Yith 30 - JAM DE NHIALIC 2011

Mät kekë Rip acïï Piɛth

¹ Acïï Bɛ̈nydït lueel an, “Amawoou në kɔc mac Juda në biäk cïï kek ɛn rɛɛc. Akuanykï kïït kɛ̈n looi cök, ku gamkï män cie këde piɔ̈ndï, athɔckï awäc në awäc nɔm.

² Ayek kuɔɔny lɔ kɔɔr ë Rip ke ke kën A kɔn luɔp. Akɔɔrkï bï Rip ke kony, ka acïk aŋäthden tääu në melik de Rip guöp.

³ Ku melik de Rip abï nɔm ciën riɛl kony en ke, ku kuɔɔny de Rip abï thök në riääk.

⁴ Cakaa nɔn cïï tuucken ɣet pɛ̈ɛ̈nydït ke Rip, yï Dhowan ku Ɣaneth,

⁵ kɔc ke Juda abïk röt tak në kë ŋɛ̈ɛ̈th kek jur cïn guöp kony, jur ee keek päl wei të kɔɔr kek kuɔɔny.”

⁶ Kënë ee jam bɔ̈ tëde Nhialic në biäkde läi ke piny de wöuwic an, “Tuuc yak tooc, ayek cath piny ë riɔ̈ɔ̈c de yic kɔ̈ɔ̈r ku karɛc de thook wurïï ayï ŋuäl ee päär. Ayek mulken ku thɔ̈rɔ̈ɔ̈lken thiɔ̈ɔ̈ŋ kɔ̈ɔ̈th në kajuëc ke miɔ̈c le gäm jur cïï keek ee kony.

⁷ Kuɔɔny ye Rip gam acïn naamde. Ka Rip acä cäk an, ‘Ŋuäl cïn kë lëu.”’

Kɔc Reec Jam

⁸ Acïï Nhialic lɛ̈k ɛn gäär kënë në awerekic yen tän tɔ̈u ë kɔc, ke bï dɛ kë cï gɔ̈ɔ̈r në biäk de rac ë karɛcken.

⁹ Ayek tɔ̈u ë ceŋ ke ke reec Nhialic, ku yek käŋ töör ë ceŋ, ku reeckï wëët de Bɛ̈nydït ë ceŋ.

¹⁰ Ayek lɛ̈k tït ke Nhialic an, “Miɛmkï thook duökï wo lëk yïth, lɛ̈kkï wook kë nhiaarku buk piŋ. Tɔ wo muk luethkuɔ.

¹¹ Pätkï wo kueer, duökï kueerda thiɔ̈k. Wo cïï köör buk pïŋ ë wël ke Nhialicduön Ɣeric de Yithriɛl.”

¹² Ku kë cïï Nhialic Ɣeric de Yithriɛl lueel kï an, “Wek biɔn kë cä lɛ̈k week, ku yak röt kan në akuöörkuöör ku mɛth.

¹³ Wek de gup awäc. Wek cït päny bäär cï kɔ̈u ɣaar nhial bïï piny, wek bï wïïk ëthiäu.

¹⁴ Wek bï lɔ thorthor cït tööny ë tiɔp, ka bï ciɛ̈n abɔ̈ny thiin duëër ë atiap muk, ku nɔn gemë pïïu në awuölic.”

¹⁵ Bɛ̈nydït Awärjäŋ, Nhialic Ɣeric de Yithriɛl aye lɛ̈k kɔc an, “Bäkkï ciëën ë määth ku ŋäthkï Yɛn. Ke we bï riɛl ku täukï ë mätic.” Ku wek cï jaai në luɔi bä wek e looi!

¹⁶ Ku acäk tak an bäk ban ë jöŋgöör ŋic riŋ të cop ë kɔc ke aterdun week. Ee yicdun, kat ee yen ee kë bäk looi! Ayak tak an ŋic jöŋgöörkun riŋ aläl, ku kɔc cop week aŋickï riŋ aläldïïtë!

¹⁷ Agumdun abï aa kat të cïï kek raan töŋ de rem ë tɔŋ de aterden tïŋ, ka tɔŋdun abï aa kat ëbɛ̈n në kɔc kadhïc ke rem ë tɔŋ de kɔc ke ater. Acïn raan töŋ de rem de tɔŋdun bï döŋ, ee beer yetök yen abï döŋ ke ciɛk ë kuur nɔm.

¹⁸ Ku Bɛ̈nydït aŋoot ke tït week bäk bɛ̈n të nu Yen. Ke bï we nyuöth nhiëërde kekë kokëpiɔ̈u në luɔi ye Nhialic yic looi. Thieithieei në kɔc ee Bɛ̈nydït ŋɔ̈ɔ̈th.

Nhialic abï Kɔcke Thieei

¹⁹ Wek kɔc rɛ̈ɛ̈r ë Dhiɔn, kɔc ceŋ Jeruthalem, wek cïï dhiëëu bï bɛ nyɔk anandun. Bɛ̈nydït ee piɔ̈u kok, ku të la wek dhiau ke we kɔɔr kuɔɔny, abï këdun bɛ̈ɛ̈r.

²⁰ Bɛ̈nydït abï we tëëk në akööl ke nuan yic, ku Yen abï tɔ̈u ke week ke wɛ̈ɛ̈t week, ku acäkï bï aa kɔɔr ke liu.

²¹ Të cä wek määr kueer ke we lɔ ciɛɛm ku cuëëc abäk piŋ röl ke yɔ̈ɔ̈k week an, “Kueerkï pɔ̈kkï röt, tɛ̈kkï tënë.”

²² Wek bï yiëthkuön ke ateek ku yiëth ke adhääp cuat wei, cït man aa cool ke we kïïu an, “Lakkï ya në wolɔ̈m!”

²³ Të la wek kɔ̈thkun com, Bɛ̈nydït abï deŋ tuööc bï ke tɔ goŋ ku tɔ kakun lok abäk kajuëc tem, ku ɣɔ̈kkun abïk dɛ wal juëc nyuäthkï.

²⁴ Miöörkun mulkun ee piny puur abïk aa nyuäth në ayän lëk piɛthë.

²⁵ Në kööl bï wëth ke kɔc ke aterdun dɔm ku näk kɔc nu thïn, abï dɛ awɛɛŋ ke pïïu bï riŋ ke ke bɔ̈ piny në kur nïïm ku ɣään thöny ëbɛ̈n.

²⁶ Pɛɛi abï ruɛl cï akɔ̈l, ku akɔ̈l abï ruɛlde matic raandhorou, ka bï ciët ruɛl de nïn kadhorou matiic. Kënë abï rɔt looi të le Bɛ̈nydït tëtöök ke kɔcke duut nyïïn, ku tɔ ke dem, tëtöök ɣɔn cï gäm keek.

Nhialic abï Athiriya Luöi Këtuc

²⁷ Riɛl ku dhuëëŋ de Bɛ̈nydït aduëër ë tïŋ tëmec. Tol kekë mac anyoothkï agönhde. Bɛ̈nydït ee jam ku dɛ̈p wëlke cï mac.

²⁸ Ee yom tuɔɔc ë Yenɔm tueŋ cï amool ee këriëëc ëbɛ̈n gap wei. Ee juöör nap wei ë riääkic ku tɔ kiɛɛrdɛn rac ëbɛ̈n kääc abï liu.

²⁹ Ku kɔc ke Nhialic abïk ket në diɛt ke miɛtëpiɔ̈u, cït diɛt ke kööl ë dhuëëŋ ɣeric. We bï piɔ̈ɔ̈th miɛt cït kɔc koth kɛŋ ke ke lɔ Luaŋdïït de Bɛ̈nydït Raan ee Yithriɛl gël.

³⁰ Bɛ̈nydït abï röl ë dhuëëŋde tɔ piŋ ë raan ëbɛ̈n ku tɔ yök rac de agönhde. Abï dɛ lɔ̈k de mac, ku luändïït adur, ku rel ë deŋ, ku deŋ ë kɔɔi.

³¹ Kɔc ke Athiriya abïk riɔ̈ɔ̈c arëët, të le kek röl ë Bɛ̈nydït piŋ, ku yökkï tuöc de këtuc looi ë Bɛ̈nydït.

³² Të ye Bɛ̈nydït ke yup ku be ke yup, kɔcke abïk lɔ ke ke koth kɛŋ ku thoom ku gutkï lɔ̈r. Nhialic guöpde abï thɔ̈ɔ̈r kekë kɔc ke Athiriya.

³³ Ɣɔn thɛɛr ade të cï kiëët bï gök de mac dëp thïn bï melik de Athiriya nyop. Athuth ku alääuwic, ku acï thɔ̈ɔ̈ŋ në wal ku tiim juëc. Bɛ̈nydït abï wëi në nyïïn ke mac bï ye ɣaak.