Yith 48 - JAM DE NHIALIC 2011

Nhialic ee Bɛ̈nydït de Wadäŋ

¹ Piɛŋkï kënë wek kɔc ke Yithriɛl wek kuat de Juda: Wek ee kuëëŋ në rin ke Bɛ̈nydït, ku yak lueel nɔn lam wek Nhialic de Yithriɛl, ku jam yak lueel acie yen yak looi.

² Ku ŋuɔɔtkï ke we leec röt në luɛɛl ya wek e lueel nɔn ya wek kɔc ke pänydïït ɣeric ku yak röt kan në Nhialic de Yithriɛl, cɔl rin Bɛ̈nydït de rɛm.

³ Aye Bɛ̈nydït lɛ̈k kɔc ke Yithriɛl an, “Ɣɔn thɛɛr yɛn aa cï kë bï rɔt looi caar, na wën ke guɔ tɔ loi rɔt ëthiäu.

⁴ Aa ŋiɛc nɔn bïï wek riɛl ë nɔmdun nyuɔɔth, wek ril nïïm ëtör cï wëëth ku cäkï wenïïm ee waar cï maläŋ.

⁵ Ku Yɛn cï wadäŋdun caar ɣɔn thɛɛr, caal ka bï röt looi ke ke guɔ tuöl, pɛ̈n ɛn week kë bäk lueel an ee yiëthkun ku ka yak käär kek ë tɔ ke loi röt.

⁶ “Ka ɣɔn cïï lueel kedhie acïk röt looi, abäk dhil gam nɔn ye ka cä caar aa yith. Ënɔɔnë wek bä bɛ lɛ̈k ka bï bɛ bɛ̈n, ka kɛ̈n keek kɔn nyooth ɣɔn.

⁷ Ee nɔɔnë tei yen ata yɛn ke tɔ tul, acïn kë cït ee kënë cï rɔt kɔn looi thɛɛr. Na ë cï rɔt kɔn looi, aduëërkï lueel an ŋiɛckï keek ëbɛ̈n.

⁸ Aa ŋiɛc nɔn cïï ë week duëër ŋɔ̈ɔ̈th, në biäk cïï ë week ŋic ke we ye kɔc ee käŋ rɛɛc. Yeka kɛ̈n wek ee kë cït ee kënë kɔn piŋ taitai, eeŋö cïn en wɛ̈t töŋ cï kɔn tëëk në weyïth ë wïl.

⁹ “Ke kɔc ë ke bï rinkï leec, yɛn cï agönhdï dɔm ku bɛ kɔn takic, abä yök ke mɔ̈k ku cä we riäk.

¹⁰ We cä them në many de nuan, cït man ye ateek lëëŋ në mac. Ku acä yök ke we ye kɔc cïn naamdun.

¹¹ Kë ya looi, aa looi në biäk de guöpdï, yɛn cïï rinkï bï tɔ yäär, ku cä raan däŋ tɔ rɔm dhuëëŋ ke yɛn, abï dhil aa këdï yatök, ku ye këdï yatök.”

Thairuth Bɛ̈ny cïï Bɛ̈nydït Lɔc

¹² Aye Bɛ̈nydït lueel an, “Piɛŋkï këdï wek kɔc ke Yithriɛl, we kɔc cä ke cɔɔl! Yɛn Nhialic, Yɛn ee tueŋ, ku ya ciëën, Nhialic tök!

¹³ Cinkï kek aa loi këërkëër de piny, ku thiɛth Paannhial. Ɣɔn caal Ɛn piny ke të nhial, gokï bɛ̈n raan tök ku nyoothkï röt.

¹⁴ “Matkï röt ku piëŋkï, week wedhie! Acïn yanh duëër e caar an raan cä lɔc duëër Babilon mak, abï kë kaar bïï looi lɔ looi.

¹⁵ Ee yɛn ee raan ë jam ku caal, ku ta lɔ biic ku gäm tiëm.

¹⁶ “Ënɔɔnë bäär tëthiɔ̈k ku piŋ kë luɛɛl. Të ɣɔn gɔlë käŋ yɛn aacï jam në kɔc nïïm, ku ta wël cä ke lueel ee yith.” (Ënɔɔnë Bɛ̈nydït Awärjäŋ acï ya gäm riɛl ku tooc ɛn.)

Kïït de Bɛ̈nydït në biäk de Kɔcke

¹⁷ Nhialic Ɣeric de Yithriɛl, Bɛ̈nydït ee yen kony week acï lueel: “Yɛn ee Bɛ̈nydït Nhialicdun, raan kɔɔr bïï we wɛ̈ɛ̈t në biäk de piathdun, ku nyuth week kueer duëër wek lɔ thïn.

¹⁸ “Na piɛŋkï lööŋ cä lɛ̈k week tei! Ke athiɛɛi aduëër we kuany cök cït man ë nyin ë pïïu cie dëu! Ku piathëpiɔ̈u aduëër ciët apiöŋ de pïïu në wɛ̈ɛ̈r yɔu.

¹⁹ Ku kuatdun aduëër juëc abï ciët liɛɛt de kiir yɔu, ku cït käudu nyïïn ke rap cïï lëu në kuɛ̈n, ku aduëër keet tiit apiɛth, abïï ciën kë bï ke riɔ̈ɔ̈k.”

²⁰ Lɔ biic në Babilon yic, ke yï lääu nɔm! Luɛɛlë thok në miɛt ë piɔ̈u, tɔ ŋic ë piny nɔm ëbɛ̈n: “Bɛ̈nydït acï awundɛn Yithriɛl kony!”

²¹ Wään bïï ë Bɛ̈nydït kɔcke tëëk të tuc, ë jɔ̈ɔ̈ric, akënkï bɛ̈n nuan në rou. Acï pïïu bɛ̈n tɔ bɔ̈ bei në kuuric në biäkden, acï kuur bɛ̈n pakic abïï ɣɔ̈ɔ̈r, ku jɔ pïïu wɛ̈t bei.

²² Aye Bɛ̈nydït lueel an, “Acïn kë bï kɔc de gup awɛ̈ɛ̈c kony.”