1 Gyn 3 - Naaŋmen Nɔpaalaa Gane

¹ Yɛ nyɛ nɔmmo na tɔ a Saa naŋ nɔŋ te, a e ka ba boɔlɔ te Naaŋmen bibiiri; ka te sereŋ waa a lɛ. Bon naŋ so ka a teŋɛzu noba ba baŋ te la, ba da ba baŋ Naaŋmen.

² N poyɛŋ noba, pampana, te waa la Naaŋmen biiri, kyɛ bon te naŋ na waa naŋ ba sãã sɛre. Bon te naŋ baŋ la ŋa: ka O naŋ wa sãã te na waa ŋa lɛ O naŋ waa, bonso, te na nyɛ O la a lɛ O naŋ waa.

³ Banaŋ zaa naŋ taa a teɛretɔroo ŋa a Kirista poɔ maŋ pɛge la bamenne, aŋa O naŋ pɛge yi lɛ.

⁴ Neɛzaa naŋ e yelbieri le la a Naaŋmen nɔɛ poɔ. Yelbieri la noɔre zagroo.

⁵ Yɛ baŋ ka O da waɛ la ka O wa de yelbebe bare, ka yelbieri zaa ba kye O poɔ.

⁶ Neɛzaa naŋ be O poɔ ba erɛ yelbebe. Neɛzaa naŋ erɛ yelbebe ba nyɛ O bee a baŋ O.

⁷ N bibiiri, yɛ ta vɛŋ ka neɛzaa bɛlle yɛ. Neɛzaa naŋ erɛ yɛlɛ naŋ tori e la nemmeŋɛ, aŋa lɛ a Kirista naŋ e nemmeŋɛ.

⁸ Neɛzaa naŋ erɛ yelbebe e la a sebɛlbɛllɛ bie, bonso, a sebɛlbɛllɛ la erɛ yelbebe a yi a piiluu saŋ. A yeli ŋa zuiŋ la ka a Naaŋmen Bie wa, ka O wa sãã a sebɛlbɛllɛ toma bare.

⁹ Banaŋ Naaŋmen naŋ dɔge ba erɛ yelbebe, bonso, Naaŋmen be la ba poɔ ka ba koŋ baŋ e yelbieri, bonso, Naaŋmen la dɔge ba.

¹⁰ A ŋaa la na wuli a banaŋ naŋ waa a Naaŋmen bibiiri ane banaŋ naŋ waa a sebɛlbɛllɛ bibiiri: banaŋ zaa naŋ ba erɛ yɛlɛ ka a toro bee a nɔŋ ba yɔɔmine ane ba yɔɔpuuli ba yi Naaŋmen zie.

Yɛ Nɔnɔ Taa

¹¹ A duoro ŋa la ka yɛ da woŋ yi a piiluu saŋ, ka te nɔnɔ taa.

¹² A ba seŋ ka te waa ŋa Keein naŋ da waa lɛ. O da yi la a faaloŋ soba zie, a da ko o yɔɔ. Kyɛ boŋ la so ka o da ko o? A o meŋɛ yel-erre naŋ da waa faa kyɛ ka a o yɔɔ deme da e soŋ zuiŋ la so.

¹³ N yɔɔmine ane n yɔɔpuuli, yɛ ta vɛŋ ka a e yɛ nɔmaa, ka a teŋɛzu noba wa kyiiri yɛ.

¹⁴ Te baŋ ka te yi la kũũ poɔ a kpɛ nyɔvore poɔ, te naŋ nɔŋ taa zuiŋ. Soba na zaa naŋ ba taa nɔmmo be la kũũ poɔ.

¹⁵ Neɛzaa naŋ kyiiri o yɔɔ bee o yɔɔpuulee e la neŋkoorɔ, kyɛ yɛ baŋ ka neŋkooreba ba taa nyɔvo-babaaraa ka o be ba poɔ.

¹⁶ A ŋaa zie la ka te baŋ nɔmmo, ka a Kirista de la O nyɔvore tere te zuiŋ, ka a seŋ ka te meŋ de te nyɔvoɛ tere te taaba zuiŋ.

¹⁷ Wola ka Naaŋmen nɔmmo na be neɛ na zaa naŋ taa a teŋɛzu boma zie, kyɛ ka o nyɛ o tɔsoba ka o dire boma naŋ ka o zagre ka o soŋ o?

¹⁸ N bibiiri, yɛ ta vɛŋ ka te nɔmmo e noɔre poɔ nɔmmo, kyɛ te taa nɔmmo ne yelmennoŋ ane te eroŋ poɔ.

¹⁹ A ŋaa zie la ka te na baŋ ka te e la yelmenne deme kyɛ na taa bambaare Naaŋmen niŋesogɔ,

²⁰ saŋ na zaa te sukyie naŋ maŋ wa korɔ te saanaa. Bonso, Naaŋmen e la kpoŋ gaŋ te sukyie, kyɛ ka O baŋ yelzaa.

²¹ N poyɛŋ noba, ka a te sukyie ba wa ko te saanaa, te koŋ taa dabeɛ̃ Naaŋmen niŋesogɔ;

²² kyɛ te maŋ nyɛ la bonzaa te naŋ sɔre yi O zie, te naŋ sagra O nɔɛ kyɛ tonɔ O popɛle toma zuiŋ.

²³ Kyɛ a O noɔre la ŋa, ka te sage de a O Bie Yeezu Kirista yuori kyɛ nɔnɔ taa aŋa lɛ O naŋ da eŋ noɔre ko te.

²⁴ Banaŋ zaa naŋ sagra O nɔɛ maŋ be la O poɔ ka O meŋ be ba poɔ. A ŋaa zie la ka te baŋ ka Naaŋmen be la te poɔ, a Vooroŋ Soŋ O naŋ ko te zuiŋ.