɛ ta vɛŋ ka yɛ kanzaa wa nyɛrɛ dɔgroŋ o naŋ e neŋkoorɔ zuiŋ bee nannyige, bee yelfa-errɛ, bee nen-gagaraa.

¹⁶ Kyɛ ka yɛ kanzaa wa dire dɔgɛɛ o naŋ waa Kiristabie zuiŋ, o ta vɛŋ ka a e o vi, kyɛ o puu Naaŋmen o naŋ taa a yuori ŋa zuiŋ.

¹⁷ Bonso, a saŋ taɛ la ka sɛrɛɛdiibu na piili ne Naaŋmen yideme. Ka a sɛrɛɛdiibu pãã na piili ne te, wola ka a baaraa na waa ko banaŋ naŋ zagre a Ŋmen-yelnoore bare?

¹⁸ Aŋa lɛ a gansoŋ naŋ yeli: “Ka a naŋ pãã waa kpeɛŋaa ko a nemmenne ka ba nyɛ faabo, wola ka a pãã na waa ko banaŋ naŋ ba puoro Naaŋmen ane a yelbebe deme?”

¹⁹ Azuiŋ, yɛ vɛŋ ka banaŋ naŋ nyɛrɛ dɔgɛɛ a Naaŋmen poboɔbo eŋɛ, de bamenne ko a Boma Zaa Ire naŋ e meŋɛ kyɛ naŋ kyɛnɛ erɛ yelveɛle.