Yith 46 - JAM DE NHIALIC 2011

¹ “Kënë ee thök de yiëth ke Babilon! Bel ku Nebo wään cï kɔn lam, ku ënɔɔnë acï ke duööt në mul kɔ̈ɔ̈th, ee kë cï läi cï duɔɔny tɔ nuan.

² Yiëth acïkï röt duëër luök kapäc, aye keek peec ku jɔt keek. Kënë ee thök de yiëth ke Babilon

³ “Piɛŋkï këdï, wek kuat de Jakop, wek baai de Yithriɛl cï döŋ ë bɛ̈n. Wek cä muk gɔl të wään ë dhiëëthë yïn.

⁴ Yɛn ee Nhialicdun ku wek bä muk agut të cïï wek dhiɔp abäk nïïm lou në nhïm ɣer. Wek cä looi, ku wek bä muk, wek bä gäm kuɔɔny ku luäk week.

⁵ Aye Bɛ̈nydït lueel an, “Eeŋa yak thɔ̈ɔ̈ŋ në yɛn?” De raan däŋ duëër thööŋ ke yɛn?

⁶ Kɔc ayek athepkɛn ke adhɛ̈p liep thook ku wɛ̈lkï adhɛ̈p piny, ayek atek them në kake thëm. Ayek thɛ̈th riɔp bïï ke thäth yath, na ë lë ke ke gut kenïïm piny ku lamkï!

⁷ Ayek jat në ke kët ku jɔkï ɣääc, ayek tääu piny ku yen të bï yen tɔ̈u ka, acïï rɔt ee lëu në jöt tëde. Na de raan läŋ ɛn acïn kë ye bɛ̈ɛ̈r ku cïï raan kony në riääk cï ye yök.

⁸ “Takkï ee kënë, wek kɔc ee karɛc looi, takkï kë cä looi.

⁹ Takkï wenïïm në kë cï rɔt looi ɣɔn thɛɛr, ŋiɛckï ee Yɛn A tök Yɛn ee Nhialic ku acïn raan däŋ cït Yɛn.

¹⁰ Ɣɔn gɔl ë käŋ yɛn cï kë tuöl caar, ɣɔn thɛɛr yɛn cï kë bï tïc guiir. Acä lueel an, kë cä kiëët acïï bï löny, ku Yɛn bï këriëëc kaar bä looi ë bɛ̈n looi.

¹¹ Yɛn cɔl raan bï bɛ̈n të lɔ aköl amiäk: abï lööny piny cït cuɔɔr, ku looi kë cä guiir. Yɛn cï jam ku abïï looi.

¹² “Piɛŋkï këdï, wek kɔc ril nïïm, kɔc ee ye tak nɔn mec ë tiëm aläl.

¹³ Yɛn bïï kööl de tiëm, acïï mɛc aläl taitai. Tiëmdï acïï bï gääu. Yɛn bï Jeruthalem kony, ku gäm riëëu Yithriɛl ëtɛ̈ɛ̈n.”