1 Gyn 1 - Naaŋmen Nɔpaalaa Gane

A Nyɔvore Yelbiri

¹ Te yele korɔ yɛ la bon naŋ da bebe a yi a piiluu saŋ, bon te naŋ da woŋ, bon te naŋ da nyɛ ne te nimie ane bon te naŋ da kaa nyɛ kyɛ seene ne te nuuri a kyaare ne a nyɔvore yelbiri.

² A nyɔvore ŋa da sããɛ la ka te da nyɛ O, a di O danseɛ, kyɛ manne a nyɔvore naŋ ba taa baaraa naŋ da be a Saa zie yɛlɛ ko yɛ. Ona la ka ba iri wuli te.

³ Bon te naŋ da nyɛ kyɛ da woŋ yɛlɛ la ka te yele korɔ yɛ ka ka yɛ meŋ na laŋ ne te. Kyɛ serɛzaa, a te lantaa e la te ne a Saa ne a O Bie Yeezu Kirista lantaa.

⁴ Te sɛgrɛ la a yɛlɛ ama ka ka a te kyelloo na paale.

Naaŋmen E La Kyaane

⁵ A duoro te naŋ da woŋ yi a Yeezu zie a yele korɔ yɛ la ŋa: Naaŋmen e la kyaane, ka ligruŋ zaa ba kye O poɔ togitogi zaa.

⁶ Ka teneŋ yeli ka te laŋ ne O la kyɛ naŋ kyɛnɛ be a ligruŋ poɔ, te ŋmaara la zirii, a ba tuuro a yelmeŋɛ.

⁷ Kyɛ ka teneŋ wa kyɛnɛ a kyaane poɔ aŋa lɛ Naaŋmen meŋɛ naŋ be a kyaane poɔ, te taa la laŋne ne taa, ka a O Bie Yeezu zẽẽ pɛge a te yelbebe zaa bare.

⁸ Ka teneŋ wa yeli ka te ba taa yelbieri, te bɛllɛ la temenne, ka a yelmeŋɛ ba kye te zie.

⁹ Ka tenee kyiiri te yelbebe, a Naaŋmen naŋ e a yelmeŋɛ soba ane nemmeŋɛ na di la a te yelbebe zaa suuri ko te kyɛ pɛge a te yelfaare zaa bare.

¹⁰ Ka tenee yeli ka te ba e yelbieri, Naaŋmen la ka te boɔlɔ zirŋmaara, ka a O yelbiri ba kye a te nyɔvore poɔ.