1 Kor 1 - Naaŋmen Nɔpaalaa Gane

A Pɔɔl Naŋ Puori A Korinti Teŋɛ Puoruu Laŋne Biiri

¹ Maa Pɔɔl, a naŋ e a Naaŋmen poboɔbo ka N waa a Kirista Yeezu apostolii, ane a te yɔɔ Sositene la sɛgrɛ korɔ

² a puoruu laŋne deme naŋ be Korinti teŋɛ poɔ, ane banaŋ naŋ nyɛ pɛgeyiibu a Kirista Yeezu eŋɛ, ba naŋ boɔle ka ba e nensonne, a laŋ ne a banaŋ zaa naŋ be zie na zaa a boɔlɔ a Daana Yeezu Kirista yuori, a Onaŋ naŋ waa ba Daana ane te Daana:

³ Ka a Naaŋmen te Saa ane te Daana Yeezu Kirista garaaseɛ ane maaroŋ be yɛ zie.

⁴ N puoro la a n Naaŋmen ameseɛrɛ tegitegilɛ, a garaaseɛ O naŋ ko yɛ a Kirista Yeezu zuiŋ,

⁵ bonso, Naaŋmen ko yɛ la bon la bonzaa, yɛlɛ yeluu ane bammo boorɔ zaa maaloo;

⁶ aŋa a Kirista danseɛ ba naŋ e ka o taa faŋ yɛ zie lɛ;

⁷ ka ka yɛ koŋ fãã a Vooroŋ Soŋ kyɔɔtaa kanzaa, yɛ naŋ kyɛllɛ a saŋ a te Daana Yeezu Kirista naŋ na de O meŋɛ wuli.

⁸ Ona meŋ la na e ka yɛ taa faŋ a te ta a baaraa, ka yɛ koŋ taa saanaa a te Daana Yeezu Kirista waabo bebiri daare.

⁹ Naaŋmen e la yelmeŋɛ soba. Ona la boɔle yɛ kpɛ ne a O Bie te Daana Yeezu Kirista laŋne poɔ.

Wɛltaa Naŋ Be A Puoruu Laŋne Poɔ Yɛlɛ

¹⁰ N yɔɔmine ane n yɔɔpuuli, N sɔrɔ yɛ la a te Daana Yeezu Kirista yuori eŋɛ, ka yɛ zaa laŋ noɔre, ka wɛltaa ta be yɛ sogɔŋ, kyɛ yɛ taa teɛroŋ yeni ane yelyeni.

¹¹ Bonso, n yɔɔmine ane n yɔɔpuuli, Kɔloe yideme yeli ko ma la ka nɔkpeɛne be la yɛ sogɔŋ.

¹² Bon N naŋ yele tɛgɛ la, yɛ mine maŋ yeli la, “Te tuuro la Pɔɔl,” ka mine yeli, “Te tuuro la Apolo,” ka mine yeli, “Te tuuro la Sefase,” ka mine yeli, “Te tuuro la a Kirista.”

¹³ Ba poŋ la a Kirista be? Ba da kpa la Pɔɔl a dagaraa zu yɛ eŋɛ be? Bee a Pɔɔl yuori eŋɛ la ka ba da ko yɛ a suobu?

¹⁴ N puoro la Naaŋmen bareka ne N naŋ ba ko yɛ kanzaa suobu ka Kirispo ane Gayose yoŋ naane,

¹⁵ azuiŋ yɛ kanzaa koŋ baŋ yeli ka yɛ da de la a suobu n yuori eŋɛ.

¹⁶ (Oo! a ba wa lɛ, N da ko la Setefanase ane o yideme suobu, a lɛ puoriŋ, N ba la baŋ ne neɛzaa N naŋ ko suobu.)

¹⁷ Bonso, a Kirista da ba toŋ ma ka N gaa te tere suobu. Kyɛ O da toŋ ma la ka N gaa te moɔle a Ŋmen-yelnoore kyɛ ta moɔlɔ ne yɛmbaŋ yɛlɛ ka a lɛ ta wa e ka a Kirista dagaraa kpeɛ̃õ e weɛlɛ.

A Kirista La A Naaŋmen Kpeɛ̃õ Ane O Yɛŋ

¹⁸ A Kirista dagaraa zu kũũ duoro waa la damboluŋ a ko banaŋ naŋ weɛrɛ, kyɛ waa a Naaŋmen kpeɛ̃õ ko a te banaŋ naŋ nyɛ faabo.

¹⁹ Bonso, ba sɛgɛɛ la: “N na sãã la a yɛmbaŋnema yɛŋ bare, kyɛ e ka a bambaŋnema bammo bɔre.”

²⁰ Yeŋ la ka a soba na naŋ e yɛmbaŋna be? Yeŋ la ka a Naaŋmen begɛ wulwullo be? Yeŋ ka a zenɛ nɔkpeɛn-ŋmɛrebɛ be? Naaŋmen mɔɔ ba e ka a andonɛɛ yɛŋ leɛ damboluŋ be?

²¹ Bonso, a Naaŋmen yɛŋ bammo poɔ, a tendaa noba da ba toɔ̃ baŋ O ne ba yɛŋ, a lɛ la so ka a Naaŋmen da nare biŋ ka O tu a dambol-yɛlɛ na te naŋ moɔlɔ zie kyɛ faa banaŋ naŋ sage de.

²² Bonso, a Gyuumine boɔrɔ la yelwulii, ka a Giriki noba boɔrɔ yɛmbaŋ yɛlɛ,

²³ kyɛ tenee eŋ moɔlɔ la a Kirista ba naŋ da kpa a dagaraa zu, naŋ waa gbɛŋmɛ-le bon a Gyuumine zie, kyɛ waa dambol-yɛlɛ a Giriki noba zie,

²⁴ kyɛ a banaŋ ba naŋ boɔle zie, a Gyuumine ane Giriki noba zaa, a Kirista waa la Naaŋmen kpeɛ̃õ ane Naaŋmen yɛŋ.

²⁵ Bonso, a Naaŋmen damboluŋ e la yɛmbaŋ yaga a gaŋ nensaalba yɛmbaŋ, ka a Naaŋmen bambaaloŋ taa faŋ yaga a gaŋ nensaalba faŋ.

²⁶ N yɔɔmine ane n yɔɔpuuli, yɛ kaa nyɛ lɛ a yɛ boɔlaa naŋ waa, a nensaalba zie. Yɛ yaga da ba waa yɛmbaŋnema, ka yɛ yaga da ba waa gandaare, ka yɛ yaga da ba waa neŋyoe.

²⁷ Kyɛ Naaŋmen da kaa-iri la bon naŋ e damboluŋ a andonɛɛ poɔ ka O eŋ a yɛmbaŋnema vi, a kaa-iri bambaaloŋ a andonɛɛ poɔ ka O eŋ a gandaare vi.

²⁸ Naaŋmen kaa-iri la boma na naŋ ba taa yuori ane boma ba naŋ gyegre a tendaa zu, anaŋ naŋ ba waa bonzaa, ana la ka O kaa-iri ka ka O sigri ne boma na naŋ taa yuori,

²⁹ ka lɛ na vɛŋ ka nensaala zaa ta duoro o meŋɛ Naaŋmen niŋesogɔŋ.

³⁰ A Naaŋmen zie la ka a yɛ nyɔvore yi a Kirista Yeezu eŋɛ. Ona la da e a yɛŋ naŋ yi Naaŋmen zie ko te, ane mennoŋ ane pɛgeyiibu ane faabo,

³¹ aŋa lɛ ba naŋ da sɛge, “Vɛŋ ka soba na naŋ duoro o meŋɛ, duoro o meŋɛ a Daana eŋɛ.”