1 Kor 7 - Naaŋmen Nɔpaalaa Gane

Kultaa Sobie Yɛlɛ

¹ Pampana ŋa, a kyaare ne a yɛlɛ na yɛ naŋ da sɛge, “A e la yelvelaa ka dɔɔ ta de pɔge.”

² Kyɛ a peɛ̃mo toma yɛlɛ zuiŋ, a seŋɛɛ la ka dɔɔ zaa taa o meŋɛ pɔge ka pɔge zaa meŋ taa o meŋɛ serɛ.

³ A seŋɛɛ la ka a serɛ tonɔ o sɛŋgaabo feroo toma korɔ a o pɔge, ka a pɔge meŋ tonɔ o sɛŋgaabo feroo toma korɔ a o serɛ.

⁴ Bonso, a pɔge naane so a o meŋɛ eŋɛ, kyɛ a o serɛ la so o, lɛ meŋ la ka a serɛ ba so a o meŋɛ eŋɛ, kyɛ a o pɔge la so o.

⁵ Yɛ ta zagra ka yɛ laŋna taa, ka anaŋ ba e ka yɛ zaa laŋ la noɔre saŋ kaŋ ka a waa lɛ, ka ka yɛ na toɔ̃ taa vuo a puori, kyɛ pãã leɛ lantaa ka Setaana ta wa bɛllɛ yɛ, yɛ naŋ ba toɔ̃ na nyɔge yɛmenne zuiŋ.

⁶ A yɛlɛ ŋa N naŋ yele, a ba e noɔre ka N tere, yelwuluu la ka N yele wullo yɛ.

⁷ N da na boɔrɔ la ka neɛzaa da waa ŋa N naŋ waa lɛ. Kyɛ Naaŋmen maŋ ko la neɛzaa kyɔɔtaa naŋ waa o toɔraa, kaŋ maŋ nyɛ la kyɔɔtaa ŋa, ka kaŋ meŋ nyɛ kyɔɔta-yuo.

⁸ N yele korɔ la a banaŋ naŋ ba de pɔgeba bee a kuli serebɛ ane a pɔg-kɔbɔ ka a na soma la ka ba ta la de pɔgeba bee a kuli serebɛ, aŋa N naŋ waa lɛ.

⁹ Kyɛ ka ba naŋ ba toɔnɔ nyɔgrɔ bamenne, a seŋɛɛ la ka ba de pɔgeba bee a kuli serebɛ, bonso, ka ba naŋ de pɔgeba bee a kuli serebɛ, anaŋ seɛ a vɔlaa naŋ na dɔɔnɔ ba.

¹⁰ N korɔ la a kultaa deme noɔre ŋa; a ba e ŋa maa la tere a noɔre, kyɛ a Daana la; a ba seŋ ka pɔge bare o serɛ

¹¹ (kyɛ ka o naŋ wa yi kyɛ bare a o serɛ, a seŋ ka o ta la kuli serɛ kyɛ bee o e ka o ne a o serɛ leɛ maale taa), ka a serɛ meŋ ba seŋ ka o bare o pɔge.

¹² N yele korɔ la a banaŋ naŋ kyɛre; maa la yele, a ba e a Daana; ka Kiristabie zaa wa taa pɔge naŋ ba sage de a Kirista yɛlɛ, kyɛ ka a pɔge sage na kpeɛrɛ ne o, a ba seŋ ka o bare a pɔge.

¹³ Ka Kirista-bipɔge zaa meŋ wa taa serɛ naŋ ba sage de a Kirista yɛlɛ, kyɛ ka a dɔɔ sage na laŋ kpeɛrɛ ne o, a ba seŋ ka o bare a dɔɔ.

¹⁴ Bonso, a pɔge naŋ e a Kiristabie maŋ e la ka a o serɛ naŋ ba sage de a Kirista yɛlɛ nyɛ sonnoŋ, ka a serɛ naŋ e a Kiristabie meŋ e ka a pɔge naŋ ba sage de a Kirista yɛlɛ nyɛ sonnoŋ. Ka lɛ naane, a yɛ biiri na waa la nendɛgɛ, kyɛ lɛ a naŋ waa, ba waa la nensonne.

¹⁵ Kyɛ ka a soba na naŋ ba sage de a Kirista yɛlɛ wa boɔrɔ ka o yi, vɛŋ ka a waa lɛ; a lɛ poɔ eŋ, a dɔɔ bee a pɔge naŋ waa Kiristabie so la o meŋɛ. Bonso, emmaaroŋ poɔ la ka Naaŋmen boɔle yɛ.

¹⁶ Kaapɔge fõõ Kirista-bipɔge naŋ kuli serɛ na toɔ̃ faa la a fo serɛ ka a serɛ meŋ na toɔ̃ faa a o pɔge.

A Nyɔvore Naaŋmen Naŋ Tere

¹⁷ Ka anaŋ waa wola zaa, yɛ e ka yɛ kanzaa taa a o nyɔvore na a Daana naŋ ko o, a bonna eŋɛ a Naaŋmen naŋ boɔle o. A ŋa la a n noɔre N naŋ wullo a puoruu laŋne yie zaa poore.

¹⁸ A yɛ buo soba la da iri o dɛgre kyɛ ka Naaŋmen pãã da wa boɔle o? A o soba ta boɔrɔ ka o sɔglɔ a dɛgre iruu ŋmaaroŋ. A yɛ buo soba la da ba iri o dɛgre? O ta la boɔrɔ ka o iri a o dɛgre.

¹⁹ Dɛgre iruu ba waa bonzaa, ka dɛgre ba-iruu meŋ ba waa bonzaa; kyɛ a Naaŋmen nɔɛ sagoo la ferɛ.

²⁰ Vɛŋ ka kanzaa waa lɛ o naŋ da waa a saŋ Naaŋmen naŋ da boɔle o.

²¹ Fo mɔɔ da waa la gbaŋgbaa a saŋ Naaŋmen naŋ boɔle fo be? Ta vɛŋ ka a e fo yelferaa. Ka fõõ gba na toɔ̃ yi a gbaŋgbaaloŋ poɔ a so fo meŋɛ, e aneɛ kyɛ de a vuo ŋa e ne a lɛ.

²² Bonso, neɛ naŋ da waa gbaŋgbaa kyɛ ka ba boɔle o a Daana eŋɛ, so la o meŋɛ a waa a Daana soobo aŋa neɛ naŋ da so o meŋɛ a saŋ ba naŋ da boɔle o ka o leɛ a Kirista gbaŋgbaa lɛ.

²³ Ba da da yɛ la ne daaroŋ naŋ ba wono; yɛ ta la leɛ nensaalba gbaŋgbaare.

²⁴ Azuiŋ, n yɔɔmine ane n yɔɔpuuli, lɛ zaa yɛ naŋ da waa a yɛ boɔlaa saŋ, yɛ naŋ waa lɛ a Naaŋmen zie.

A Banaŋ Naŋ Ba De Pɔgebɔ Bee A Kuli Serebɛ Ane Pɔg-kɔbɔ Yɛlɛ

²⁵ A Daana ba ko ma noɔre zaa a kyaare ne a bitorri, kyɛ N yele la n poteɛroŋ aŋa neɛ a Daana nembaalonzoe naŋ e ka N seŋ ne dɛloo.

²⁶ A yelwolɔ naŋ waana zuiŋ, N teɛre ka a na soma la ka neɛzaa naŋ kyɛnɛ waa lɛ zaa o naŋ da waa.

²⁷ Fo taa la pɔge be? Ta boɔrɔ ka fo bare o. Fo ba taa pɔge be? Ta boɔrɔ ka fo de pɔge.

²⁸ Kyɛ ka fõõ wa de pɔge, fo ba e yelbieri, ka bitoro wa kuli serɛ, o meŋ ba e yelbieri. Kyɛ a kultaa deme na nyɛ la a teŋɛzu yelwonni, kyɛ N ba boɔrɔ ka a yɛlɛ ama pɔge yɛ.

²⁹ N yɔɔmine ane n yɔɔpuuli, yeli N naŋ taa ka N yeli la ŋa, a saŋ ba naŋ biŋ ba la seŋ bon, a piili ŋaa gɛrɛ, a banaŋ naŋ taa pɔgeba, ba erɛ seŋ ŋa ba ba taa pɔgeba,

³⁰ ka banaŋ naŋ kono erɛ seŋ ŋa ba ba kono, ka banaŋ naŋ kyellɛ erɛ seŋ ŋa ba ba kyellɛ, ka banaŋ naŋ daara boma erɛ seŋ ŋa ba ba taa boma,

³¹ ka a banaŋ naŋ taa a teŋɛ ŋa zu boma yɛlɛ, erɛ seŋ ŋa ba ba taa a yɛlɛ. Bonso, a tendaa ŋa tɔlɔ gɛrɛ la.

³² N ba boɔrɔ ka yɛ vɛŋ ka yelzaa dɔɔnɔ yɛ. A dɔɔ naŋ ba taa pɔge maŋ kyerɛ la a Daana toma yɛlɛ, lɛ o naŋ na e pɛle a Daana poɔ;

³³ kyɛ dɔɔ naŋ taa pɔge maŋ kyerɛ la a teŋɛzu boma eŋɛ, lɛ o naŋ na e pɛle a o pɔge poɔ,

³⁴ ka o teɛroŋ poŋ. Kyɛ a pɔge naŋ ba taa serɛ ane a bitorri maŋ kyerɛ la a Daana toma yɛlɛ, ka ka o eŋɛ ane o seɛ na e soŋ; kyɛ a pɔge naŋ taa serɛ maŋ kyerɛ la a teŋɛzu boma eŋɛ, lɛ o naŋ na e pɛle a o serɛ poɔ.

³⁵ Yɛ sommo zuiŋ la ka N yele a ŋaa, a ba e ŋa begraa la ka N begrɛ yɛ, kyɛ N boɔrɔ la ka yɛ taa a yɛ nyɔvore velaa kyɛ moɔ nimiri a kpimare a Daana puoruu eŋɛ.

³⁶ Ka neɛzaa wa teɛrɛ ka o ba erɛ velaa ane a pɔgsarlee o naŋ eŋ noɔre ka o de ka o e o pɔge, ka o vɔlaa wa dɔɔnɔ o yaga, o e seŋ o naŋ boɔrɔ lɛ, a de a pɔgsarlee ka o waa o pɔgɔ, a lɛ ba e yelbieri. Yɛ vɛŋ ka ba kultaa.

³⁷ Kyɛ neɛzaa naŋ taa o meŋɛ velaa, ka yelzaa ba ferɛ o, kyɛ ka o baŋ o meŋɛ taabo, a yeli o teɛroŋ poɔ ka o koŋ de pɔge, a toɔ̃ tu a lɛ, o soba e la velaa.

³⁸ Azuiŋ, soba na naŋ de pɔgsarlee o naŋ eŋ noɔre ka o na de la, e la velaa; kyɛ neɛ naŋ ba de pɔge la mɔ yaga.

³⁹ Ka pɔge serɛ naŋ wa voorɔ, a pɔge koŋ baŋ la kuli serɛ, kyɛ ka a serɛ wa kpi, a pɔge so la o meŋɛ a na toɔ̃ kuli soba na o naŋ boɔrɔ, kyɛ o kuli a serɛ a Daana eŋɛ.

⁴⁰ Kyɛ maa eŋ zie, o na nyɛ la maaloo yaga ka o naŋ ba la kuli serɛ. Kyɛ N teɛre ka a Naaŋmen Vooroŋ are ko ma la a yeli ŋa yeluu poɔ.