1 Kor 4 - Naaŋmen Nɔpaalaa Gane

Apostoliimine Tonnoɔre

¹ Yɛ nyɛ te ka te waa a Kirista tontonema naŋ kaara a Naaŋmen yelsɔgle zu.

² A gaŋ a zaa, a seŋ ka tontonema maŋ taa yelmennoŋ.

³ Kyɛ maa eŋ zie a e la yelbile ka yɛ di n sɛrɛɛ bee ka a teŋɛzu sɛrediribe kanzaa di n sɛrɛɛ. Maa meŋɛ gba ba dire n meŋɛ sɛrɛɛ.

⁴ N ba baŋ ne yeli zaa naŋ do ma, kyɛ lɛ naane so ka N ba taa saanaa. A Daana la a soba na naŋ na di n sɛrɛɛ.

⁵ Azuiŋ, yɛ ta daŋ di sɛrɛɛ kyɛ ka a saŋ ba ta; kyɛ ka a Daana waabo naŋ ba ta sɛre. A Daana la na wa e ka yɛlɛ naŋ sɔgle lige poɔ sãã veɛloŋ ka bon naŋ be sukyiri poɔ meŋ sãã. Lɛ la ka neɛzaa pãã na nyɛ garebanyɛ yi Naaŋmen zie.

⁶ N yɔɔmine ane n yɔɔpuuli, N de la a yɛlɛ ama manne ne maa meŋɛ ane Apolo a yɛ sommo zuiŋ, ka a lɛ na vɛŋ ka yɛ zanne yi te zie a baŋ a yeluu ŋa tɛgɛ, “A seŋɛɛ la ka ba ta maŋ e gaŋ bonna ba naŋ sɛge biŋ,” ka a lɛ na vɛŋ ka yɛ kanzaa ta e pɔloo, a maŋ nɔŋ kaŋ kyɛ gyegre kaŋ.

⁷ Aŋ la e ka yɛ zuo a yɛ taaba? Boŋ la ka yɛ taa ka ba ba de ko yɛ? Ka ba naŋ pãã ko yɛ, bonso, ka yɛ duoro yɛmenne aŋa o da ba waa kyɔɔtaa?

⁸ Ma yɛ male ka yɛ taa la bonzaa yɛ naŋ boɔrɔ wɛ! Yɛ male ka yɛ leɛ la bondaanema meŋ wɛ! Ma yɛ leɛ la namine kyɛ ka te ba soŋ yɛ wɛ! Serɛzaa, N da na boɔrɔ la ka yɛ waa namine ka te zaa laŋ dire naaloŋ!

⁹ Bonso, N teɛre ka Naaŋmen eɛɛ la ka tenee apostoliimine leɛ a noba zaa parebaaraa, a waa ŋa noba ba naŋ di ba sɛrɛɛ a yeli ka ba seŋ ne la kũũ, bonso, te waa la noba, a andonɛɛ, a malekere ane nensaalba naŋ kaara.

¹⁰ Te waa la dambolo a Kirista zuiŋ, kyɛ yɛ waa la yɛndeme a Kirista eŋɛ. Te waa la bambaalba kyɛ ka yɛ waa gandaare, a taa yuori kyɛ ka te dire vi.

¹¹ A naŋ wa tɔ pampana, te taa la kɔŋ ane kɔŋnyuuri, a su bonzagra ka ba ŋmɛ te, ka te ba taa zie na kpɛ,

¹² a kyɛ toŋ toma bale ane temenne nuuri. Ka ba naŋ wa to te, te maŋ maale ba la; ka ba naŋ wa dɔgre te, te maŋ di la kannyiri;

¹³ ka ba naŋ wa sãã te yuori, te maŋ yeli sɔge ne la nimimaaroŋ. A wa tɔ ŋaa, te waa ŋa a andonɛɛ sagre, a noba zaa tampuori.

Saa Wuluu

¹⁴ N ba sɛgrɛ a ŋaa ka N eŋ yɛ vi, kyɛ N boɔrɔ la ka N kpãã yɛ aŋa n poyɛŋ biiri.

¹⁵ Ka yɛnee gba taa wulwulibo turi pie a Kirista eŋɛ, kyɛ yɛ ba taa saamine yaga. Serɛzaa, a Kirista Yeezu eŋɛ, N waa la yɛ saa a Ŋmen-yelnoore N naŋ taa wa ko yɛ zuiŋ.

¹⁶ N pãã sɔrɔ yɛ la, yɛ tɔglɔ n eebo.

¹⁷ A yeli ŋa zuiŋ la ka n tonɔ Timoti naŋ waa n poyɛŋ neɛ kyɛ e bie naŋ taa yelmeŋɛ a Daana eŋɛ, ka o wa teɛre yɛ a n sobie a Kirista Yeezu eŋɛ, a seŋ N naŋ kanna a puoruu laŋne poɔ a ziiri zaa lɛ.

¹⁸ Kyɛ yɛ mine naŋ teɛrɛ ka N koŋ la leɛ wa yɛ zie zuiŋ, yɛ piili wullo la yɛmenne.

¹⁹ Kyɛ ka a Daana wa sage, a koŋ la kɔɔre kyɛ ka N wa yɛ zie. N ba waana ka N kyɛlle a pɔloo deme ŋa yelyelii, N waana la ka N nyɛ a ba kpeɛ̃õ.

²⁰ Bonso, a Naaŋmen naaloŋ ba be yɛlɛ yeluu poɔ, kyɛ o be la kpeɛ̃õ zie.

²¹ Boŋ la ka yɛ na boɔrɔ? N wa yɛ zie ne kpaaraa bee N wa ne nɔmmo ane sumaaroŋ?