1 Pit 2 - Naaŋmen Nɔpaalaa Gane

A Kusi-vore Ane A Noba Ba Naŋ Kaa-iri

¹ Azuiŋ, yɛ bare faaloŋ zaa ane zirŋma zaa, a bare nyaayɛlɛ, nyuuri ane yosãã yɛlɛ zaa.

² Yɛ maŋ boɔrɔ a Naaŋmen yelbiri berekoɔ̃ aŋa bilɛɛre ka ka yɛ na nyu a baa, a kpɛ faabo poɔ,

³ ka yɛnee wa sereŋ lɛnne a Daana yɛlɛ nyɛ ka o soma.

⁴ Yɛ wa O zie, a kusi-vore zie, aneazaa ka nensaalba da zagre O la bare kyɛ Naaŋmen kaa-iri O la ka O waa kusi-yuori.

⁵ Yɛ naŋ waa kusi-voɛ, yɛ vɛŋ ka Naaŋmen de yɛ mɛ ne seeloŋ die, ka yɛ waa Naaŋmen bagmaale wederebɛ naŋ waa soŋ, ka yɛ maala seeloŋ bagre naŋ seŋ ne Naaŋmen deebo a Yeezu Kirista eŋɛ.

⁶ Bonso, ba sɛge la a gansoŋ poɔ: “Yɛ nyɛ, N binne la kuuri Zaayɔn poɔ, yiri pare kuuri ba naŋ kaa-iri ka o waa bon-yuori; ka vi koŋ kpɛ soba na zaa naŋ sage de o yɛlɛ.”

⁷ Yɛ banaŋ naŋ pãã sage de O yɛlɛ, O waa la emmo bon ko yɛ; kyɛ yɛ banaŋ naŋ ba de O yɛlɛ: “A kuuri na a mɛmeɛrebɛ naŋ da zagre bare, la leɛ a yiri pare kusi-yuori,”

⁸ kyɛ pãã e “A kuuri na naŋ maŋ e ka noba ŋmɛ gbɛɛ, ane piiri na naŋ maŋ e ka ba le.” Ba ŋmeɛrɛ la gbɛɛ lere ba naŋ zagre a yelbiri zuiŋ, a seŋ lɛ Naaŋmen naŋ da nare biŋ.

⁹ Kyɛ yɛ waa la nemboorɔ ba naŋ kaa-iri, Naaŋmen bagmaale wederebɛ boorɔ, nemboore sonne, Naaŋmen meŋɛ noba, ka yɛ na moɔlɔ a soba na naŋ boɔle yɛ yi ne ligruŋ poɔ wa ne O veɛloŋ poɔ toŋkpeɛne korɔ noba.

¹⁰ Saŋ kaŋ yɛ da ba waa noba, kyɛ pampana yɛ waa la Naaŋmen noba; saŋ kaŋ ba da ba zo yɛ nembaaloŋ, kyɛ pampana ba zo la yɛ nembaaloŋ.

Yɛ Taa Yɛ Nyɔvoɛ Aŋa Naaŋmen Tontonema

¹¹ N poyɛŋ noba, N sɔrɔ yɛ la aŋa yɛ naŋ waa nɔɔre ane noba ba naŋ digi bare ka yɛ be teŋyuo poɔ, yɛ bare a eŋgane vɔlfaare naŋ zɔɔrɔ ne yɛ seere.

¹² Yɛ kaara yɛ yel-erre velaa a Nemboore-yobo poɔ, ka ba naŋ wa yele ka yɛ waa la yelfa-erebɛ, ka ba nyɛ a yɛ yelveɛle a de dannoo ko Naaŋmen ka O naŋ wa wa ka O di sɛrɛɛ.

¹³ A Daana zuiŋ, yɛ sagra a teŋɛzu nembɛrɛ zaa nɔɛ, ka a nakpoŋ la

¹⁴ bee a gɔbena mine o naŋ toŋ ka ba dɔgrɔ banaŋ naŋ erɛ yelfaare kyɛ puuro banaŋ naŋ erɛ yɛlɛ naŋ tori.

¹⁵ Bonso, a e la Naaŋmen poboɔbo ka a yɛ yelveɛle eebo vɛŋ ka a babaŋneba ta taa noɔre na yeli yɛlɛ a ba damboluŋ zuiŋ.

¹⁶ Yɛ naŋ waa Naaŋmen tontonema, yɛ taa yɛ nyɔvoɛ aŋa noba naŋ so bamenne, kyɛ yɛ ta de a yɛmenne soobo erɛ ne yelfaare.

¹⁷ Yɛ eŋnɛ noba zaa. Yɛ nɔnɔ a yelderebɛ. Yɛ zoro Naaŋmen. Yɛ eŋnɛ a nakpoŋ.

A Kirista Dɔgɛɛ Yelwulaa

¹⁸ Gbaŋgbaare, yɛ sigre yɛmenne korɔ a yɛ nembɛrɛ ne emmo zaa boorɔ, ka a ta e a banaŋ naŋ taa nimimaaroŋ ane nimibaaloŋ yoŋ, kyɛ yɛ eŋnɛ a nimikuoŋaa deme meŋ.

¹⁹ Bonso, a na e la maaloo ko yɛ, ka yɛneŋ wa sage di kannyiri a woŋ tuo yɛ naŋ ba seŋ ka yɛ nyɛ, a Naaŋmen noɔre sagoo zuiŋ.

²⁰ Ka yɛneŋ di kannyiri ba naŋ ŋmeɛrɛ yɛ a yɛ saanaa zuiŋ, boŋ tɔnɔ la ka a taa? Kyɛ ka yɛneŋ wa taa kannyiri a yɛ yelveɛle eebo poɔ a di dɔgɛɛ, yɛ nyɛ la Naaŋmen maaloo.

²¹ A ŋaa zuiŋ la ka ba boɔle yɛ, bonso, a Kirista meŋ da di la dɔgɛɛ a yɛ zuiŋ, a bare yelwulaa ko yɛ, ka ka yɛ na tuuro a O gbɛbogri.

²² “O da ba e yelbieri zaa, ka zirii zaa ba yi O noɔre poɔ.”

²³ Ba naŋ da to O zoma, O da ba leɛ to. O naŋ da wono tuo, O da ba yeli yɛlɛ tɔ dabeɛ̃ eŋ neɛzaa; kyɛ O da dɛle la a soba na naŋ maŋ di sɛrɛɛ ne mennoŋ.

²⁴ O meŋɛ la da tuo a te yelbebe a O eŋɛŋ a dagaraa zu, ka ka te na faa temenne yi yelbebe poɔ a kyɛnɛ mennoŋ poɔ. A O felɛ zuiŋ, yɛ nyɛ la baaloŋ sammo.

²⁵ Bonso, yɛ da bɔrɛɛ la aŋa peere, kyɛ pampana yɛ leɛ wa la a yɛ seere kyeenɛ ane yɛ seere guuro zie.