Romai 13 - JAM DE NHIALIC 2011

Luɔi bï Bän Luööi

¹ Ë raan ëbɛ̈n ë ye bäny piŋ thook, bäny cï tääu ë kɔc nïïm. Acïn bɛ̈ny däŋ nu, ee bäny ë bɔ̈ tëde Nhialic kapäc, ku bäny nu ënɔɔnë ee Nhialic yen ë dɔm keek.

² Ku raan ee bɛ̈ny ŋɛ̈ny, ka cï löŋ cïï Nhialic lueel ŋɛ̈ny, ku kɔc ee ŋeeny aya, abïk këtuc yök ë jamdenic.

³ Ku bäny acïkï kɔc ee këpiɛth looi ee tɔ riɔ̈c, ee kɔc ee kërac looi kek aye ke tɔ riɔ̈c. De yïpiɔ̈u luɔi cïï yïn bï riɔ̈ɔ̈c ë bäny? Ye këpiɛth looi, ke bï yïn leec yen bɛ̈ny,

⁴ ee raan ë ka ke Nhialic looi në këde piathdu. Ku na ye kërac looi, ke yï jɔ riɔ̈ɔ̈c, abätäu acie mɔ̈k ɣɔ̈ric, ee raan ë ka ke Nhialic looi, raan ë agönh ë Nhialic nyuöth kɔc ee kërac looi.

⁵ Yen abä wek jamde dhil aa piŋ, acie baŋ de agönh ë Nhialic e tök, ee baŋ de löŋ ee raan yök ë yepiɔ̈u aya.

⁶ Ku yen a ya wek athölbö kut aya, ayek kɔc ee ka ke Nhialic looi, kɔc ee cool ë tit luɔi manë guöp.

⁷ Yen a wek kɔc kedhie gäm kaken an, ee athölbö, ke we gɛm athölbö an, ee guaaric, ke we gɛm guaaric an, ee riëëu ke riëëukï an, ee thɛ̈k ë guöp, ke thɛkkï guöp.

Luɔi bï Kɔc Röt Luööi

⁸ Duökï ee cath në käny de raan däŋ, ee nhiëër tei, nhiëër bä wek röt aa nhiaar, raan ee raan däŋ nhiaar acï löŋ tiiŋic.

⁹ Ku lööŋ an, “Du lɔ wekë tiiŋ de raan däŋ, Du raan näk abï thou. Du kuël, Du raan ciëk thok, Du kalei woi ë yïpiɔ̈u,” ku na de cöök däŋ, aye ke mat nïïm kedhie në löŋ töŋë an, “Yïn bï raan rɛ̈ɛ̈r kekë yïn nhiaar cït man nhiɛɛr yïn rɔt.”

¹⁰ Nhialic acïn kërɛɛc ee luöi raan rɛ̈ɛ̈r ke raan, yen aye nhiëër löŋ tiiŋic.

¹¹ Ku cöökë aya an, “Yak piny ŋic, nɔn ee yen akööl bï wok dhil pääc ë nïnic, kuny bï wo kony wëi ë guɔ thiɔ̈k ënɔɔnë awär wään kɔn wok gam.

¹² Piny ë dït, ku a kɔɔr ruu, jɔku luɔi de cuɔlëpiny cuat wei, ku jɔku ka ke ɣɛɛrëpiny dɔm, ka ke tɔŋ.

¹³ Yok ŋiëc rëër apiɛth, luɔi ee yen aköl, yok thuëëc pɔ̈l, ku wïn ee mɔ̈u wo wit, ayï ŋɔ̈ɔ̈ŋ de tik ayï luɔi rac, ayï ater ayï tiɛɛl.

¹⁴ Jakkï Bɛ̈nydït Yecu Kërtho cieŋ cït lupɔ, ku duökï ee diɛɛr në karɛc kɔɔr guöp.