Yith 27 - JAM DE NHIALIC 2011

¹ Në ëköölë Bɛ̈nydït abï abätäudɛn ril de näk nööm ku lui En ŋuäl dït këtuc, yen kërɛɛc lɔ dɔkdɔk, ë duëër päär. Abï ŋuäl dïït ceŋ wɛ̈ɛ̈r nɔ̈k.

² Në ë köölë abï Bɛ̈nydït lueel në biäk de dom ë tiimdɛn nhiɛɛr an,

³ “Aya tiit ku piaak anande. Aya gël wakɔ̈u ku aköl ke cïn raan bï ye luöi tëtök.

⁴ Yɛn cïï be gɔ̈th wökë dom de tiim. Na de kuɔɔth ku thil göth ë yen, aduëër keek nyuɔp piny në mac.

⁵ Ku të kɔɔr de ater ë kɔckï bä ke kony, ë ke loi mät në Yɛn. Ɣɛɛ, ë ke loi mät në Yɛn.”

⁶ Në akööl bɔ̈ kɔc ke Yithriɛl, kuat ë Jakop abïk mei nööm cït man ë tim, ku abïk nyok ku mockï gaak. Piny nɔm abï thiɔ̈ɔ̈ŋ në mïth bïk keek bɛ̈ɛ̈i.

⁷ Bɛ̈nydït akën Yithriɛl luöi këtuc arëët cït këtuc cï luöi kɔc ke aterden, ku akën näk në ke yiic aläl cït man ë kek.

⁸ Acï Bɛ̈nydït ke luöi këtuc në luɔi cïï Yen ke lɛɛr ë pɛ̈cic. Aake jɔt wei në yom de guöp akuöörkuöör ë bɔ̈ të lɔ aköl amiäk.

⁹ Ku awäny de Yithriɛl abï päl en të cïï kek yïïk ke yiëth kɔ̈k dhuɔŋ piny, ku cïn yïïk ke wal ŋïr be tɔ̈u ayï kïn de yanh tik Acera.

¹⁰ Pänydït cï gël adhɔt piny ke cï riääk. Acï nyääŋ piny cï jɔ̈ɔ̈r. Acï aa të ye ɣɔ̈k nyuäth thïn, të ye kek lɔ̈ŋ ku ciëmkï në wal.

¹¹ Kër ke tiim acïk biɔɔr ku dhoŋkï, go diäär ke kuany ke ke ye tiim ke thät. Në biäk kën ë kɔc e yökic, Nhialic Aciëŋden acïï piɔ̈u bï kok ke keek, acï ke bï nyuöth kokdepiɔ̈u.

¹² Në ë köölë, gɔl në wɛ̈ɛ̈r ë Yuparat ɣeet në aken ë Rip, Bɛ̈nydït abï kɔcke määtiic ëtök ëtök, cït man ye raan rap pɔ̈c bei në ayiɛlic.

¹³ Të le ëköölë bɛ̈n, kaaŋ abï kooth, kaaŋ cöölë kɔc ke Yithriɛl bei në Athiriya ku Rip, tëdɛn cï kek pɛɛc thïn. Abïk Bɛ̈nydït bɛ̈n lam ë Jeruthalem, ë kuurdɛn ɣeric nɔm.