Wɛ̈ɛ̈t 4 - JAM DE NHIALIC 2011

¹ Guɔ bɛ daai, ku tiëŋ yaaŋ loi rɔt ëbɛ̈n ë piny nɔm, dhiën dhiɛɛu ë kɔc yɔŋ keek, ku acïn raan dut ke piɔ̈ɔ̈th ku kony keek: ku kɔc ee keek yɔŋ adekï nïïm riɛl.

² Guɔ jɔ lueel an, kɔc cï thou, amitkï piɔ̈ɔ̈th, në kɔc pïïr.

³ Ku raan ŋuän ë keek kedhie, ee raan kënë dhiëëth, raan kën yaaŋ loi rɔt ë piny nɔm tïŋ.

⁴ Ku yɛn cï kënë kɔc tɔ lui aläl ŋic, ee biäk ye kek kakë kɔc thiääk ë keek woi, ku ee kë ɣɔ̈ric, acït cum de yom cök.

⁵ Raan piɔlpiɔ̈u ee yecin kuak ku tɔ rɔt nɛ̈k ë cɔk.

⁶ Ku ayadäŋ, aŋuän bä dɛ kë koor ku rëër adïu, në luɔi bï raan aa cool ë luɔɔi në cin kedhie, ee cum de yom cök.

⁷ Aguɔ rɔt puk ku tiëŋ ɣɔ̈ric ë piny nɔm.

⁸ Ade raan rɛ̈ɛ̈r yetök, acïn nɔm meth, ku acïn nɔm mänhë, ku ee tɔ̈u aköölnyïïn, ke cïï piɔ̈u kueth në kajuëc tɔ̈u në yen, eeŋa jɔ luööi aläldïïtë aya ke cïï rɔt tɔ lɔ̈ŋ? Kënë ee ɣɔ̈ric ayadäŋ, ku ee pïïr de yic nuɛɛn.

⁹ Rou aŋuɛ̈nkï në tök, në baŋ duëër kek lui apiɛth ëtök.

¹⁰ Na cï raan tök wïïk ë keyiic, aduëërë raan däŋë jat nhial. Ku amawoou në raan cath yetök na lee wïïk, ee kërac aläl, në biäk cïn en raan duëër en kony.

¹¹ Ku na tɔ̈c kɔc kaarou tëtök, ayek gup mɔɔr, ku duëër raan tök guöp mɔɔr adï?

¹² Kɔc kaarou aduëërkï tɔŋ duëër raan tök tiaam lëu ë tiëm. Wïn cï yiëëric ë diäk arilic në tuëny.

¹³ Dhuŋ kuanynyin ku pelnɔm aŋuän në monydïït bɛ̈ny piɔlpiɔ̈u, raan cïï jam piɛth ee piŋ.

¹⁴ Yen ee dhuŋë, cakaa yen ë lony aloocic lee ë thööc nɔm, ku nɔn ë dhiëth wunden ke kuanynyin.

¹⁵ Yɛn cï kɔc kedhie tïŋ acath ë piny nɔm, ke ke kuany ee dhuk cök, dhuŋ cï dɔm në nyin ë bɛ̈ny yic.

¹⁶ Tɛk däŋ, bɛ̈ny aduëër kɔc juëc mac, ku të cï yen jäl, acïn raan bï ka cï looi bɛ tak. Ku kënë aya ee ɣɔ̈ric, acït cum de yom cök.