1 Pit 1 - Naaŋmen Nɔpaalaa Gane

Yaane Puoro

¹ Maa Piita naŋ waa a Yeezu Kirista apostolii la sɛgrɛ a lɛtɛ ŋa korɔ a Naaŋmen Neŋkaa-irri naŋ yaare be Pɔntuse paaloŋ, Galesiya paaloŋ, Kapadosiya paaloŋ, Ezeya paaloŋ ane Bitiniya paaloŋ a waa saama.

² A Saa Naaŋmen la kaa-iri yɛ a seŋ O naŋ nare biŋ kyɛ maale yɛ ne a Vooroŋ Soŋ ka yɛ waa soŋ a sagra a Yeezu Kirista yɛlɛ, ka ba mere yɛ ne a O zẽẽ: Ka a Naaŋmen garaaseɛ ane maaroŋ be yɛ zie yaga lɛ.

Teɛretɔroo Naŋ E Vore

³ Ka Naaŋmen, a te Daana Yeezu Kirista Saa, nyɛ puubu! A O nembaalonzoe naŋ e kpoŋ eŋɛ la ka ba leɛ dɔge te paalaa, ka te pãã taa teɛretɔroo naŋ e vore a Yeezu Kirista kũũ leɛ-iruu eŋɛ,

⁴ ka te na nyɛ a gbandiruŋ naŋ koŋ baŋ sãã, a kontoɔ̃ dɛge, a ba taa kyeɛ yiibu, ka ba biŋ ko yɛ tenvelaa poɔ.

⁵ A Naaŋmen kpeɛ̃õ zuiŋ, yeldeebo gu yɛ la taa ka yɛ na nyɛ faabo ba naŋ nare biŋ ka o na wa sãã a baaraa saŋ.

⁶ Yɛ taa kyelloo a ŋaa eŋɛ haali ka yɛneŋ wa kpɛ dɔgɛɛ tɛɛtɛɛ poɔ belaa pampana ŋa.

⁷ A dɔgɛɛ ŋa la na tegre a yɛ yeldeebo nyɛ ka o waa la meŋɛ aŋa salema ba naŋ eŋ vũũ poɔ ka o soli, kyɛ a yɛ yeldeebo waa la bon naŋ taa yuori gaŋ salema naŋ waa bon naŋ maŋ wɛ. A yɛ yeldeebo ba naŋ tegre ka o waa meŋɛ la na tere dannoo, puubu ane emmo ka a Yeezu wa leɛ de O meŋɛ wuli.

⁸ Aneazaa ka yɛ ba nyɛ a Kirista kyɛ yɛ nɔŋ O la. Yɛ ba nyɛ O pampana kyɛ yɛ sage de la O yɛlɛ, a kyellɛ ne popeɛloŋ naŋ ba taa mannoo,

⁹ bonso, a yɛ yeldeebo tɔnɔ yɛ naŋ na nyɛ la a yɛ seere faabo.

¹⁰ A faabo ŋa yɛlɛ la ka a Ŋmen-yelmanneba da manne kyaare ne a Naaŋmen garaaseɛ naŋ waa yɛ soobo ba naŋ da bɔ nyɛ kyɛ peɛre velaa.

¹¹ Ba da peɛrɛɛ la ka ba baŋ a soba bee a saŋ a Kirista Vooroŋ naŋ be a ba poɔ a boɔrɔ ka O yeli, O naŋ da daŋ di danseɛ kyaare ne a dɔgɛɛ ba naŋ da nare biŋ a Kirista ane a puubu naŋ na tu a lɛ puoriŋ.

¹² Ba da iri wuli la a Ŋmen-yelmanneba ka bamenne naane ka ba da tonɔ terɛ kyɛ yɛnee la ka ba da tonɔ terɛ a kyaare ne a yɛlɛ ba naŋ moɔle ko yɛ pampana. Ba da tu la a banaŋ naŋ da taa a yelnoore wa ne yɛ zie a yi a Vooroŋ Soŋ ba naŋ da toŋ ka o yi tenvelaa wa. A malekere da taa la vɔlaa ka ba nyɛ a yɛlɛ ama.

A Boɔlaa Naŋ Kyaare Ne Nyɔvo-soŋ Taabo

¹³ Azuiŋ, yɛ nare yɛ teɛroŋ gu ka yɛ toŋ toma. Yɛ baŋ yɛmenne taabo; a de yɛ teɛretɔroo zaa eŋ a garaaseɛ na a Yeezu Kirista naŋ na wa ko yɛ ka O naŋ wa wa.

¹⁴ Aŋa bibiiri naŋ sagra noɔre, yɛ ta la tuuro a yɛ koroŋ yelboɔre na yɛ naŋ da taa a yɛ babammo saŋ.

¹⁵ Kyɛ aŋa lɛ a soba na naŋ boɔle yɛ naŋ waa soŋ, yɛ meŋ waa soŋ yɛ yel-erre zaa poɔ.

¹⁶ Bonso, ba sɛge la a gansoŋ poɔ, “Yɛ waa soŋ, N naŋ waa soŋ zuiŋ.”

¹⁷ Ka yɛneŋ wa boɔlɔ a soba na naŋ maŋ di noba zaa yel-erre sɛrɛɛ, a ba erɛ nɔnne ka yɛ Saa, yɛ taa Naaŋmen dabeɛ̃ zoobu ane emmo a saŋ yɛ naŋ waa saama a teŋɛzu.

¹⁸ Yɛ baŋ ka ba faa yɛ la yi yelfoglo yɛ naŋ taa yi a yɛ sããkommine zie ne daaroŋ naŋ ba waa boma naŋ na baŋ wɛ aŋa salema bee salem-pelaa,

¹⁹ kyɛ a Kirista zẽẽ naŋ taa yuori la ka ba de faa ne yɛ; aŋa pilee naŋ ba taa faaloŋ bee saanaa zaa.

²⁰ Ba da kaa-iri O la kyɛ ka a tendaa wa bebe, kyɛ pãã e ka O sãã a bebi-baare saŋ yɛ zuiŋ.

²¹ A Kirista zie la ka yɛ tu a wa sage de a Naaŋmen yɛlɛ; Ona la e ka a Yeezu leɛ-iri yi a kũũ poɔ, a ko O puubu, ka ka yɛ yeldeebo ane teɛretɔroo na be Naaŋmen eŋɛ.

²² Yɛ naŋ sage tu a yelmeŋɛ pampana, yɛ pɛge la a yɛ seere ka ka yɛ na taa nɔmmo naŋ sereŋ e meŋɛ. Yɛ nɔnɔ taa ne yɛ sukyie zaa.

²³ Ba leɛ dɔge yɛ la paalaa ne a Naaŋmen yelbi-vore naŋ bebe tegitegilɛ ka a ba e dɔgrebɔ naŋ na kpi la dɔge yɛ kyɛ dɔgrebɔ naŋ koŋ baŋ kpi la dɔge yɛ.

²⁴ Bonso, “Nensaalba zaa waa ŋa moɔ ka ba veɛloŋ zaa waa ŋa mɔpuuri. A moɔ maŋ zoɔle la, ka a puuri suori le,

²⁵ kyɛ a Daana yelbiri bebe la tegitegilɛ.” A yelbiri ŋa la a yelnoore ba naŋ da moɔle ko yɛ.