Pilipoi 1 - JAM DE NHIALIC 2011

¹ Yɛn Paulo wokë Timotheo, lïïm ke Yecu Kërtho, awerek en gɛ̈ɛ̈rku kɔc ɣerpiɔ̈ɔ̈th ë Kërtho Yecuyic kedhie kɔc nu Pilipoi, kekë kɔc ë kɔc tiit ayï kɔc ee kake ɣön ë Nhialic looi:

² Ë dhuëëŋdepiɔ̈u tɔ̈u ke week ayï mät, në kë bɔ̈ tëde Nhialic Wääda kekë Bɛ̈nydït Yecu Kërtho.

Lɔ̈ŋ de Paulo në Biäk de Kɔc bï Kuen

³ Yɛn ë Nhialicdï leec në täŋ aa yɛn cool ë tak ɛn a nɔm ë week,

⁴ ku lɔ̈ŋ aa yɛn cool ë lɔ̈ŋ në biäkdun wedhie, ee miɛt ë yɛnpiɔ̈u yen aa yɛn lɔ̈ŋ,

⁵ në män cä wek röt mat ë wëlpiɛth yiic, ɣɔn kan wek gam aɣɔ̈l cï ënɔɔnë.

⁶ Ku cöökë aŋiɛc ëgɔk an, Raan ë cak luɔi piɛth ë weyiic abï thöl abïï piath ë kööl ë Yecu Kërtho.

⁷ Ku apiɛth aya nɔn bän kënë thɔ̈ɔ̈ŋ ë yapiɔ̈u në këdun week wedhie, luɔi aa yɛn we tak ë yapiɔ̈u, në röm aa wek dhuëëŋ rɔm në yɛn ëtök wedhie, në mäny mɛcë yɛn ayï kuny aa yɛn wëlpiɛth kony ke ke bï kɔ̈ɔ̈c aril.

⁸ Nhialic ee cäätɔdï, ee täŋ aa yɛn we tak arëët wedhie në nhiëër ë Yecu Kërtho.

⁹ Ku cöökë yen a läŋ, ke nhiëërdun bï lɔ ke lɔ abï dït arëët në ŋïnydekäŋ ku puny aa wek käŋ ŋiëc pɔ̈ɔ̈c yiic ëbɛ̈n,

¹⁰ abäk kapiɛth cök ë ŋiɛc wek keek, ke we bï yiic awai ku ciënkï piɔ̈ɔ̈th kërac aɣet kööl ë Kërtho.

¹¹ Ke we bï thiɔ̈ɔ̈ŋ piɔ̈ɔ̈th ë kak ee piathëpiɔ̈u ke luɔk, kak ë bɔ̈ tëde Yecu Kërtho, ke Nhialic bï dhuëëŋ yök ayï lɛc.

Rëër në Kërthoyic

¹² Ku yɛn de piɔ̈u luɔi bä wek e ŋic, wek mïthëkɔckuɔ an, Ka cä yök acïk bɛ̈n piath agokï wëlpiɛth tɔ lɔ tueŋ.

¹³ Ago mäny mɛcë yɛn ë biäk de Kërtho ago ŋic ë kaldïït ë bɛ̈nydït ëbɛ̈n, ku ŋic ë kɔc kɔ̈k nïïm kedhie.

¹⁴ Ku këdït ë mïthëkɔckuɔ nu ë Bɛ̈nydïtic acïk piɔ̈ɔ̈th riɛl në biäk de mäny mɛcë yɛn, agokï nyïïn riɛl arëët në luɛl ee kek wëlpiɛth lueel ke ke cïï riɔ̈c.

¹⁵ Kɔ̈k ayek ka ke Kërtho guiir në tiɛɛl tei, kekë ater, ku guiir kɔ̈k në piɔ̈n piɛth aya.

¹⁶ Kɔckë ayek Kërtho guïïr në teer ë wël, acïkï ke guiir në piɔ̈n agɔk, ayek lueel an, bïk tuöc de mäny mɛcë ya ŋuak.

¹⁷ Ku guiir kɔckë në nhiëër, aŋickï nɔn cï a dɔm në kuny bän wëlpiɛth aa kony.

¹⁸ Jɔ aa ŋö? Apiɛth tei, ee guiëër ëbɛ̈n, nɔn ee yen ruëëny, ku nɔn ee yen yic, ka ke Kërtho aye ke guiir tei, ku yen a miɛt ɛn piɔ̈u, yeka, ku yɛn bï tɔ̈u ke ya mit piɔ̈u.

¹⁹ Në ŋïny ŋiɛc ɛn en nɔn bï kënë piath në këdï, ago ya kony në lɔ̈ŋduön aa wek lɔ̈ŋ, ku në miɔ̈c cï wo miɔɔc në Wëi ke Yecu Kërtho.

²⁰ Acït man kaar ɛn en arëët ku ŋääth an, bï ciën kë bän yäär, ku yɛn bï nyin riɛl arëët, ago Kërtho lɛc yök ë këdï ënɔɔnë, acït man ee yen en yök ëcaŋɣɔn, ayï të piëër ɛn, ayï të thuɔɔu ɛn.

²¹ Ku tëde yɛn, pïïr piëër ɛn ee Kërtho, ku thon thuɔu ɛn ee këmit bä yök.

²² Ku të piëër ɛn ë piny nɔm, ke yɛn bï kak ë luɔidï ke luɔk yök, ku kë bä lɔc ë keyiic aja kuc.

²³ Yɛn ë miɛn ë kaamden kaarou, yɛn cïï ŋɔ̈ɔ̈ŋ de jäl dɔm, jäl jäl ɛn aguɔ tɔ̈u wokë Kërtho ëtök, yen aŋuän arëëtdït.

²⁴ Ku rëër bän rëër ë piny nɔm aŋuän tëde week.

²⁵ Ku ŋïny ŋiɛc ɛn ee kake ëgɔk, yen a ŋiɛc ɛn en nɔn bän tɔ̈u, ku rɛ̈ɛ̈r wokë week wedhie, ke we bï lɔ tueŋ ku miɛtkï piɔ̈ɔ̈th ë gäm,

²⁶ ago lɛc lɛɛc wek röt në këdï, ago aa dït ë Kërtho Yecuyic, në täu bän bɛ tɔ̈u wokë week.

²⁷ Yak tɔ̈u apiɛth tei, ke täudun bï aa röŋ kekë wëlpiɛth ke Kërtho, ku na miäk, aa cä bɛ̈n bä week bɛ̈n tïŋ, ku na kɛ̈n bɛ̈n aya, ke yɛn duëër këdun piŋ, nɔn kääc wek aril në piɔ̈n tök, ku nɔn luööi wek arëët në piɔ̈n tök në këde gäm de wëlpiɛth.

²⁸ Ku duökï wepiɔ̈ɔ̈th ee tɔ päu ë këdäŋ në kɔc dɛ wek ater. Aterden në week, yen aye ŋïny aa wek riääkden ŋic, ku ye ŋïny bä wek kunyduön ëwëi ŋic, kuny ë bɔ̈ tëde Nhialic.

²⁹ Acï aa këdun ë biäk aa wek Kërthiaan, acie luɔi bä wek këde Kërtho gam tei, ee luɔi bä wek kërac aa guum aya në biäkde.

³⁰ Wït aa wek wït ënɔɔnë ee wït cït kë cäk tïŋ ë yaguöp, ku acït kë piɛŋkï ënɔɔnë nɔn wiët ɛn.