Yith 45 - JAM DE NHIALIC 2011

Bɛ̈nydït acï Thairuth Kuany

¹ Bɛ̈nydït acï Thairuth kuany ke ye melik! Aa kuɛny ke bï juöör peec, aa tooc bïï riɛl de meliik lɔ nyaai, Bɛ̈nydït abï thook ke kɛ̈l ke pänydït liëp thook en. Ku aye Bɛ̈nydït lɛ̈k Thairuth an,

² “Yɛn në guöpdï, Yɛn bï kueerdu guiir, ku rai kur nïïm piny ayï kur kor. Yɛn bï kɛ̈l cï looi thook në maläŋ dhoŋ, ku dhuɔŋ gɛ̈ɛ̈rgɛ̈ɛ̈rkɛn ke wëëth.

³ Yïn bä gäm wëu të col, në ɣään cï thiaan, yen abïï yïn en jɔ ŋic nɔn ee Yɛn Bɛ̈nydït, ku nɔn cïï Nhialic de Yithriɛl yï cɔɔl në rin.

⁴ Yïn aa kuany ke yï bï awundï Yithriɛl kony, kɔckiën cä ke lɔc. Yïn cä gäm dhuëëŋdït, cakaa nɔn kuc yïn ɛn.

⁵ “Yɛn ee Bɛ̈nydït, acïn yanh däŋ. Yïn bä gäm riɛl kɔɔr, cakaa nɔn kun yïn ɛn.

⁶ Yɛn aa loi ee kënë ago raan ëbɛ̈n ŋic në aguuk ke pinynɔm ëbɛ̈n, gɔ̈l në bɛ̈n aköl thok, ku gɔ̈l të lɔ aköl athɛ̈i, nɔn ee Yɛn Bɛ̈nydït, ku acïn yanh däŋ.

⁷ Yɛn aa cak ɣɛɛr ke mɔ̈ɔ̈th, Yɛn ë athiɛɛi ku dhiëëu bɛ̈ɛ̈i. Ee Yɛn Bɛ̈nydït, yɛn ë loi ee kakë kedhie.

⁸ Yɛn bï tiëm tuööc paannhial ke cït deŋ, ku piny abï rɔt liep ke loor nɔm ku abï jɔ luɔk në piathëpiɔ̈u ku yic. Yɛn Bɛ̈nydït, Yɛn bï piathëpiɔ̈u tɔ loi rɔt.”

Bɛ̈nydït de Cäk ku Kathɛɛr

⁹ Amawoou në raan ee teer kekë Aciëŋda. Duëër tööny de tiɔp teer ke raan ee ye cuëëc, tööny cït töny kɔ̈kkë? Duëër tiɔp raan ee ye cuëëc thiëëc eeŋö ye looi? Duëër töny gööny an cïn raan ë cuëc en tëët?

¹⁰ Amawoou në raan ee ye lɛ̈k kɔc ë dhiëëth en, “An eeŋö cak wek ɛn aya?”

¹¹ Bɛ̈nydït, Nhialic Ɣeric de Yithriɛl, aye raan ee yen ee kë wadäŋ thɔ̈ɔ̈ŋ lueel: “Yïn cïn nɔm yic bä ya thiëëc në biäk de mïthkï, ku nɔn lɛ̈k yïn ɛn kë bä looi.

¹² Ee Yɛn ee raan ë cak piny, ku cak mɛnh ë raan bïï rëër ëtɛ̈ɛ̈n. Në riɛldï, yɛn cï paannhial thieth, ee yɛn mac akɔ̈l, ku pɛɛi ku kuɛl.

¹³ Yɛn cï Thairuth jat nhial ë piathëpiɔ̈u bïï ka cä lɛ̈k en looi, ku jɔ käŋ kiɛm piny apiɛth. Yɛn bï kueerdɛn ee yen tëëk thïn tɔ lɔ riny. Abï pänydiën dït Jeruthalem nyɔk në yïk, ku tɔ kɔckiën cï peec tɔ lääu nïïm. Acïn raan cï yen riɔp, ku cïn raan cï yen kumthok bïï ee kënë looi.” Acïï Bɛ̈nydït de rɛm lueel.

¹⁴ Aye Bɛ̈nydït lɛ̈k kɔc ke Yithriɛl an, “Kuɛth de Rip ku Ethiopia abï ya këdun, ku kɔc bär ke Theba abïk aa lïïmku, abïk yïn kuany cök në kuɛɛt. Abïk kenïïm guöt piny në yïnɔm ku gamkï awɛ̈ɛ̈cken ‘Nhialic atɔ̈u ke yïn, yen yetök yen ee Nhialic.

¹⁵ Nhialic de Yithriɛl, ee kɔcke kony, yen ee Nhialic ee rɔt thiaan?

¹⁶ Kɔc ee yiëth looi abïk yäär kedhie, keek kedhie abïï ke yɔ̈ɔ̈r gup.

¹⁷ Ku Yithriɛl abï Bɛ̈nydït kony, ku tiëmde abï tɔ̈u athɛɛr, kɔcke acïï ke bï kɔn yɔ̈ɔ̈r gup.”’

¹⁸ Bɛ̈nydït yen aa cak paannhial, ee yen cɔl Nhialic! Aa kïït piny ku ciɛk, go looi ke ril ëtör ku bï tɔ̈u athɛɛr. Akën looi ke ye kë cï riääk cïn yic kɔc, aa looi ke ye të bïï ë kɔc cieŋ thïn. Ee yen ë luel en an, “Yɛn ee Bɛ̈nydït, ku acïn yanh däŋ nu.

¹⁹ Yɛn kën kɔn jam ke Ya thiaan, ku mɔ̈k këdiën kaar bä looi ke thiaan. Yɛn kën kɔc ke Yithriɛl thiëëc bïk A kɔɔr të cïn yic kɔc. Yɛn ee Bɛ̈nydït, ku Yɛn jam në yic, Yɛn ee yic tɔ ŋic.”

Bɛ̈nydït de Pinynɔm ku Yiëth ke Babilon

²⁰ Aye Bɛ̈nydït lueel an, “Bäkkï tëtök, kɔc ke juöör, kɔc wään cï poth në wïïk de ciɛɛŋ thok, nyuɔɔthkï röt në löŋ nɔm! Kɔc ee röt kueer në yiëthkɛn ke tiim ku lɛ̈ŋkï yiëth cïï keek bï kony kek ee kɔckë acïn kë ŋickï taitai!

²¹ Bäk bɛ̈ɛ̈ikï göönydun në luk nɔm, takï kɔc bï kɔ̈ɔ̈c në week ye röt kɔn luɔp. Eeŋa cï kë bï tuöl wadäŋ kɔn caar ɣɔn thɛɛr? Ë cie Yɛn, Yɛn Bɛ̈nydït, Nhialic ee kɔcke kony? Acïn yanh däŋ.

²² “Pɔ̈kë rɔt ɛn ënɔɔnë ke we bï kony, wek kɔc ke piny thar ëbɛ̈n! Ee Yɛn ee Nhialic a tök ëtɛ̈ɛ̈n.

²³ Gutguutdiën cä lueel në piathëpiɔ̈u, ku acïï bï waar. Yɛn cï gutguut lueel në täudï ëbɛ̈n: Raan ëbɛ̈n abï bɛ̈n ku tuk yemiɔl ë yanɔm ku kuëëŋ nɔn bï yen A riëëu.

²⁴ “Abïk aa lueel an ee kueerdï yetök, yen aye piathëpiɔ̈u ku riɛl yök, ku raan ëbɛ̈n raan ee yɛn maan abï ayäär guum.

²⁵ Yɛn Bɛ̈nydït, Yɛn bï kuat de Jakop luök, ku abïk Ɛn jɔ piɔɔny.