Pilipoi 2 - JAM DE NHIALIC 2011

Kërtho ë Rɔt Kuɔɔr Piny ku Adït

¹ Ku na de muŋdepiɔ̈u nu ë Kërthoyic, ku na de luŋdepiɔ̈u nu, luŋ bɔ̈ ë nhiëëric, ku na de määth ë Wëidït nu, ku na de kokdepiɔ̈u nu.

² Ke we bï miɛt de yɛnpiɔ̈u tɔ ye yic, në luɛl aa wek jam tök lueel, ku dɛkï nhiëër töŋë, ku yak löŋ tök mat, ku cathkï në piɔ̈n tök.

³ Duökï käŋ ee looi në ater ayï lɛ̈cderɔt, yak röt kuɔɔr piny, ë ŋɛk ë ye ŋɛk riëëu awär riëëu riëëu en rɔt.

⁴ Ë ŋɛk cïï ka ke yenguöp ee ŋic kapäc, e ye ka ke kɔc kɔ̈k ŋic ayadäŋ.

⁵ Yak cath në piɔ̈n kït kekë piɔ̈n wään cath ke Kërtho Yecu ayadäŋ:

⁶ Acakaa yen e cït guöp Nhialic, ke kït kït en kekë Nhialic akën tɔ ye kë bï dhil muk aril, ku cïï päl.

⁷ Ku acï dhuëëŋde pɔ̈l, ku tɔ rɔt cït lïm, ago dhiëëth ke cït guöp raan.

⁸ Na wën, acï guöp ciët raan, ke jɔ rɔt kuɔɔr piny, go ya raan ee jam piŋ, athou en ë thon rac, thon e tim cï rïïu nɔm.

⁹ Yen aa jɔtë Nhialic en nhial arëët, ago miɔɔc ë rin nu ë rin nïïm kedhie.

¹⁰ Ku bïï miɔl tuk kedhie në rin ke Yecu, miɔl ke ka nu paannhial, ku ka nu ë piny nɔm, ku ka nu ë piny thar,

¹¹ go liëp ëbɛ̈n Yecu Kërtho gam an, ee Bɛ̈nydït, ke Nhialic Wääda bï dhuëëŋ yök.

Yak Riau cï Ɣɛɛr ë Pinynɔm

¹² Yen ka, wek kɔckiën nhiaar, acït man aa wek jam piŋ ë caŋɣɔn, ku acie të nuö yɛn etök, yak kunyduön ë wëi looi, kunydun guöp, luɔikï abäk thöl në riɔ̈ɔ̈c ku lɛ̈thëguöp, ku bäk cök ë luɔɔi wek en arëët ënɔɔnë të liɛɛu ɛn,

¹³ ee Nhialic yen ee Raan ee luui ë weyiic bäk käŋ aa kɔɔr ku yak ke looi ayadäŋ, ka cït ka nu ë yepiɔ̈u.

¹⁴ Yak këriëëc looi ëbɛ̈n ke we cïï piɔ̈ɔ̈th ee dok ku cäkï ee teer,

¹⁵ ke we bï ciën gääk ku ciënkï gup akɔ̈ɔ̈k, mïth ke Nhialic mïth cïï duëërë gɔ̈k ë remic cil rem ee cath ëdɔkdɔk ku cïï rɔt yal ë kërac, rem aa wek tïc ë keyiic cït man ë kuɛl ë piny riaau,

¹⁶ ku yak jam ë pïïr mɔ̈k nhial cït man ë kuthyuui, yen abän dɛ kë bän rɔt leec ëkööl ë Kërtho an, acie ɣɔ̈ric en e riɛŋ ɛn, ku yen luööi yɛn.

¹⁷ Yeka, ku na cäk wëikï luööŋ ë yïk nɔm, ku luuŋë ke ë luɔi nɔm aya, luɔiduön ë gäm cä wek gam, ka mit ë yapiɔ̈u, ku yɛn mit piɔ̈u wokë week wedhie.

¹⁸ Ku yen acït miɛt duɛ̈ɛ̈r wek piɔ̈ɔ̈th miɛt ayadäŋ abäk piɔ̈ɔ̈th ayum në yɛn ëtök.

Timotheo ku Epaprodito

¹⁹ Ku yɛn ŋäth Bɛ̈nydït Yecu nɔn bän Timotheo dap tuöc week, ke yɛn bï yapiɔ̈u riit aya, të cän täudun ŋic.

²⁰ Luɔi cïn en raan cath ke yɛn raan cït piɔ̈u en, raan bï aa diɛɛr ë kakun në yic.

²¹ Kɔc kedhie ayek kakë kek gup kɔɔr kapäc, ku cïkï kakë Yecu Kërtho ee kɔɔr.

²² Ku we ye piathde yök, aŋiɛckï luɔi ee yen luui kekë yɛn ëtök në luɔi de wëlpiɛth, cït man ee meth wun luööi.

²³ Yen aŋiɛc nɔn bän e dap tooc miäk, të cän jamdï tïŋ, täu bï en tɔ̈u.

²⁴ Ku yɛn ŋäth Bɛ̈nydït nɔn bän dap lɔ tëde week yɛn guöp aya.

²⁵ Acä lueel tei an, bä Epaprodito dhil tuöc week, ee mɛnhkäi, raan luui wok ëtök, ku yok biök ëtök, ku ye tunydun, raan cï a kony në ka cï a dak.

²⁶ Acä tooc, luɔi cï en we tak wedhie, ku acï wëi miɛt, luɔi cä wek e piŋ nɔn ë de en guöp juäi.

²⁷ Ee yic, aa de guöp juäi wään, arëk abï duɛ̈ɛ̈r thou, ku Nhialic acï piɔ̈u kok ke yen, ku cie yen etök, ë piɔ̈u kok ke yɛn ayadäŋ, ke ya cïï dhiënëpiɔ̈u bï giëëk.

²⁸ Yen a kaar ɛn en arëët nɔn tuöc ɛn en week, ke we bï piɔ̈ɔ̈th miɛt, të cä wek e bɛ tïŋ, go dhiën de yɛnpiɔ̈u kuur.

²⁹ Yen dam wek en ë Bɛ̈nydïtic, ke we mit piɔ̈ɔ̈th arëët, ku yak kɔc cït en riëëu gup,

³⁰ ee biäk de luɔi de Kërtho, yen aa duëër en thou, acï wëike kuɔɔn, ke bï kë cï nɔm dak në kuny cä wek a kony thiɔ̈ɔ̈ŋ nɔm.