Yith 14 - JAM DE NHIALIC 2011

Bɛ̈n Ciëën në Pɛ̈cic

¹ Bɛ̈nydït abï piɔ̈u bɛ kok kekë Yithriɛl kɔcke, ku lɔc keek ke ke ye kɔc ke naamde. Abïï keek bɛ tɔ rɛ̈ɛ̈r pinyden, ku alɛi abïk bɛ̈n ku rëërkï në keek ëtɛ̈ɛ̈n.

² Kɔc juëc abïk keek kuɔny ke ke bï lɔ piny cïï Nhialic gäm keek, ku ëtɛ̈ɛ̈n juöör abïk baai de Yithriɛl aa luööi cï lïïm. Ku kɔc wään cï ke kɔn peec, ënɔɔnë abï Yithriɛl ke bɛ peec, ku abïk kɔc wään cï keek kɔn yɔŋ bɛ cieŋ.

Melik de Babilonia anu Paan ë Thuɔɔu

³ Bɛ̈nydït abï kɔc ke Yithriɛl tɔ dem në arɛɛmden ku nuanden ku luɔi tuc ɣɔn ye kuöt keek në riɛl an loikï.

⁴ Të looi yen ee kënë, abïk melik de Babilonia aa dɔl guöp ku lueelkï an, “Melik de guöp akuöörkuöör ë wïïk! Acïn raan bïï bɛ yɔŋ!

⁵ Bɛ̈nydït acï riɛl de meliik ee karɛc looi tɔ thök,

⁶ kɔc ee kɔc yɔŋ në agɔ̈th ku cïkï yaaŋ de juöör cïk peec ee tɔ kääc.

⁷ Ku ënɔɔnë piny nɔm ë piɔ̈u miɛt kekë lɔ̈ŋ ku mät, ku raan ëbɛ̈n akït në miɛtëpiɔ̈u.

⁸ Ayï tiim ke thaipereth ku thidar ke Lebanɔn amitkï piɔ̈ɔ̈th në wïïk de melik, në biäk cïn en raan yep keek piny, ënɔɔnë kënë ë guɔ jäl!

⁹ “Paan ë thuɔɔu ë rɔt kiëët ke loor melik de Babilonia nɔm. Atïïp ke kɔc ril ɣɔn nu ë piny nɔm adɛɛikï piny. Atïïp ke meliik ke juöör ajɔtkï röt në thöcken nïïm.

¹⁰ Ayek cɔɔl kedhie an, ‘Ënɔɔnë yïn cï kɔ̈c cït wook! Yïn ee raan töŋda!

¹¹ Yïn aaye dhuëëŋ guöp në kɛŋ ku thoom, ku ënɔɔnë yï kï ee tënë paan ë thuɔɔu. Yïn cï tɔ̈c në biöŋ de ruöi nɔm, ku kuömë në lupɔ de käm.”’

¹² Meliŋ de Babilonia, ciëër de run ë piny, yïn ë lööny piny paannhial! Wään tueŋ yïn aacï juöör peec, ku ënɔɔnë yïn cï guɔ cuat piny.

¹³ Aa cï dhel ë yïpiɔ̈u bä kɛɛc nhial paannhial, ku bä thöönydu lɔ tääu nhial në kuɛl nïïm. Aa cï cät an bä lɔ nyuc cït melik në kuur de amatnɔm nɔm, biäk të lɔ rut të ye yiëth kenïïm mat.

¹⁴ Acï lueel an, bä kɛɛc nhial në luäät kɔ̈ɔ̈th ku bä ciët Awärjäŋ.

¹⁵ Ku ee yïn cï guɔ bɛ̈ɛ̈i piny tëthuth arëët paan ë thuɔɔu.

¹⁶ Kɔc nu ëtɛ̈ɛ̈n abïk kenyïïn gëëŋ ke ke woi yïn ku yek gäi an, “Kënë ee yen ë raan ɣɔn cï piny nɔm lath ku tɔ ciɛɛŋ nieŋë?

¹⁷ Ee yen raan ɣɔn riäk pɛ̈ɛ̈nydït ku puk piny nɔm ke ye jɔ̈ɔ̈r? Ee yen raan ɣɔn kën kɔckɛn cï ke mac lony, ku kën keek tɔ lɔ wunden?”

¹⁸ Meliik ke juöör kedhie aninkï në rɛ̈ŋkɛn läkiic,

¹⁹ ku yïn cïn nɔm raŋ, guöpdu ë cuat wei cï mɛnh athɔ̈ɔ̈r bei, acï kum në gup ke rem de tɔŋ cï keek nɔ̈k tɔŋ, go cuat ë pul ë kuuric në keek ëtök, ku jɔ ke dumiic.

²⁰ Në luɔi cïï yïn wundu riɔ̈ɔ̈k ku näk kɔcku, yïn cïï bï tɔ̈ɔ̈u cït man ë meliik kɔ̈k. Acïn raan töŋ de kɔc rac ke ɣöndu thok bï döŋ ke pïïr.

²¹ Guiɛɛrkï kɔc ee kɔc tɛm röt! Näkkï wɛ̈ɛ̈t ke meliŋë në biäk de awɛ̈ɛ̈c ke kuarken! Acïn raan ë keyiic bï rɔt bɛ jɔt ku mɛc piny ku nɔn be yïk nɔm ë pɛ̈ɛ̈nydït.

Nhialic abï Babilon Riɔ̈ɔ̈k

²² Acïï Bɛ̈nydït de rɛm lueel an, “Yɛn bï Babilon mak ku ta riääk. Acïn kë bä nyääŋ piny acïn mïth, ku acïn kɔc bï döŋ apïïr taitai, ee Yɛn Bɛ̈nydït Yɛn ë lueel en.

²³ Yɛn bï Babilon puk ke ye bäc, ka agumuut abïk ceŋ ëtɛ̈ɛ̈n. Yɛn bï Babilon napic në wëëny ee këriëëc ëbɛ̈n nap wei. Acä lueel, Yɛn Bɛ̈nydït de rɛm.”

Nhialic abï Athiriya Riɔ̈ɔ̈k

²⁴ Go Bɛ̈nydït de rɛm kuëëŋ an, “Kë cä kiëët abï rɔt looi. Kë cä dhel ë Yapiɔ̈u an luɔi abïï looi.

²⁵ Yɛn bï Athiriya riɔ̈ɔ̈k pinydiën ë Yithriɛl, ku duöm ke yiic në kurkï nïïm. Yɛn bï kɔckï luöny bei në yaaŋ de Athiriya yic, ku bɛ̈ɛ̈i kathiek ɣɛ̈ɛ̈ckï bei.

²⁶ Kiɛɛrdï kï në biäk de piny nɔm, köŋdï acä jat nhial bä këtuc luöi juöör.”

²⁷ Bɛ̈nydït de rɛm acï dhel ë yepiɔ̈u bï ee kënë looi, acï ye kök jat nhial ke kɔɔr bï këtuc looi, ku acïn raan duëër E dɔ̈m kɔ̈ɔ̈c.

Nhialic abï Pilithiin Riɔ̈ɔ̈k

²⁸ Kënë ee jam ë bɔ̈ në ruöön ɣɔn thouwë melik Aɣadh.

²⁹ Kɔc ke Pilithiin, thieny ɣɔn ee we dui ë dhuɔɔŋ, ku acïn kë duëër we tɔ mit piɔ̈ɔ̈th. Të thou ë kërac tök ke däŋ wär en ë rac ee rɔt lɔ̈ɔ̈k jɔt tëde. Tuɔŋ de kërac ee ŋuäl ee päär nhial kuem.

³⁰ Bɛ̈nydït abï aa tïn de kɔckɛn kuanynyïïn ku abï kɛ̈ide tɔ rɛ̈ɛ̈r ë mätic. Ku abï cɔŋ rac tuöc week wek Pilithiin, ku acïn raan töŋ bïï pɔ̈l apïïr në we yiic.

³¹ Rɔ̈lkï arëët ku dhiëëukï kuɔɔny, wek pɛ̈ɛ̈nydït ke Pilithiin! Jakï riɔ̈ɔ̈c wedhie! Luän de tɔɔr abɔ̈ të lɔ rut, ee rem de tɔŋ cïnic ariɔ̈ɔ̈c në tuŋ yiic ëbɛ̈n.

³² Eeŋö buk lɛ̈k tuuc ke jur? Abuk lɛ̈k keek an Bɛ̈nydït ë Dhiɔn yïk ke kɔckɛn kuanynyïïn ke ke bï mät yök ëtɛ̈ɛ̈n.