Yith 15 - JAM DE NHIALIC 2011

Nhialic abï Mowap Riɔ̈ɔ̈k

¹ Kënë ee jam në biäk de Mowap. Pɛ̈ɛ̈nydït ke Ar ku Kir acï ke riɔ̈ɔ̈k në wɛ̈ɛ̈r tökic, ku jɔ piny de Mowap lɔ dïu ëbɛ̈n

² Kɔc nu Dibon abïk yïïŋden dhiëëu. Kɔc ke Mowap akïmkï në dhiën ë piɔ̈u në këde wuöt ke Nebo ku Medeba, acïk kenïïm muut ku kethook në dhiën ë piɔ̈u.

³ Kɔc nu ë kuɛɛriic ku përiic aceŋkï anuɛɛr në ke kɔ̈ɔ̈th ku dhuöör kɔc në ɣööt nïïm nhial ke ke dhiaukï.

⁴ Kɔc ke Ɣecbon ku Eliɛla adhiaukï ku dhiënden aye piŋ tëmec cɔl Jaɣadh. Ayï rem de tɔŋ alɛthë ë keek ku jöötden ë jäl.

⁵ Yɛn dhiau piɔ̈u në këde Mowap! Kɔc acïk kɛt wutic Dhowar ku Eglath Celicia. Kɔ̈k acïk kueer ë Luɣith dɔmic ke ke dhiau, ku lɔ kɔ̈k thiaan ë Ɣoronaim ke ke cï piɔ̈ɔ̈th jiɛth arëët.

⁶ Nyin ë Nimrim ë dëu, ku wal nu ë ye yɔu acïk yom, ku acïn kë tɔ̈c cï döŋ.

⁷ Kɔc acïk Wak de Wilou teem kɔ̈u, akɔɔrkï bïk kat në kaken ë bɛ̈n.

⁸ Röl de kɔc dhiau aye piŋ në akɛɛth ke Mowap nïïm ëbɛ̈n. Ku piŋ ke në wuöt ke Eglaim ku Beerelim.

⁹ Kiir thiääk ke wun cɔl Dibon, acï thiɛth ke riɛm, ku Nhialic aŋoot ke de kë bïï looi ë Dibon! Kɔ̈ɔ̈r abïk kɔc ke Mowap cï döŋ apïïr nɔ̈k, ku mɛt keek në kɔc ban cï döŋ.