Yith 47 - JAM DE NHIALIC 2011

Babilon Aluiyë Këtuc

¹ Aye Bɛ̈nydït lueel an, “Babilon bäär piny në thöönydu nɔm, ku nyuc piny abuui yic ee tënë. Yïn aacï kɔn ciët nyan dhueny kën kɔn yök ke moc, pänydïït kënë kɔn peec, ku yïn cï kɔ̈c ku yïn cïï be ciët täu ɣɔn ril yïn! Yïn cï ya lïm ënɔɔnë!

² Pɔ̈kkï kuur ë guär! Guär aɣaar! Bɛ̈ɛ̈iyë lupɔ de yïn nyin bei! Bɛ̈ɛ̈iyë lupɔɔkuön piɛth bei! Jatë alulutdu thok nhial ke yï bï nyïïn teem:

³ Kɔc abïk yï woi ke yï rɛ̈ɛ̈r në yïkɔ̈u, abïk yï tïŋ ke yï cï kuɔɔr piny ku cï yäär. Yɛn bï guur ku acïn raan bï ya pëën.”

⁴ Nhialic Ɣeric de Yithriɛl abï wo gäm nɔm lääu, rin ke ayek Bɛ̈nydït de rɛm.

⁵ Aye Bɛ̈nydït lɛ̈k kɔc ke Babilon an, “Nyuc ke yï mim në mɔ̈ɔ̈thic, acïk yïn bï bɛ aa cɔɔl an nya bɛ̈ny de juöör!

⁶ Yɛn aa göth wo kɔckï, acä ke luööi cït ka cïï be aa kɔckï: acä ke tääu në yïciin ku akën ë keek nyuöth kokdepiɔ̈u, acakaa kɔc cï dhiɔp acï keek luööi arac.

⁷ Aa ye tak nɔn bïï yïn aa nya bɛ̈ny ë ceŋ, ku kɛ̈në ee kake tääu në yïpiɔ̈u, ku kɛ̈në tak nɔn bï kek thök ëbɛ̈n adï.

⁸ “Piɛŋkï kënë, we kɔc nhiaar miɛt ë piɔ̈u, ayak tak nɔn cïï ë we kony ku luök we. Ayak lueel nɔn cä wek dït cït Nhialic, ku nɔn cïn en raan däŋ cït week. Aa ye tak nɔn cïï yïn duëër kɔn aa tiiŋ abaar, ku nɔn bä nuan në thon de mïthku.

⁹ Ku në kaam koor në kööl tök yic, kakë kaarou abïk tuöl. Cakaa nɔn ye yïn lui në yiëth yïn bï nɔm ciën moc ku mïth.

¹⁰ “Yïn cï rɔt ŋic apiɛth në karɛckuön ye looi yiic, aye tak nɔn cïn en raan duëër yï tïŋ. Pɛlënɔmdu, ku ŋïnyduön de käŋ acïk yïn mɔ̈ɔ̈r, ku ja jɔ aa lɛ̈k rɔt an, ‘Yɛn ee Nhialic, acïn raan däŋ pei cït ɛn.’

¹¹ Riääk abï lööny ë yïguöp, ku acïn yanhduön tök bï ee riäŋë tɔ kääc. Riääk abï yï lɔ̈ny ëthiäu, riäŋ kën yïn kɔn nyuöth ë caŋɣɔn!

¹² Muk wal ku tiim ke yiëthku kedhie, yïn aaye lui në gɔl të wään ee yïn meth. Tak däŋ bïï dɛ të bï kek yïn kony, tɛk däŋ bä kɔckuön ke ater riääc ë keek.

¹³ Yïn cï ciën riɛl cakaa nɔn ye kɔc yïn jääm. Tɔ kɔckuön ee kanhial ŋic bɔ̈ tueŋ, bïk yïn bɛ̈n kony, kɔc ee kuɛl nhial ŋic, ku kɔc ee ɣään nhial luöi akɛɛth, ku lëkkï yïn në pɛ̈i thook ëbɛ̈n kë bï rɔt dhil looi tëde yïn.

¹⁴ “Abïk ciët nyïïn ke wal, ku abïï mac ke nyop! Acïkï röt bï lëu në kuny aya, lɔ̈k de mac abï tuöc arëët tëde keek, ku acïn kë thiin de mac bï ke tuööc gup.

¹⁵ Yen këpiɛth bïk luöi yïn ka ëbɛ̈n, kek kɔc ee kanhial kueen ee yïn jääm në pïïrdu yic ëbɛ̈n. Abïk yï nyääŋ piny kedhie ku kuanykï kueerden yic, ku acïn raan bï döŋ bï yïn kony.”