1 Kor 10 - Naaŋmen Nɔpaalaa Gane

Kpããmo A Kyaare Ne Tebɛ Yɛlɛ

¹ N yɔɔmine ane n yɔɔpuuli, N ba boɔrɔ ka yɛ be babammo poɔ, kyɛ N boɔrɔ la ka yɛ baŋ ka a zunzugri da luri pɔge la a te sããkommine zaa, ka ba zaa da kpɛ a mane gaŋ yi.

² Ba da ko la ba zaa suobu a zunzugri ane a mane poɔ ka ba leɛ a Moozul potuuribo,

³ ka ba zaa da di a Naaŋmen Vooroŋ bondi-yeni,

⁴ a nyu a Naaŋmen Vooroŋ kɔn-yenaa. Bonso, ba da nyu la koɔ̃ a yi a Naaŋmen piiri na naŋ da tuuro ba ka a piiri da la a Kirista.

⁵ Kyɛ Naaŋmen poɔ da ba pɛle ne ba yaga zie, ka ba da kpi pɔge a wɛgyɛŋ poɔ.

⁶ A yɛlɛ ama da eɛɛ la ka a e yelwulaa ko te, ka ka te na ta boɔrɔ yelfaare aŋa ba naŋ da e lɛ.

⁷ Yɛ ta puoro tebɛ aŋa ba mine naŋ da e lɛ; aŋa ba naŋ da sɛge lɛ, “A noba da zeŋɛɛ la ka ba di kyɛ nyu, a kyɛ iri ka ba deɛ̃.”

⁸ A ba seŋ ka te toŋ peɛ̃mo toma aŋa ba mine naŋ da e lɛ, ka ba turi lezare ane bata da kpi bebi-yeni.

⁹ A ba seŋ ka te e a Kirista nyɛ aŋa ba mine naŋ da e lɛ, ka weere da ko ba.

¹⁰ Yɛ ta wa zɔɔrɔ yɛlɛ aŋa ba mine naŋ da e lɛ ka a sããsaana da ko ba.

¹¹ A yɛlɛ ama zaa da e la ba zie ka a e yelwulaa ko ba, kyɛ ka ba da sɛge a biŋ ka a na e wuluu ko te, bonso, te be la a vuo na poɔ naŋ peɛle a baaroo saŋ.

¹² Azuiŋ, ka fõõ wa teɛre ka fo are la kpeɛŋaa, gu fo meŋɛ velaa a ta wa lere.

¹³ Enyaabo zaa daŋ ba pɔge yɛ naŋ daŋ ba pɔge nensaala. Naaŋmen taa la yelmeŋɛ, O koŋ vɛŋ ka enyaabo naŋ zuo yɛ faŋ pɔge yɛ. Kyɛ ka a enyaabo wa pɔge yɛ, O maŋ wuli yɛ la sori yɛ naŋ na tu kyɛ toɔ̃ yi a enyaabo poɔ.

¹⁴ Azuiŋ n bamine, yɛ zo wieouŋ zaa yi tebɛ maaloo poɔ.

¹⁵ N yele la yɛlɛ korɔ yɛ aŋa noba naŋ taa yɛŋ; yɛmenne gyɛle nyɛ bonna N naŋ yele.

¹⁶ A maaloo ŋmanlee te naŋ maŋ puori maale, a Kirista zẽẽ naane ka te maŋ poŋ be? A boroboro te naŋ maŋ ŋmaa, a Kirista eŋɛ naane ka te maŋ poŋ be?

¹⁷ Boroboro yeni naŋ bebe zuiŋ, tenee naŋ waa yaga, waa la eŋgan-yeni, bonso, te zaa la maŋ laŋ ɔɔ a boroboro yeni.

¹⁸ Yɛ kaa a Izerayɛl biiri nyɛ; a banaŋ naŋ maŋ di a Naaŋmen bagmaale boma, ba ba maŋ waa a Naaŋmen bagmaalkuuri laŋne deme be?

¹⁹ A n yeluu ŋa tɛgɛ pãã la boŋ? Ka a boma ba naŋ maŋ de maale ne bagre ko a tebɛ waa la bonkaŋ mɔɔ be, bee ka a teebo waa la bonkaŋ?

²⁰ Ai, bonna N naŋ yele la ka a bagre a noba naŋ ba puoro Naaŋmen naŋ maŋ maale, ba ba maŋ maale ko Naaŋmen kyɛ ba maŋ maale ko la sefaare. N ba boɔrɔ ka yɛ ne sefaare laŋ yɛlɛ.

²¹ Yɛ kontoɔ̃ nyu a Daana ŋmanlee poɔ boma kyɛ la nyu a sefaare meŋ ŋmanlee poɔ boma. Yɛ kontoɔ̃ maŋ di a Daana bondirii a kyɛ la di a sefaare meŋ bondirii.

²² Bee te mɔɔ dɔɔnɔ la a Daana ka O nyuuri iri be? Te taa la faŋ gaŋ O be?

Yɛ Danna Naaŋmen Yɛ Yelzaa Poɔ

²³ “Sori bebe la ka neɛ baŋ e yelzaa,” kyɛ yelzaa naane terɛ sommo. “Sori bebe la ka neɛ baŋ e yelzaa,” kyɛ a zaa naane waana ne sommo.

²⁴ Ta boɔrɔ fo meŋɛ maaloo, kyɛ boɔrɔ fo tɔsoba maaloo.

²⁵ Yɛ dire bonna zaa ba naŋ koɔrɔ a nɛne daa poɔ a kyɛ ta soorɔ sooroo zaa a yɛ zomɔ zuiŋ,

²⁶ bonso, “a Daana la so a teŋɛ ane o poɔ boma zaa.”

²⁷ Ka neɛ naŋ ba sage de a Kirista yɛlɛ wa boɔle yɛ ka yɛ wa di, ka yɛ sage a o soba boɔlaa, yɛ di bonzaa o naŋ ko yɛ, kyɛ ta vɛŋ ka yelzaa dɔɔnɔ yɛ teɛroŋ.

²⁸ Kyɛ ka neɛ kaŋ wa yeli ko yɛ, “Ba ko la a nɛne ŋa eŋ teebo eŋɛ,” lɛ eŋ, yɛ ta wa dire, a soba na naŋ yeli a lɛ ko yɛ yɛlɛ zuiŋ ane teɛroŋ dɔ̃ɔ̃mo zuiŋ.

²⁹ N yele la a soba na naŋ yeli ko yɛ teɛroŋ, a ba e yɛ deni. Bonso ka n meŋɛ soobo yɛlɛ na e yeli ka neɛ na teɛrɛ o teɛroŋ poɔ?

³⁰ Ka maa puori Naaŋmen ameseɛrɛ kyɛ di a bondirii, bonso ka ba na saana n yuori ne bondirii N naŋ puori Naaŋmen ameseɛrɛ kyɛ di?

³¹ Azuiŋ, bonzaa yɛ naŋ dire bee a nyuuro bee bonzaa yɛ naŋ erɛ, yɛ erɛ a zaa Naaŋmen puubu eŋɛ.

³² Yɛ ta e yelfaa zaa ko a Gyuumine bee a Giriki noba bee a puoruu laŋne noba,

³³ aŋa lɛ N naŋ moɔ nimiri yelzaa poɔ ka N pɛle neɛzaa poɔ, a ba boɔrɔ n meŋɛ maaloo, kyɛ boɔrɔ neŋyaga maaloo ka ka ba na toɔ̃ nyɛ faabo.