Yith 24 - JAM DE NHIALIC 2011

Bɛ̈nydït abï Piny Luöi Këtuc

¹ Bɛ̈nydït abï piny riɔ̈ɔ̈k ku nyiëëŋ piny ke cï riääk. Abï niɛŋ nɔm ku thiɛ̈i kɔc nu thïn.

² Raan ëbɛ̈n abï ë kënë yök, bäny ke kake Nhialic, ku kɔc tei, lïïm ku bäny, kɔc ee ɣööc ku kɔc ee käŋ ɣaac, kɔc ee kɔc dhɛ̈ɛ̈n ku kɔc ee dhëën, ku kɔc kueth ku kɔc kuanynyïïn.

³ Piny abï riääk arëët ku nhiɛɛny. Acïï Bɛ̈nydït lueel ku abï rɔt looi

⁴ Piny abï dëu ku biɔɔr, piny nɔm ëbɛ̈n abï lɔ ke kɔ̈c, piny ke paannhial kedhie abïk dhiap.

⁵ Kɔc acïk piny jɔ dhiöök, në luɔi cïï kek lööŋ ke Bɛ̈nydït dhuööŋ kɔ̈ɔ̈th, ku në luɔi cï kek löŋ ɣɔn cï mac, löŋ bï tɔ̈u aɣet athɛɛr yal yic.

⁶ Në biäk de ee kënë, Bɛ̈nydït ë piny nɔm cieen. Kɔc nu thïn, acolkï ariöp de awänyden. Kɔc lik kek abï döŋ apïïr.

⁷ Enap abï yom, ku mɔ̈u ë liu. Ku raan ë mit piɔ̈u ɣɔn ë piɔ̈u riääk ënɔɔnë,

⁸ ka kɛ̈t de miɛtëpiɔ̈u de thom kekë lɔ̈r acïk kɔ̈ɔ̈c.

⁹ Acïn din de miɛtëpiɔ̈u bï bɛ aa ket ë mɔ̈u nɔm, acïn raan be miɛt de mɔ̈n tuc bɛ thiëëp.

¹⁰ Këriëëc ëbɛ̈n ë nuɔɔn ë pänydït yic, ku kɔc röt thiɔ̈ɔ̈k në ɣöötken yiic, ke cïn kë bï ke yök.

¹¹ Kɔc adhiaukï në kuɛɛriic në biäk de ciɛ̈n mɔ̈u. Miɛtëpiɔ̈u ë jäl athɛɛr, ë määr ë piny nɔm.

¹² Pänydït ë riääk, ku athïïn ke kalde acï ke dhuɔŋ piny.

¹³ Kë bï tuöl kï të de juöör ë piny nɔm ëbɛ̈n. Abï ciët thök de tëm, të cï ë mïth ke olip yuöp bei në tiim gup ëbɛ̈n, ku jɔ mïth ke enap ciëën lɔ̈ɔ̈k tɛ̈t bei në tim guöp aya.

¹⁴ Kɔc bï döŋ apïïr, abïk ket në miɛtëpiɔ̈u. Kɔc nu në lɔ de aköl athɛ̈i abïk dït ë Bɛ̈nydït leec,

¹⁵ ku kɔc nu të lɔ aköl amiäk abïk piɔɔny. Kɔc rɛ̈ɛ̈r në wɛ̈ɛ̈r yɔu abïk Bɛ̈nydït, Nhialic de Yithriɛl piɔɔny.

¹⁶ Në wuöt nu ë piny thar, wo ee diɛt ke dhuëëŋ leecë Raan piɛthpiɔ̈u piŋ. Ku acïn aŋäth tëde Yɛn! Amawoou, yɛn dhiau piɔ̈u! Kɔc ayek a nyiɛɛn, ku nyiinden ee lɔ ke ŋuak rɔt arëët.

¹⁷ Piɛŋkï kë luɛɛl yïn raan ëbɛ̈n! Ade riɔ̈ɔ̈c nu, pul ku wïn ë dɛ̈p atitkï week.

¹⁸ Raan lɔ kak ë riɔ̈ɔ̈c abï lööny ë pulic, ku raan raan lɔ ban në pulic abïï wïn ë dɛ̈p dɔm. Amaŋ de deŋ abï bɛ̈n tënhial, ku këërkëër ë piny abï lath.

¹⁹ Piny abï ɣaar ku nieeŋ rɔt ku liep rɔ.

²⁰ Piny guöpde abï tuëk ë käŋkäŋ cï raan cï wiɛɛt, ku tɛɛny rɔ cï kät beŋ ë amaŋ. Piny nɔm acïï awɛ̈ɛ̈cke tiaam, abï wïïk ku acïï rɔt bï bɛ jɔt.

²¹ Kööl abɔ̈, kööl bï Bɛ̈nydït riɛl nu nhial luöi këtuc, ku bäny mac piny.

²² Nhialic abï meliik määt nïïm ëtök ë pulic cï kɔc cï mac. Ku abïï ke guöör aloocic aɣet të le kööldɛn ë guiëër ë löŋ bɛ̈n.

²³ Pɛɛi abï nyin cuɔl, ku akɔ̈l acï bï bɛ ruɛl, në luɔi bï Bɛ̈nydït de rɛm aa melik. Abï Jeruthalem mac në kuur ë Dhiɔn nɔm, ku röördït abïk dhuëëŋde tïŋ.